ଜାମ୍ମୁ: ଜାମ୍ମୁ କାଶ୍ମୀରେ ସୁରକ୍ଷାକର୍ମୀଙ୍କୁ ଏକ ବଡ଼ ସଫଳତା ମିଳିଛି । ଜାମ୍ମୁ ସମ୍ଭାଗର ରାମବନରେ ଅଗଷ୍ଟ ୨ରେ ହୋଇଥିବା ଆକ୍ରମଣ ଘଟଣାରେ ଜଣେ ଆତଙ୍କୀକୁ ଗିରଫ କରାଯାଇଛି । ସୁରକ୍ଷାକର୍ମୀଙ୍କ ପଚରାଉଚରାରେ ଗିରଫ ଆତଙ୍କୀ ନିଜର ଅପରାଧ ସ୍ୱୀକାର କରିସାରିଛି । ଗିରଫ ଆତଙ୍କୀ ଲସ୍କର-ଏ-ତୋଏବାର ତାଲିବ ହୁସେନ ସହ ସାମିଲ ଥିବା ଜଣାପଡିଛି ।
ଏସଏସପି ରାମବନ କହିଛନ୍ତି, ଗୁଲ ସ୍ଥିତ ପୋଲିସ ପୋଷ୍ଟ ଉପରେ ଗ୍ରେନେଡ ମାଡ କରାଯାଇଥିଲା । ଏହି ଆକ୍ରମଣରେ ଦୁଇ ଜଣ ପୋଲିସକର୍ମୀ ଆହତ ହୋଇଥିଲେ । ଆକ୍ରମଣ ପରେ ଅନ୍ଧାରର ସାହାଯ୍ୟ ନେଇ ସେଠାରୁ ଫେରାର ହୋଇଯାଇଥିଲେ । ଏହି ଆକ୍ରମଣ ପାଇଁ ଜେକେସିଏଫ ନିଜକୁ ଦାୟୀ କରିଥିଲା ।
ଏସଏସପି କହିଛନ୍ତି, ଆକ୍ରମଣରେ ଜଡିତ ଜଣେ ଆତଙ୍କୀକୁ ଗିରଫ କରାଯିବା ପରେ ଜେରା କରାଯାଇଥିଲା । ପଚରାଉଚରା ପରେ ଅନ୍ୟ ଜଣେ ଆତଙ୍କୀକୁ ମଧ୍ୟ ଗିରଫ କରାଯାଇଛି । ସେମାନଙ୍କ ନିକଟରୁ ଦୁଇଟି ମୋବାଇଲ ଏବଂ ୫୦ ହଜାର ଟଙ୍କା ଜବତ କରାଯାଇଛି । ମାମଲାରେ ଅନ୍ୟମାନଙ୍କ ଗିରଫଦାରୀ ବାକି ଥିବା ସେ କହିଛନ୍ତି ।
