ଚଣ୍ଡିଖୋଲ ୨୨।୦୩ : ଅଜଣା ଗାଡି ଧକ୍କାରେ ମହିଳା ମୃତ । ଠିକଣା ସମୟରେ ଆମ୍ବୁଲାନ୍ସ ନଆସିବାକୁ ଠେଲାରେ ମେଡିକାଲ ଆଣିଲେ ପରିବାର ଲୋକେ । ଯାଜପୁର ଜିଲ୍ଲା ଧର୍ମଶାଳା ଥାନା ଅଞ୍ଚଳରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ।  ମୃତକ ଜାରକା କୁମାରୀ ଅଞ୍ଚଳର ଅରଣ୍ୟ ଗୁଇଁଙ୍କ ସ୍ତ୍ରୀ ଗେଡି ଗୁଇଁ ବୋଲି ଜଣାପଡିଛି ।

ଖବର ଅନୁଯାୟୀ, ବୁଧବାର ଦିନ ସକାଳ ସମୟରେ ଶୌଚ ହୋଇ ୧୬ ନମ୍ବର ଜାତୀୟ ରାଜପଥ ପାର୍‌ ହେଉଥିଲେ । ଏହି ସମୟରେ ଏକ ଅଜଣା ଗାଡି ତାଙ୍କୁ ଜୋରଦାର ଧକ୍କା ଦେଇଥିଲା । ରାଜପଥ କଡ଼ରେ ଗୁରୁତର ଭାବେ ପଡିଥିଲେ ଗେଡି ଗୁଇଁ । ଏହାପରେ ପରିବାର ଲୋକେ ତୁରନ୍ତ ଆମ୍ବୁଲାନ୍ସକୁ ଫୋନ୍‌ କରିଥିଲେ । କିନ୍ତୁ ଆମ୍ବୁଲାନ୍ସ ଠିକ୍‌ ସମୟରେ ଆସିନଥିଲା । ଶେଷରେ ପରିବାର ଲୋକେ ଏକ ଠେଲାରେ ଧର୍ମଶାଳା ମେଡିକାଲକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଛନ୍ତି ।

ସେପଟେ ଘଟଣାକୁ ନେଇ ପରିବାର ଲୋକେ ଅସନ୍ତୋଷ ପ୍ରକାଶ କରିଛନ୍ତି । ଧର୍ମଶାଳା ପୋଲିସ ଘଟଣାରେ ତଦନ୍ତ ଜାରି ରଖିଛନ୍ତି ।