ଭୋଗରାଇ ୧୭/୦୨: ଦୀଘା ମୁହାଁଣ ଆନ୍ତର୍ଜାତିକ ମତ୍ସ୍ୟ ଅବତରଣ କେନ୍ଦ୍ରରେ ୨କୁଇଣ୍ଟାଲ ଓଜନର ଏକ ବିରଳ ସାମୁଦ୍ରିକ କଉ ମାଛ ଦେଖିବାକୁ ମିଳିଛି । ଦୀଘା ସଂଲଗ୍ନ ସମୁଦ୍ରରୁ ଏକ ଟ୍ରଲରର ମତ୍ସ୍ୟଜୀବୀ ମାନେ ଏହି ମାଛଟିକୁ ଜାଲରେ ଧରିବା ପରେ ବିକ୍ରି ପାଇଁ ଏଠାକୁ ଆଣିଥିଲେ ।
ପଶ୍ଚିମବଙ୍ଗ କୋଲକାତାର ବସିରହାଟ ଅଞ୍ଚଳର ଏହି ମାଛ ବ୍ୟବସାୟୀ ୩୮ ହଜାର ଟଙ୍କା ନିଲାମରେ ଏହି ବିରାଟ କାୟ ମାଛଟିକୁ କିଣି ନେଇଥିବା ଜଣାପଡିଛି । ଏହି ବିରଳ ମାଛକୁ ଦେଖିବା ପାଇଁ ସେଠାରେ ପ୍ରବଳ ଜନଗହଳି ଲାଗିଥିଲା ।
ସୂଚନାଥାଉକି, ଗତ ୨୦୨୧ ଜୁଲାଇ ୨୮ ତାରିଖରେ ଏଠାରେ ଏଭଳି ଏକ ସାମୁଦ୍ରିକ କଉ ମାଛ ଦେଖିବାକୁ ମିଳିଥିଲା । ପାରାଦ୍ୱୀପ ନିକଟସ୍ଥ ସମୁଦ୍ରରୁ ଧରା ହୋଇ ଦୀଘା ମୋହନା ଆନ୍ତର୍ଜାତିକ ମତ୍ସ୍ୟ ଅବତରଣ କେନ୍ଦ୍ରକୁ ବିକ୍ରି ହେବା ପାଇଁ ଆସିଥିଲା । ସେତେବେଳେ ଏହା ୩୫ ହଜାର ଟଙ୍କାରେ ବିକ୍ରି ହୋଇଥିଲା ବେଳେ ଆଜିର ଏହି ସାମୁଦ୍ରିକ କଉ ମାଛଟି ୩୮ ହଜାର ଟଙ୍କାରେ ବିକ୍ରି ହୋଇଥିବା ସୂଚନା ମିଳିଛି ।
ବଙ୍ଗଳା ଭାଷାରେ ଏହାକୁ ‘ଭଲା କଉ’, ଓଡ଼ିଆ ଭାଷାରେ ‘ଦରିଆ ଭେକଟି’ ଓ ଇଂରାଜୀ ଭାଷାରେ ‘ରିକୋଟ’ ମାଛ ବୋଲି କୁହାଯାଏ । ଦୀଘା ସଂଲଗ୍ନ ସମୁଦ୍ରରେ ବିପୁଳ ପରିମାଣର ବିରଳ ମୂଲ୍ୟବାନ ମାଛ ଜାଲରେ ଧରା ହେଉଥିଲା ବେଳେ ବିଦେଶରେ ଏପ୍ରକାର ବିରଳ ସାମୁଦ୍ରିକ କଉ ମାଛର ଚାହିଦା ଅଧିକ ରହିଛି ବୋଲି ସ୍ଥାନୀୟ ମତ୍ସ୍ୟଜୀବୀ ମାନେ ସୂଚନା ଦେଇଛନ୍ତି ।
