ରେଭେନ୍ସା ବିଶ୍ୱବିଦ୍ୟାଳୟକୁ ଆଇଏସ୍ଓ-୧୭୦୨୫ ଓ ଏନଏବିଏଲ୍ ମାନ୍ୟତା, ପରୀକ୍ଷା ହେବ ଅକ୍ସିଜେନର ଶୁଦ୍ଧତା
13/07/2023 at 4:50 PM

କଟକ ୧୩।୭: ରେଭେନ୍ସା ବିଶ୍ୱବିଦ୍ୟାଳୟରେ ଅକ୍ସିଜେନର ଶୁଦ୍ଧତା ପରୀକ୍ଷା କରାଯାଇ ପାରିବ । ରାଜ୍ୟର ପ୍ରଥମ ଥର ପାଇଁ ଏ ପ୍ରକାର ସୌଭାଗ୍ୟ ଅର୍ଜନ କରିଛି ରେଭେନ୍ସା । ଭାରତ ସରକାରଙ୍କ NABL ବା ନେସନାଲ ଆକ୍ରିଡେସନ ବୋର୍ଡ଼ ଫର ଟେସଟିଙ୍ଗ ଆଣ୍ଡ କାଲିବ୍ରେସନ ଲାବ୍ରୋଟୋରି ପକ୍ଷରୁ ମାନ୍ୟତା ପାଇଛି ରେଭେନ୍ସା ବିଶ୍ୱବିଦ୍ୟାଳୟ । ଆଉ ଚଳିତ ବର୍ଷ ଜୁନ ମାସରେ ହାତେଇଛି ISO 17025 ସାର୍ଟିଫିକେଟ । ରସାୟନ ବିଜ୍ଞାନ ବିଭାଗରେ ଏହାର ଲାବ୍ରୋଟୋରି କାର୍ଯ୍ୟ ଆରମ୍ଭ କରିଛି । ରୋଗୀ ସେବା କ୍ଷେତ୍ରରେ ବ୍ୟବହାର କରାଯାଉଥିବା ଅକ୍ସିଜେନର ଶୁଦ୍ଧତାକୁ ଏହି ଲାବ୍ରୋଟୋରିରେ ପରୀକ୍ଷା କରାଯାଇ ସାର୍ଟିଫିକେଟ ହାସଲ କରିପାରିବେ ବିଭିନ୍ନ ସରକାରୀ ଓ ଘରୋଇ ମେଡିକାଲ ।
କେବଳ ମେଡିକାଲ ନୁହେଁ ବରଂ ଅକ୍ସିଜେନ ପ୍ରସ୍ତୁତ କରୁଥିବା ସଂସ୍ଥାଗୁଡିକ ମଧ୍ୟ ରେଭେନ୍ସାରେ ଅକ୍ସିଜେନର ଶୁଦ୍ଧତା ପରୀକ୍ଷା କରି NABL ଟେସଟିଙ୍ଗ ସାର୍ଟିଫିକେଟ ପାଇ ପାରିବେ । ବିଶେଷ କରି କରୋନା ମହାମାରୀ ସମୟରେ ଅକ୍ସିଜେନର କେତେ ଗୁରୁତ୍ୱ ଥିଲା ତାହାକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି । ତେଣୁ କଟକ ସମେତ ରାଜ୍ୟର ବିଭିନ୍ନ ମେଡିକାଲ ଗୁଡିକରେ ବ୍ୟବହୃତ ହେଉଥିବା ଅକ୍ସିଜେନ ସିଲିଣ୍ଡର ଗୁଡିକର ମାନ ଓ ଶୁଦ୍ଧତା ଏଣିକି ରେଭେନ୍ସା ବିଶ୍ୱବିଦ୍ୟାଳୟ ପରୀକ୍ଷା କରାଇ ପାରିବେ ବୋଲି ରସାୟନ ବିଜ୍ଞାନ ବିଭଗର ବିଭାଗୀୟ ମୁଖ୍ୟ କହିଛନ୍ତି ।
ଭାରତ ସରକାରଙ୍କ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ବିଭାଗ ପକ୍ଷରୁ ପ୍ରଦାନ କରାଯାଇଥିବା ୫୫ ଲକ୍ଷ ଟଙ୍କା ବ୍ୟୟରେ ରେଭେନ୍ସାରେ ସ୍ଥାପନ କରାଯାଇଛି GC ଆଣ୍ଡ GC-MS ଲାବ୍ରୋଟୋରି । ସାଧାରଣତଃ ଗୋଟିଏ ଅକ୍ସିଜେନ ସିଲିଣ୍ଡରରେ ୯୬ ପ୍ରତିଶତ ଅକ୍ସିଜେନ ସହ ସର୍ବାଧିକ 5 PPM ତଳକୁ କାର୍ବନ ମନକ୍ସସାଇଡ ଏବଂ ସର୍ବାଧିକ 300 PPM ତଳକୁ କାର୍ବନ ଡାଇଅକ୍ସାଇଡ ରହିବା ଆବଶ୍ୟକ । ଏସବୁକୁ ଜାଣିବା ପାଇଁ ପ୍ରଥମେ ହାଇଡ୍ରୋଜେନ ଓ ଅକ୍ସିଜେନକୁ ମଏଶ୍ଚର ଟ୍ରାପ ଓ ଅକ୍ସିଜେନ ଟ୍ରାପ ଦେଇ, GC ମେସିନ ସାହାଯ୍ୟରେ ସିଲିଣ୍ଡରରେ ଥିବା ଲିକ୍ୟୁଇଡ଼ ଅକ୍ସିଜେନରେ କେତେ ମାତ୍ରାରେ କେଉଁ ଗ୍ୟାସ ଅଛି ତାକୁ କମ୍ପ୍ୟୁଟର ପ୍ରୋଗ୍ରାମିଂ ଦ୍ୱାରା ଅଲଗା ଅଲଗା କରି ଅକ୍ସିଜେନର ଶୁଦ୍ଧତାକୁ ମପା ଯାଇଥାଏ ।
ତେବେ ଏହି ପରୀକ୍ଷା ପାଇଁ ଗୋଟେ ଦିନରୁ ଦୁଇ ଦିନ ସମୟ ଲାଗିଥାଏ ବୋଲି ରସାୟନିକ ବିଭାଗର ଆସୋସିଏଟ ପ୍ରଫେସର କହିଛନ୍ତି । ରେଭେନ୍ସା ରସାୟନ ବିଜ୍ଞାନ ବିଭଗରେ ଅଧ୍ୟୟନ କରୁଥିବା ପିଜି ଓ ପିଏଚଡି ଛାତ୍ରଛାତ୍ରୀ ଏଠାରେ ଶିକ୍ଷାଲାଭ କରିବା ସହ ତାଲିମ ବି ନେଇପାରିବେ ।
You Can Read :