ମୁମ୍ବାଇ ୧୧।୫: ବୀମା କ୍ଷେତ୍ରର ନିୟାମକୀୟ ଆଇଆରଡିଏ ରିଲାଏନ୍ସ କ୍ୟାପିଟାଲର ଅଧିଗ୍ରହଣ ନିମନ୍ତେ ହିନ୍ଦୁଜା ସମୂହ କମ୍ପାନୀ ଇଣ୍ଡସଇଣ୍ଡ ଇଣ୍ଟରନ୍ୟାସନାଲ ହୋଲ୍ଡିଂସ ଲିମିଟେଡ(ଆଇଆଇଏଚଏଲ)ର ବୋଲିକୁ ସଶର୍ତ୍ତ ମଞ୍ଜୁରି ଦେଇଛନ୍ତି। ଏହି ମଞ୍ଜୁରୀ ମେ ୧୦ ତାରିଖ ଦିନ ମିଳିଥିଲା। ତେବେ କମ୍ପାନୀ ୧୧ ତାରିଖରେ ଏହାକୁ ସାର୍ବଜନିକ କରିଛି। ହେଲେ ଏବେବି ଏହି ମଞ୍ଜୁରୀ କିଛି ରେଗୁଲେସନ, ବୈଧାନିକ ଓ ନ୍ୟାୟିକ ମଞ୍ଜୁରୀ ନିୟମ ଅଧିନରେ ଅଛି।
ଆଇଆଇଏଚଏଲ ମୁଖପାତ୍ର କହିଛନ୍ତି ଯେ ଏହି ଅଧିଗ୍ରହଣକୁ ଯଥାଶୀଘ୍ର ଶେଷ କରିବାକୁ ଆମେ ପ୍ରସ୍ତୁତ ଅଛୁ। ଏଥି ପାଇଁ ଆମେ ଏନସିଏଲଟିଙ୍କ ନିର୍ଦ୍ଧାରିତ ତିଥି ମେ ୨୭ ସୁଦ୍ଧା ପୁରଣ କରିବାକୁ ଚାହୁଁଛୁ। ମୁଖପାତ୍ର କହିଛନ୍ତି ଯେ ଏହି ଅବସରରେ ଆମେ ନିୟାମକ ଓ ପ୍ରଶାସନ ସମେତ ସବୁ ହିତାଧିକାରୀଙ୍କୁ ସେମାନଙ୍କ ସମର୍ଥନ ନିମନ୍ତେ ଧନ୍ୟବାଦ ଜଣାଉଛୁ। ଏହା ପୂର୍ବରୁ ଆଇଆଇଏଚଏଲ ଅଧ୍ୟକ୍ଷ ଅଶୋକ ହିନ୍ଦୁଜା କହିଥିଲେ ଯେ ଏହି କାରବାର ଲାଗି ଆମେ ନଭେମ୍ବରରୁ ଆଇଆରଡିଏଙ୍କ ସମ୍ପର୍କରେ ଥିଲୁ।
ସେ କହିଛନ୍ତି ଯେ ଆଇଆରଡିଏଙ୍କ ମଞ୍ଜୁରୀର ୪୮ ଘଣ୍ଟା ମଧ୍ୟରେ ଆଇଆଇଏଚଏଲ ବୋଲି ବାବଦ ରାଶି ପୈଠ କରି କାରବାର ପୁରା କରିନେବୁ। ରିଲାଏନ୍ସ କ୍ୟାପିଟାଲର ୯,୬୫୦ କୋଟି କ୍ରୟ ପ୍ରକ୍ରିୟାକୁ ପୂରଣ କରିବା ପାଇଁ ଏନସିଏଲଟି ମେ ୨୭କୁ ସମୟ ସୀମା ଧାର୍ଯ୍ୟ କରିଛନ୍ତି। ହିନ୍ଦୁଜା ଗ୍ରୁପର ବିଜନେସ ଏବେ ୧୧ଟି ସେକ୍ଟରରେ ରହିଛି। ଯେଉଁଥିରେ ଅଶୋକ ଲେଲ୍ୟାଣ୍ଡ ଓ ଇଣ୍ଡସଇଣ୍ଡ ବ୍ୟାଙ୍କ ଭଳି ପ୍ରମୁଖ ନାମ ରହିଛି। ହିନ୍ଦୁଜା ଗ୍ରୁପ ସାରା ବିଶ୍ୱର ୧୦୦ଟି ଦେଶରେ ବିଜନେସ୍ ଅପରେଟ କରୁଛି।