ନୂଆଦିଲ୍ଲୀ: ଇଂଲଣ୍ଡ ବିପକ୍ଷ ଟେଷ୍ଟ ସିରିଜରେ ବ୍ୟାଟ୍ ସହିତ ଚମତ୍କାର ପ୍ରଦର୍ଶନ କରୁଛନ୍ତି ଭାରତୀୟ ଅଲରାଉଣ୍ଡର ରବିନ୍ଦ୍ର ଜାଡେଜା। ଜାଡେଜା ଲଗାତାର ୪ଟି ଅର୍ଦ୍ଧଶତକ ହାସଲ କରିଛନ୍ତି। ଏବେ ଜାଡେଜା ଟେଷ୍ଟ କ୍ରିକେଟରେ ଆଉ ଏକ ରେକର୍ଡ ସୃଷ୍ଟି କରିବାର ଅତି ନିକଟତର। ଯଦି ଜାଡେଜା ଚଳିତ ସିରିଜରେ ଆଉ ୫୮ ରନ କରନ୍ତି, ତେବେ ସେ ଇଂଲଣ୍ଡରେ ୬ ନମ୍ବର କିମ୍ବା ତା'ଠାରୁ ଲୋ ଅର୍ଡରରେ ବ୍ୟାଟିଂ କରି ୧୦୦୦ ଟେଷ୍ଟ ରନ ସ୍କୋର କରିବାରେ ଦ୍ୱିତୀୟ ବ୍ୟାଟର୍ ହେବେ।
ଏବେ ପର୍ଯ୍ୟନ୍ତ, କେବଳ ୱେଷ୍ଟଇଣ୍ଡିଜର ଗ୍ୟାରି ସୋବର୍ସ ଏହି ସଫଳତା ହାସଲ କରିପାରିଛନ୍ତି। ଇଂଲଣ୍ଡରେ ୬ ନମ୍ବର କିମ୍ବା ତା'ଠାରୁ ଲୋ ଅର୍ଡରରେ ବ୍ୟାଟିଂ କରି ଟେଷ୍ଟ କ୍ରିକେଟରେ ୧୦୯୭ ରନ କରିଥିଲେ। ରବିନ୍ଦ୍ର ଜାଡେଜା ବର୍ତ୍ତମାନ ପର୍ଯ୍ୟନ୍ତ ତିନୋଟି ମ୍ୟାଚରେ ୧୦୯ ଆଭରେଜ୍ରେ ୩୨୭ ରନ କରିଛନ୍ତି। ସୌରଭ ଗାଙ୍ଗୁଲି ଏବଂ ରିଷଭ ପନ୍ତଙ୍କ ପରେ ସେ ଇଂଲଣ୍ଡରେ କ୍ରମାଗତ ଚାରି ଇନିଂସରେ ୫୦ କିମ୍ବା ତା'ଠାରୁ ଅଧିକ ରନ ସ୍କୋର କରିବାରେ ତୃତୀୟ ଭାରତୀୟ ବ୍ୟାଟର୍।
ବାମହାତୀ ବ୍ୟାଟର୍ ରବିନ୍ଦ୍ର ଜାଡେଜା ଏପର୍ଯ୍ୟନ୍ତ ୮୩ଟି ଟେଷ୍ଟ ମ୍ୟାଚରେ ୩୬.୯୭ ହାରରେ ୩୬୯୭ ରନ କରିଛନ୍ତି। ଏହି ସମୟ ମଧ୍ୟରେ ତାଙ୍କ ବ୍ୟାଟରୁ ୪ଟି ଶତକ ଏବଂ ୨୬ଟି ଅର୍ଦ୍ଧଶତକ ଆସିଛି। ଜାଡେଜା ଟେଷ୍ଟ କ୍ରିକେଟରେ ତାଙ୍କର ବାମହାତୀ ସ୍ପିନ୍ ବୋଲିଂ ମଧ୍ୟ ଦେଖାଇଛନ୍ତି। ଜାଡେଜା ୨୪.୯୩ ହାରରେ ୩୨୬ ୱିକେଟ୍ ନେଇଛନ୍ତି।
ଲର୍ଡସ୍ ଟେଷ୍ଟ ମ୍ୟାଚର ଦ୍ୱିତୀୟ ଇନିଂସରେ ରବିନ୍ଦ୍ର ଜାଡେଜାଙ୍କ ବ୍ୟାଟିଂ ଶୈଳୀକୁ ପ୍ରଶଂସକ କେବେବି ଭୁଲିପାରିବ ନାହିଁ। ଜାଡେଜା ୧୮୧ ବଲରୁ ଅପରାଜିତ ୬୧ ରନ କରିଥିଲେ। ଜାଡେଜା, ଜସପ୍ରିତ ବୁମରାହ ଏବଂ ମହମ୍ମଦ ସିରାଜଙ୍କ ସହିତ ମିଶି ଭାରତୀୟ ଦଳକୁ ମ୍ୟାଚ୍ ଜିତିବା ପାଇଁ ସର୍ବୋତ୍ତମ ଚେଷ୍ଟା କରିଥିଲେ। ଜାଡେଜା ବୁମରାହଙ୍କ ସହିତ ମିଶି ନବମ ୱିକେଟ ପାଇଁ ୩୫ ରନ ଯୋଡିଥିଲେ। ତା'ପରେ ଦଶମ ୱିକେଟ ପାଇଁ ସିରାଜଙ୍କ ସହିତ ତାଙ୍କର ୨୩ ରନର ଭାଗୀଦାରି ହୋଇଥିଲା।
ଭାରତୀୟ ଦଳ ଲର୍ଡସ୍ ଟେଷ୍ଟ ମ୍ୟାଚ୍ ୨୨ ରନରେ ହାରିଥିଲା। ଏହି କାରଣରୁ ସେମାନେ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ୧-୨ରେ ପଛରେ ଅଛନ୍ତି। ସିରିଜର ପ୍ରଥମ ଟେଷ୍ଟ ଲିଡ୍ସର ହେଡିଙ୍ଗଲି କ୍ରିକେଟ୍ ଗ୍ରାଉଣ୍ଡରେ ଖେଳାଯାଇଥିଲା। ଯେଉଁଥିରେ ଭାରତୀୟ ଦଳକୁ ୫ ୱିକେଟରେ ପରାଜୟର ସାମ୍ନା କରିବାକୁ ପଡିଥିଲା। ତା'ପରେ ବର୍ମିଂହାମର ଏଜବାଷ୍ଟନ୍ ଗ୍ରାଉଣ୍ଡରେ ଖେଳାଯାଇଥିବା ଦ୍ୱିତୀୟ ଟେଷ୍ଟରେ ଟିମ୍ ଇଣ୍ଡିଆ ୩୩୬ ରନରେ ବିଜୟୀ ହୋଇଥିଲା। ସିରିଜର ଚତୁର୍ଥ ମ୍ୟାଚ୍ ୨୩ ଜୁଲାଇରୁ ମାଞ୍ଚେଷ୍ଟରର ଓଲ୍ଡ ଟ୍ରାଫୋର୍ଡରେ ଖେଳାଯିବାକୁ ଅଛି।
