ବାଲେଶ୍ବର (ବ୍ରହ୍ମ ରଥ) ୧୫|୬: ଗଣ ପର୍ବ ରଜ ପାଇଁ ଦୁଲୁକୁଛି ପୁରପଲ୍ଲୀ । ବାଲେଶ୍ବର ଟାଉନ ହଲ୍ ପରିସରରେ ଧୁମଧାମରେ ପାଳିତ ହୋଇଛି ରଜ । ଏହି ଅବସରରେ ବିଭିନ୍ନ ପ୍ରତିଯୋଗିତା ଆୟୋଜନ କରାଯାଇଥିଲା ।

ଆସିଛି ରଜ । ସମସ୍ତେ ଯେମିତି ଏଇ ମଉକାକୁ ଟିକିଏ ଚାହିଁରହିଥିଲେ । ସେଥିପାଇଁ ତ ମଉଜ ମଜଲିସ୍ ରେ ମାତିଯାଇଛନ୍ତି ସମସ୍ତେ । ବାଲେଶ୍ବର ଟାଉନ ହଲ୍ ପରିସରର ଦୃଶ୍ୟ କିଛି ନିଆରା । ସଜବାଜ ହେଇ ସୁସଜ୍ଜିତ ଦୋଳି ଖେଳରେ ଝୁଲୁଛନ୍ତି ଝିଅ ବୋହୂ । ଆଉ ଏହାସହ ଚାଲିଛି ପୁଚି ଖେଳ । ଏଭଳି ବିଭିନ୍ନ ପ୍ରତିଯୋଗିତା ଆୟୋଜନ ହୋଇଥିଲା । ୩ ଶହରୁ ଅଧିକ ପ୍ରତିଯୋଗୀ ଏଥିରେ ସାମିଲ ହୋଇଥିଲେ ।

ମଞ୍ଚ ଉପରେ ବିଭିନ୍ନ ପ୍ରକାର ଫଳ ସବୁ ସଜା ହୋଇ ରଖାଯାଇଛି । ଆମ୍ବ, ପଣସ, ସପୁରୀ ଆଦି ଟୋକେଇରେ ଥୁଆ ହୋଇଛି । ସେପଟେ ଅତିଥିମାନଙ୍କୁ ଆରିସା, କାକରା, ଖଜୁରୀ କୋଳି ଆଦି ପରସା ଯାଇଥିଲା । ସବୁ ଭିତରେ ରଜ ପାନକୁ ଭୁଲି ନଥିଲେ କେହି । ସଜବାଜ, ପୁଚି ଖେଳ, ଲୁଡୁ ଖେଳ ଆଦି ପ୍ରତିଯୋଗିତାର ବେଶ ମଜା ଉଠାଇଥିଲେ ଦର୍ଶକ ।

ଚଳିତ ବର୍ଷ ଦ୍ବିତୀୟ ଥର ପାଇଁ ବାଲେଶ୍ବର ଟାଉନ ହଲ୍ ପରିସରରେ  ଆୟୋଜିତ ହେଉଛି ରଜ ପର୍ବ । ପରମ୍ପରା ଦିନକୁ ଦିନ ହଜିଯାଉଥିବାବେଳେ, ଆୟୋଜକଙ୍କ ଏ ପ୍ରକାର ଉଦ୍ୟମ ସତରେ ବେଶ୍ ପ୍ରଶଂସନୀୟ ।