ଉଦଳା: ହୁ ହୁ ହୋଇ ଜଳୁଛି ସଂରକ୍ଷିତ ଜଙ୍ଗଲ। ନିଆଁ ଧୀରେ ଧୀରେ ପୁରା ଜଙ୍ଗଲକୁ ବ୍ୟାପିବାରେ ଲାଗିଥିବା ବେଳେ ନିଆଁକୁ ଆୟତ୍ତ କରିବା ପାଇଁ ବନ ବିଭାଗ ନାକେଦମ। ଉଦଳା ବନାଞ୍ଚଳ ଟଣକା ସାହି ସଂରକ୍ଷିତ ଜଙ୍ଗଲରେ ଏହି ନିଆଁ ଲାଗିଛି। ଜଙ୍ଗଲରେ ନିଆଁ ଲାଗିବା ଫଳରେ ଅନେକ ବଡ଼ ବଡ଼ ବୃକ୍ଷ ଜଳି ଯାଉଥିବା ବେଳେ ବହୁ ଔଷଧୀୟ ଗୁଳ୍ମଲତା ମଧ୍ୟ ପୋଡି ନଷ୍ଟ ହୋଇଯାଇଛି।

ତେବେ ନିଆଁ ଜଙ୍ଗଲରେ ବ୍ୟାପିବାରେ ଲାଗିଥିବା ବେଳେ ଖବର ପାଇ ଉଦଳା ବନ ବିଭାଗ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଟା କରୁଥିଲେ ସୁଦ୍ଧା ନାକେଦମ ହୋଇଛି। ଜଙ୍ଗଲର ତଳେ ଶୁଖିଲା ପତ୍ର ପଡିଥିବାରୁ ନିଆଁ ବହୁତ ଶୀଘ୍ର ବ୍ୟାପିବାରେ ଲାଗିଛି। ନିଆଁ କିଏ ଲଗାଇଛି ନା କେମିତି ନିଆଁ ଲାଗିଛି ତାହା ଏବେ ସୁଦ୍ଧା ସ୍ପଷ୍ଟ ହୋଇପାରି ନାହିଁ। ସାଗୁଆନ ଭଳି ମୂଲ୍ୟବାନ ଗଛ ଏହି ନିଆଁରେ ପୋଡିଯାଇଛି।