ମୁମ୍ଵାଇ ୦୯।୦୬: ବର୍ତ୍ତମାନ କ୍ରିତି ସାନନ୍ ଏବଂ ପ୍ରଭାସଙ୍କ ଫିଲ୍ମ ‘ଆଦିପୁରୁଷ’ ସବୁଆଡେ ଚର୍ଚ୍ଚା ହେଉଛି। ଏହି ସମୟ ମଧ୍ୟରେ ଖବର ଆସୁଛି ଯେ ନୀତେଶ ତିୱାରୀ ମଧ୍ୟ ‘ରାମାୟଣ’ ନିର୍ମାଣ କରିବା ପାଇଁ ପ୍ରସ୍ତୁତି ଆରମ୍ଭ କରିଛନ୍ତି। ଏହି ଫିଲ୍ମଟି ଦୀର୍ଘ ସମୟ ଧରି ଆଲୋଚନାରେ ଥିଲା । ଏଥି ସହିତ ଫିଲ୍ମର ସୁଟିଂ ଚଳିତ ବର୍ଷ ଡିସେମ୍ବରରେ ଆରମ୍ଭ ହେବ ବୋଲି କୁହାଯାଉଛି। ବଡ ଅପଡେଟ୍ ହେଉଛି ଆଲିଆ ଭଟ୍ଟ ଏବଂ ରଣବୀର କପୁରଙ୍କ ଯୋଡି ଏକାଠି ‘ରାମାୟଣ’ରେ ନଜର ଆସିବେ।

ରିପୋର୍ଟ ଅନୁଯାୟୀ, ନୀତେଶ ତିୱାରୀଙ୍କ ‘ରାମାୟଣ’ ପାଇଁ ଆଲିଆ ଏବଂ ରଣବୀରଙ୍କୁ ଫାଇନାଲ କରାଯାଇଛି। ଏହି ଚଳଚ୍ଚିତ୍ରରେ ଆଲିଆ ମାତା ସୀତା ଭୂମିକାରେ ଥିବା ବେଳେ ରଣବୀର ପ୍ରଭୁ ରାମ ଭୂମିକାରେ ନଜର ଆସିବେ। ନିକଟରେ ଆଲିଆ ଏବଂ ନିର୍ଦ୍ଦେଶକ ନୀତେଶଙ୍କୁ ଏକାଠି ଦେଖିବାକୁ ମିଳିଥିଲା। ଉଭୟଙ୍କ ଭିଡିଓ ମଧ୍ୟ ଖୁବ୍‌ ଭାଇରାଲ ହୋଇଥିଲା। ତେବେ ଏପର୍ଯ୍ୟନ୍ତ ‘ରାମାୟଣ’ ସମ୍ପର୍କରେ କୌଣସି ଅଫିସିଆଲ କନଫର୍ମ କରାଯାଇ ନାହିଁ।

ରିପୋର୍ଟରେ କୁହାଯାଇଛି ଯେ ଗତ କିଛି ଦିନ ହେବ ରଣବୀର କପୁରଙ୍କୁ DNEG କାର୍ଯ୍ୟାଳୟରେ ଦେଖିବାକୁ ମିଳିଥିଲା। ଅଭିନେତା ଦେଖିବାକୁ ଆସୁଛନ୍ତି ଯେ ‘ରାମାୟଣ’ର କାମ କେତେ ଦୂର ପହଞ୍ଚିଛି। ଫିଲ୍ମର ପ୍ରି-ଭିଜୁଆଲାଇଜେସନ୍ ମଧ୍ୟ କରାଯାଇଛି । ନିର୍ମାତା ପ୍ରଭୁ ରାମଙ୍କ ଭୂମିକା ପାଇଁ ରଣବୀରଙ୍କ ଲୁକ୍ ଟେଷ୍ଟ ନେବା ଆରମ୍ଭ କରିଛନ୍ତି। ଏହି କାରଣରୁ ଅଭିନେତା ବାରମ୍ବାର ଷ୍ଟୁଡିଓକୁ ଆସୁଛନ୍ତି । ସଠିକ୍ ଲୁକ୍‌ ପାଇବା ପରେ ରଣବୀର ନିଜ ଶରୀରର ପରିବର୍ତ୍ତନ କରିବେ । ରାମ ଏବଂ ସୀତାଙ୍କ ପରେ ୟଶ ଏହି ଚଳଚ୍ଚିତ୍ରରେ ରାବଣ ଭୂମିକାରେ ଅଭିନୟ କରିବେ। ଚଳିତ ବର୍ଷ ଦିୱାଲୀରେ ଆଲିଆ, ରଣବୀର ଏବଂ ୟଶ ଷ୍ଟାରର ଫିଲ୍ମ ଘୋଷଣା କରାଯାଇପାରେ।