ନୂଆଦିଲ୍ଲୀ: ଫେବ୍ରୁଆରୀରେ ଖୁଚୁରା ମୁଦ୍ରାସ୍ଫୀତି ହାରରେ ସାମାନ୍ୟ ହ୍ରାସ ରେକର୍ଡ କରାଯାଇଛି, କିନ୍ତୁ ଏବେ ବି ଏହା ଆରବିଆଇ ଦ୍ୱାରା ଧାର୍ଯ୍ୟ ଲକ୍ଷ୍ୟ ସୀମା ଉପରେ ରହିଛି । ୨୦୨୩ ଫେବ୍ରୁଆରୀରେ ଖୁଚୁରା ମୁଦ୍ରାସ୍ଫୀତି ହାର ୬.୫୫ ପ୍ରତିଶତ ରହିଛି । ଜାନୁଆରୀରେ ମୁଦ୍ରାସ୍ଫୀତି ହାର ୬.୫୨ ପ୍ରତିଶତ ରହିଥିଲା । ଗୋଟିଏ ବର୍ଷ ତଳେ ସମାନ ମାସରେ ଖୁଚୁରା ମୁଦ୍ରାସ୍ଫୀତି ହାର ୬.୦୭ ପ୍ରତିଶତ ରହିଥିଲା । ଉଲ୍ଲେଖଯୋଗ୍ୟ ଯେ ରିଜର୍ଭ ବ୍ୟାଙ୍କକୁ ମୁଦ୍ରାସ୍ଫୀତି ହାର ୪ରୁ ୬ ପ୍ରତିଶତ ମଧ୍ୟରେ ରଖିବାକୁ ପଡିଥାଏ ।
ଫେବ୍ରୁଆରୀରେ ଖାଦ୍ୟ ଦରବୃଦ୍ଧି ହାର ୫.୯୫ ପ୍ରତିଶତ ରହିବା ଏହି ସାମାନ୍ୟ ହ୍ରାସ ପଛର କାରଣ ବୋଲି କୁହାଯାଉଛି । ଜାନୁଆରୀରେ ଖାଦ୍ୟ ଦରବୃଦ୍ଧି ହାର ୬ ପ୍ରତିଶତ ରହିଥିଲା । ଫେବ୍ରୁଆରୀରେ ଖାଦ୍ୟଶସ୍ୟ ଏବଂ ଏହା ସହ ଜଡିତ ଉତ୍ପାଦର ଦରବୃଦ୍ଧି ହାର ୧୬.୭୩ ପ୍ରତିଶତ ରହିଛି । ସେହିପରି ଦୁଗ୍ଧ ଏବଂ ଏହା ଜଡିତ ଉତ୍ପାଦ ଗୁଡିକ ଦରବୃଦ୍ଧି ହାର ୯.୬୫ ପ୍ରତିଶତ ଏବଂ ମସଲା ଗୁଡିକର ଦରବୃଦ୍ଧି ହାର ୨୦ ପ୍ରତିଶତରୁ ଅଧିକ ହୋଇ ୨୦.୨୦ ପ୍ରତିଶତ ହୋଇଛି ।
ଖୁଚୁରା ମୁଦ୍ରାସ୍ଫୀତି ହାରରୁ ଅନୁମାନ କରାଯାଉଛି ଯେ ଏପ୍ରିଲ ମାସରେ ଆରବିଆଇର ମୁଦ୍ରୀ ନୀତି ସମୀକ୍ଷା ବୈଠକରେ ପୁଣି ଥରେ ରେପୋ ରେଟ୍ ବଢା ଯାଇପାରେ । ଗତ ବର୍ଷ ମଇ ମାସରୁ ଆଜି ଯାଏ ରିଜର୍ଭ ବ୍ୟାଙ୍କ ରେପୋ ରେଟ୍ରେ ୨୫୦ ବେସିସ୍ ପଏଣ୍ଟ ବଢାଇ ସାରିଛି । ବର୍ତ୍ତମାନ ସମୟରେ ରେପୋ ରେଟ୍ ୬.୭୫ ପ୍ରତିଶତ ରହିଛି । ଯଦି ଆରବିଆଇ ରେପୋ ରେଟ୍ ବଢାଏ ତେବେ ହୋମ୍ ଲୋନ୍ ସହ ଅନ୍ୟ ଋଣ ଉପରେ ସୁଧ ହାର ବଢିବ ।
