ନୂଆଦିଲ୍ଲୀ: ଶନିବାର ମୁକେଶ ଅମ୍ବାନୀଙ୍କର ରିଲାଏନ୍ସ ରିଟେଲ୍ସ କମ୍ପାନୀ ପଲିଷ୍ଟର ଜଗତରେ ନିଜର ପ୍ରଭାବ ବିସ୍ତାର କରିବା ପାଇଁ ଶୁଭଲକ୍ଷ୍ମୀ ପଲିଷ୍ଟର(ଏସ୍ପିଏଲ୍) ଓ ଶୁଭଲକ୍ଷ୍ମୀ ପଲିଟେକ୍ସ(ଏସ୍ପିଟିଏକ୍ସ)କୁ କିଣି ନେଇଛି। ରିଲାଏନ୍ସ ଇଣ୍ଡଷ୍ଟ୍ରୀ 'ରିଲାଏନ୍ସ ପଲିଷ୍ଟର' ନାଁରେ ଏହି ଦୁଇ କମ୍ବାନୀକୁ ଯଥାକ୍ରମେ ୧୫୨୨ କୋଟି ଓ ୭୦ କୋଟି ନଗଦ ଟଙ୍କାରେ କିଣିଛି।
କମ୍ପିଟିସନ କମିଶନ ଅଫ୍ ଇଣ୍ଡିଆ (CCI) ଓ ଏସ୍ପିଏଲ୍ ଓ ଏସ୍ପିଟିଏକ୍ସର ଋଣ ଦାତାଙ୍କ ଅନୁମତିରେ ଏହି ଅଧିଗ୍ରହଣ ହୋଇଛି। ଏସ୍ପିଏଲର ପୋଲିମରାଇଜେସନ କ୍ଷମତା ବର୍ଷ କୁ ପ୍ରାୟ ୨,୫୨,୦୦୦ ମାଟ୍ରିକ ଟନ ହେବ। କମ୍ପାନୀ ପଲିମରାଇଜେସନ ରାସ୍ତାରେ ସିଧାସଳଖ ପଲିଷ୍ଟର, ଫାଇବର, ଉଲ ସୂତା ଓ ଟେକ୍ସଟାଇଲ୍ ଗ୍ରେଡ୍ ଚିପ୍ସ ତିଆରି କରେ।
ଗୁଜୁରାଟର ଦହେଜ ଓ ଦାଦ୍ରା ନଗର ହାଭେଳିର ସିଲ୍ଭାସାରେ କମ୍ପାନୀର ଦୁଇଟି ଫ୍ୟାକ୍ଟ୍ରି ରହିଚି। ଦେହେଜରେ ଏସ୍ପିଟିଏକ୍ସର ସୂତା ଉତ୍ପାଦନ କମ୍ପାନୀ ରହିଛି। ପଲିଷ୍ଟର ବ୍ୟବସାୟକୁ ବୃଦ୍ଧି କରିବା ପାଇଁ ଏହି ଅଧିଗ୍ରହଣ କରାଯାଇଥିବା କୁହାଯାଉଛି।
