ଭୁବନେଶ୍ୱର: ମନ୍ତ୍ରୀ ହେଲେ ୧୩ ମାସ । ଏବେ ଦକ୍ଷତା ନଥିବା ସାର୍ଟିଫିକେଟ ଧରି ହେଲେ ବିଦା । ଦୁଇ ଦୁଇ ଥର ବିଧାୟକ, ଶିକ୍ଷା ଓ ଖେଳରେ ମାହିର୍ । ଦଳ ବଦଳାଇ ବଡ଼ ପଦ ପାଇବାରେ ବି ହୋଇଥିଲେ ସଫଳ । ହେବିୱେଟଙ୍କୁ ରିପ୍ଲେସ କରି ରେଢାଖୋଲର ବିଧାୟକ । କିନ୍ତୁ ଏବେ ବିଭାଗ ନଚଲାଇ ପାରିବାର ମୋହର ବାଜିଲା ଓ ମନ୍ତ୍ରୀ ପଦ ଛାଡିଲେ । ଆମେ କହୁଛୁ ଉଚ୍ଚ ଶିକ୍ଷା ମନ୍ତ୍ରୀ ରୋହିତ ପୂଜାରୀଙ୍କ କଥା । ବିଭାଗୱାରୀ ସମୀକ୍ଷାରେ ତାଙ୍କ ପ୍ରଦର୍ଶନ ଠିକ୍ ନଥିବା କାରଣ ଦର୍ଶାଇ ତାଙ୍କୁ ମନ୍ତ୍ରୀ ପଦରୁ ହଟାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରୋହିତ ପୂଜାରୀଙ୍କ ଇସ୍ତଫା ଗ୍ରହଣ କରିବାକୁ ରାଜ୍ୟପାଳଙ୍କୁ ସୁପାରିଶ କରିଛନ୍ତି ମୁଖ୍ୟମନ୍ତ୍ରୀ । ଏହାସହ ଖାଦ୍ୟ ଓ ଯୋଗାଣ ମନ୍ତ୍ରୀ ଅତନୁ ସବ୍ୟସାଚୀ ନାୟକଙ୍କୁ ଅତିରିକ୍ତ ଭାବେ ଦିଆଯାଇଛି ଉଚ୍ଚ ଶିକ୍ଷା ବିଭାଗ । ଏପଟେ କିନ୍ତୁ ନବୀନ ସରକାରଙ୍କ ପଞ୍ଚମ ପାଳିର ଏହି ଘଟଣା ଆଉ ଏକ ମାଷ୍ଟରଷ୍ଟ୍ରୋକ ବୋଲି ରାଜନୈତିକ ମହଲରେ ଚର୍ଚ୍ଚା ଧରୁଛି ।

ରୋହିତ ପୂଜାରୀଙ୍କ ରାଇଜ୍ ଆଣ୍ଡ୍ ଫଲ୍

୪୯ ବର୍ଷୀୟ ରୋହିତ ପୂଜାରୀ । ଅଭିଜ୍ଞ ରାଜନେତାଙ୍କ ମଧ୍ୟରେ ଗଣା । ପଶ୍ଚିମ ଓଡ଼ିଶାର ବଢୁଥିଲା ପତିଆର । କଂଗ୍ରେସରୁ ରାଜନୀତି ଆରମ୍ଭ କରିଥିଲେ । ରାଜ୍ୟ ଯୁବ କଂଗ୍ରେସର ସଭାପତି ରହିଲେ । ଏଆଇସିସି ସଦସ୍ୟ ମଧ୍ୟ ଥିଲେ । ସବୁଠୁ ବଡ଼ କଥା ହେଲା ସେ ଏକଦା ରାହୁଲ ଗାନ୍ଧୀଙ୍କ ଘନିଷ୍ଠ ବି ଥିଲେ । କିନ୍ତୁ ରାଜନୀତିରେ ସମ୍ପର୍କ ସବୁ ଦିନ ନୁହେଁ । ମେକାଲିକାଲ ଇଞ୍ଜିନିୟରରୁ ରାଜନେତା ରୋହିତ ୨୦୦୯ରେ ଧରିଲେ ଶଙ୍ଖ ପତାକା । ଦଳକୁ ଆସୁ ଆସୁ ତାଙ୍କୁ ମିଳିଥିଲା ଯଥେଷ୍ଟ ସମ୍ମାନ ସହ କ୍ଷମତା । ଓଡିଶା ଉଠା ଜଳସେଚନ ନିଗମର ଅଧ୍ୟକ୍ଷ ହୋଇଥିଲେ । କିନ୍ତୁ ରୋହିତଙ୍କ ପତିଆର ଜଣାପଡ଼ିଲା ରେଢାଖୋଲ ବିଧାନସଭା ଟିକେଟରୁ । ୨୦୧୪ରେ ରୋହିତଙ୍କୁ ମିଳିଲା ରେଢାଖୋଲର ବିଜେଡି ଟିକେଟ୍ । ତା ପୂର୍ବରୁ ସେଠାରେ ବିଧାୟକ ଥିଲେ ବିଜେଡି ହେଭିୱେଟ୍ ପ୍ରସନ୍ନ ଆଚାର୍ଯ୍ୟ । ୨୦୧୪ ଓ ୧୯ରେ ଦୁଇ ଥର ବିଧାୟକ ରୋହିତ ପୂଜାରୀ ।

{"id":800738,"sizeSlug":"full","linkDestination":"none"}

ମନ୍ତ୍ରୀ ହୋଇ ନଥିଲେ ବି ମିଳିଥିବା ଉପ-ମୁଖ୍ୟ ସଚେତକ ପଦବୀ । ତେଣୁ ରୋହିତଙ୍କ ପ୍ରଭାବ ପତିଆର ଥିଲା ନିଶ୍ଚିତ । କିନ୍ତୁ ବଡ଼ ପୁରସ୍କାର ମିଳିଲା ୨୦୨୨ରେ । ସେହି ବର୍ଷ ଜୁନ ୫ରେ ରୋହିତ୍ ହେଲେ ମନ୍ତ୍ରୀ । କିନ୍ତୁ ବିଡମ୍ୱନା ସେହି ଜୁନରେ ଗଲା ନବୀନ ପଟ୍ଟନାୟକ ଦେଇଥିବା ମନ୍ତ୍ରୀ ପଦ । ମନ୍ତ୍ରୀ ଭାବେ ଟାର୍ଗେଟ ପୂରଣ କରି ନଥିବା ଏବଂ ପ୍ରଦର୍ଶନ ଭଲ ନଥିବା ତ ବର୍ତ୍ତମାନର ସ୍ପଷ୍ଟ ନିଶ୍ଚିତ କାରଣ । କିନ୍ତୁ ପୂର୍ବରୁ ବି ରହିଛି ବିବାଦ । ସାଂଗଠନିକ ଦକ୍ଷତାରେ ବିଫଳତା ଏବଂ ତୁଣ୍ଡରେ ଲଗାମ ଦେବାରେ ଫେଲ୍ ମାରିବା ବି ରୋହିତଙ୍କୁ ଅକଳରେ ପକାଇଥିବା କୁହାଯାଉଛି । ତେବେ ସରକାରୀ ସୂତ୍ରରୁ କୁହାଯାଉଛି ଯେ ମୁଖ୍ୟମନ୍ତ୍ରୀଙ୍କ ବିଭାଗୱାରୀ ସମୀକ୍ଷାରେ ଉଚ୍ଚଶିକ୍ଷା ମନ୍ତ୍ରୀଙ୍କ ପ୍ରଦର୍ଶନ ସନ୍ତୋଷଜନକ ନଥିଲା । ନବୀନ ପଟ୍ଟନାୟକଙ୍କ କ୍ୟାବିନେଟର ସବୁ ବିଭାଗର ସମୀକ୍ଷା ମେ ୨୨ରୁ ଜୁନ୍ ୨ ମଧ୍ୟରେ କରାଯାଇଥିଲା । ଆଉ ଏବେ ସାତ ଦିନ ପରେ ଆକ୍ସନ ହେଲା ।

ରାଜନୀତି ପଣ୍ଡିତଙ୍କ ଦାବି ରୋହିତଙ୍କୁ ମିଳିଛି ପନିସମେଣ୍ଟ । ତାଙ୍କର କିଛି ବୟାନକୁ ନେଇ ଖୁସି ନଥିଲେ ଦଳର ନେତା । କିଛି ଦିନ ତଳେ ରୋହିତ ବୟାନ ଦେଇ ରାଜନେତାମାନେ ୬୦ ବର୍ଷ ପରେ ଅବସର ନେବା ଦାରକାର ବୋଲି କହିଥିଲେ । ରୋହିତଙ୍କ ଅବସର ବୟାନ ଏବେ ତାଙ୍କ ପାଇଁ ବୁମେରାଂ ହେଲା କି ବୋଲି ଏବେ ଚର୍ଚ୍ଚା ହେଉଛି । ଅନ୍ୟପଟେ ରୋହିତ ପୂଜାରୀଙ୍କ ସାଂଗଠନିକ ଦକ୍ଷତା ମଧ୍ୟ ଠିକ୍ ଠାକ୍ ନଥିବା ପ୍ରମାଣିତ ହୋଇଛି । ଗତ ନିର୍ବାଚନରେ ରେଢାଖୋଲରେ ବିଜେପି ଗୋଟିଏ ଜିଲ୍ଲା ପରିଷଦ ଦଖଲ କରିଥିଲା । ତାହା ରୋହିତଙ୍କ ସାଂଗଠନିକ ଦୁର୍ବଳତାକୁ ପ୍ରମାଣିତ କରିଥିଲା । ପଶ୍ଚିମ ଓଡିଶାର ହୋଇ ମଧ୍ୟ ନିକଟରେ ଝାରସୁଗୁଡା ଉପନିର୍ବାଚନରେ ବିଜେଡିର ଷ୍ଟାର୍ ପ୍ରଚାରକ ତାଲିକାରେ ନଥିଲେ ରୋହିତ୍ ।

ଏହାସହ ନିଜ ନିର୍ବାଚନ ମଣ୍ଡଳୀରେ ତାଙ୍କ ଜନସମ୍ପର୍କ ମଧ୍ୟ ଦୁର୍ବଳ । କାରଣ ସେ ନିଜ ନିର୍ବାଚନ ମଣ୍ଡଳୀକୁ ଖୁବ କମ ଯାଉଥିବା ଏବଂ ଅଧିକାଂଶ ସମୟ ଭୁବନେଶ୍ୱର ଏବଂ ବାହାରେ ରହୁଥିବା ଅଭିଯୋଗ ମଧ୍ୟ ଉଠୁଥିଲା । ସେପଟେ କିନ୍ତୁ ବିଜେଡିର ଜଣେ ବରିଷ୍ଠ ନେତା ସଂଗଠନ ସଜାଡୁଥିବା ଖବର ଚର୍ଚ୍ଚାରେ । ଏ ସବୁ ବି ରୋହିତଙ୍କ ମନ୍ତ୍ରୀ ପଦ ଯିବା ପଛର କାରଣ ହୋଇପାରେ । ଏସବୁ ଭିତରେ ବଡ଼ ଯୁକ୍ତିଟିଏ ହେଲା ନିକଟରେ ଦୁଇ ମନ୍ତ୍ରୀଙ୍କୁ ବାଦ ଦେଇ ତିନି ନୂଆ ମନ୍ତ୍ରୀଙ୍କୁ ସାମିଲ କରିଥିବା ନବୀନ ପଟ୍ଟନାୟକ ଏକ ଛୋଟିଆ ସମ୍ପ୍ରସାରଣରେ ପଶ୍ଚିମ ଓଡିଶାରୁ ଜଣେ ବିଧାୟକଙ୍କୁ ନିଜ ଟିମରେ ସାମିଲ କରିପାରନ୍ତି ।

Also Read: ବାହାନଗା ଟ୍ରେନ୍ ଟ୍ରାଜେଡି : ଆହତଙ୍କ ମଧ୍ୟରୁ ୨୦ଜଣ SCB ଆଇସିୟୁରେ, ୬୩ ଜଣଙ୍କର ହୋଇଛି ଅସ୍ତ୍ରୋପଚାର