ନୂଆଦିଲ୍ଲୀ: ରିଅଲ ଇଷ୍ଟେଟ୍ ଉଦ୍ୟୋଗକୁ ଗତ ପାଞ୍ଚ ବର୍ଷରେ ୩୨ ବିଲିୟନ ଡଲାରର ଇକ୍ୱିଟି କ୍ୟାପିଟାଲ ମିଳିଛି । ଆସନ୍ତା ଦୁଇ ବର୍ଷରେ ଏହି ଉଦ୍ୟୋଗକୁ ଆହୁରି ୧୨-୧୩ ବିଲିୟନ ଡଲାର ନିବେଶ ଆସିବାର ଅନୁମାନ କରାଯାଉଛି । ରିିଅଲ ଇଷ୍ଟେଟ୍ ପରାମର୍ଶ ଫାର୍ମ ସିବିଆରଇ ଏହି ଅନୁମାନ କରିଛି ।

ସିବିଆରଇ ନୂଆ ରିପୋର୍ଟରେ କହିଛି ଯେ ୨୦୨୩ ଏବଂ ୨୦୨୪ରେ ରିଅଲ ଇଷ୍ଟେଟ୍ ଉଦ୍ୟୋଗରେ ସବୁଠୁ ଅଧିକ ନିବେଶ କାର୍ଯ୍ୟାଳୟ ସ୍ଥଳକୁ ମିଳିବାର ସମ୍ଭାବନା ରହିଛି । ମୋଟ ନିବେଶରେ କାର୍ଯ୍ୟାଳୟ ପରେ ଶିଳ୍ପ ଏବଂ ଲଜିଷ୍ଟିକ୍ କ୍ଷେତ୍ର ଏବଂ ଭୂମିକୁ ମିଳିପାରେ । ଏହାଛଡ଼ା ଡାଟା କେନ୍ଦ୍ରକୁ ମଧ୍ୟ ବଡ଼ ନିବେଶ ମିଳିବାର ସମ୍ଭାବନା ରହିଛି ।

ସିବିଆରଇ ନିଜ ରିପୋର୍ଟରେ କହିଛି ଯେ ରିଅଲ ଇଷ୍ଟେଟ୍ କ୍ଷେତ୍ରରେ ଇକ୍ୱିଟି ପ୍ରବାହ ଆଗକୁ ମଧ୍ୟ ଜାରି ରହିବାର ସମ୍ଭାବନା ରହିଛି । ଆସନ୍ତା ଦୁଇ ବର୍ଷରେ ପ୍ରାୟ ୧୨-୧୩ ବିଲିୟନ ଡଲାର ନିବେଶର ସମ୍ଭାବନା ରହିଛି । ୨୦୨୪ ସୁଦ୍ଧା ରିଅଲ ଇଷ୍ଟେଟ୍ କ୍ଷେତ୍ରରେ ବାର୍ଷିକ ହାରାହାରି ୬-୭ ବିଲିୟନ ଡଲାରର ଇକ୍ୱିଟି ନିବେଶର ଅନୁମାନ ରହିଛି ।

ରିପୋର୍ଟ ଅନୁସାରେ ଭାରତରେ ରିଅଲ ଇଷ୍ଟେଟ୍ କ୍ଷେତ୍ରରେ ଇକ୍ୱିଟି ନିବେଶ ୨୦୧୮ରେ ୫.୯ ବିଲିୟନ ଡଲାର ରହିଥିଲା, ଯାହା ୨୦୧୯ରେ ବଢି ୬.୪ ବିଲିୟନ ଡଲାର ହୋଇଥିଲା । ୨୦୨୦ରେ ଏହା ଛଅ ବିଲିୟନ ଡଲାର, ୨୦୨୧ରେ ୫.୯ ବିଲିୟନ ଡଲାର ଏବଂ ୨୦୨୨ରେ ୭.୮ ବିଲିୟନ ରହିଥିଲା ।