ନୂଆଦିଲ୍ଲୀ: ନୀତି ଆୟୋଗର ଗଭର୍ଣ୍ଣିଂ କାଉନସିଲ ବୈଠକକୁ ବହିଷ୍କାର କରିଥିବା ମୁଖ୍ୟମନ୍ତ୍ରୀମାନଙ୍କୁ ନିଶାନା କରିଛି ବିଜେପି । ଏହାସହ ବିରୋଧୀଙ୍କ ଏହି ପଦକ୍ଷେପକୁ ଜନ-ବିରୋଧୀ ଏବଂ ଦାୟିତ୍ୱହୀନ ବୋଲି ବିଜେପି କହିଛି । ନୀତି ଆୟୋଗ ଗଭର୍ଣ୍ଣିଂ କାଉନସିଲର ଅଷ୍ଠମ ବୈଠକ ଶନିବାର ନୂଆଦିଲ୍ଲୀରେ ଆରମ୍ଭ ହୋଇଛି । ବୈଠକରେ ଦେଶକୁ ୨୦୪୭ ସୁଦ୍ଧା ବିକଶିତ ଦେଶ କରାଇବା ଉଦ୍ଦେଶ୍ୟରେ ସ୍ୱାସ୍ଥ୍ୟ, ଦକ୍ଷତା ବିକାଶ, ମହିଳା ସଶକ୍ତିକରଣ ଏବଂ ଭିତ୍ତିଭୂମିର ବିକାଶ ସହ ଅନେକ ପ୍ରସଙ୍ଗ ଉପରେ ଚର୍ଚ୍ଚା କରାଯିବ ।

ବିଜେପିର ବରିଷ୍ଠ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦ ଏକ ସାମ୍ୱାଦିକ ସମ୍ମିଳନୀରେ କହିଛନ୍ତି ଯେ ନୀତି ଆୟୋଗ ଦେଶର ବିକାଶ ପାଇଁ ଲକ୍ଷ୍ୟ ସ୍ଥିର କରିବା, ରୂପରେଖ ପ୍ରସ୍ତୁତ ତଥା ରୋଡମ୍ୟାପ୍ କରିବାରେ ଗୁରୁତ୍ୱପୂର୍ଣ୍ଣ ସଂସ୍ଥା ଅଟେ । ସେ କହିଛନ୍ତି ଯେ ନୀତି ଆୟୋଗର ଗଭର୍ଣ୍ଣିଂ କାଉନସିଲ ବୈଠକରେ ୧୦୦ଟି ପ୍ରସଙ୍ଗ ଉପରେ ଚର୍ଚ୍ଚାର ପ୍ରସ୍ତାବ କରିଛି । କିନ୍ତୁ ଆଠ ରାଜ୍ୟର ମୁଖ୍ୟମନ୍ତ୍ରୀ ଏଥିରେ ଯୋଗ ଦେଉ ନାହାନ୍ତି ।

ରବିଶଙ୍କର ପ୍ରସାଦ କହିଛନ୍ତି, ‘୧୦୦ଟି ପ୍ରସଙ୍ଗ ଉପରେ ଆଲୋଚନା ହେବାକୁଥିବା ବୈଠକକୁ ଏମାନେ କାହିଁକି ଆସୁନାହାନ୍ତି । ଏତେ ସଂଖ୍ୟାରେ ମୁଖ୍ୟମନ୍ତ୍ରୀ ସାମିଲ ନହୋଇ, ସେମାନେ ନିଜ ରାଜ୍ୟ ପାଇଁ ସ୍ୱର ଉଠାଉ ନାହାନ୍ତି । ବିଜେପି ନେତା କହିଛନ୍ତି ଯେ ଏହା ଦୁର୍ଭାଗ୍ୟପୂର୍ଣ୍ଣ, ଦାୟିତ୍ୱହୀନ ଏବଂ ଜନ ବିରୋଧୀ ଅଟେ । ସେ ପ୍ରଶ୍ନ କରିଛନ୍ତି, ‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୋଧ କରିବା ଆଳରେ କେଉଁ ପର୍ଯ୍ୟନ୍ତ ଯିବେ’।

ବିଜେପି ନେତା କହିଛନ୍ତି, ‘ମୋଦୀଙ୍କୁ ବିରୋଧ କରିବା ପାଇଁ ଆପଣଙ୍କୁ ଆହୁରି ସୁଯୋଗ ମିଳିବ, କିନ୍ତୁ ଆପଣଙ୍କ ରାଜ୍ୟବାସୀଙ୍କୁ କାହିଁକି କ୍ଷତି ପହଞ୍ଚାଉଛନ୍ତି’ ।  

ଏହି ଖବର ପଢନ୍ତୁ