ରାଜ୍ୟରେ ଶୁକ୍ରବାରଠୁ କମିବ, ୧୮ ପରେ ବଢିବ ବର୍ଷା ପରିମାଣ

Published By : Prameya-News7 Bureau | September 15, 2023 IST

ଭୁବନେଶ୍ୱର ୧୫/୦୯: ଢାଳିଲା ନିର୍ଧୁମ ବର୍ଷା । ଦକ୍ଷିଣ ଓ ପଶ୍ଚିମ ଓଡ଼ିଶାରେ ସ୍ଥିତି ବେହାଲ୍‌ କରିଦେଇଛି । ଲଗାଣ ବର୍ଷା ଯୋଗୁ ଏବେ ସୁଦ୍ଧା କାନ୍ଥ ଭୁଶୁଡ଼ି ୩ ଜଣଙ୍କ ମୃତ୍ୟୁ ହୋଇଛି । ମାଛ ଧରିବାକୁ ଯାଇ ପାଣିରେ ଭାସିଯିବାରୁ ଜଣକର ମୃତ୍ୟୁ ହୋଇଥିବାବେଳେ ଜଣେ ଉଦ୍ଧାର ଓ ଜଣେ ନିଖୋଜ ଅଛନ୍ତି । ୫ ଜିଲ୍ଲାର ୨୧ଟି ବ୍ଲକ ଅନ୍ତର୍ଗତ ୩୯ଟି ପଞ୍ଚାୟତ ୧୫୫ ଗାଁର ୧୧,୨୬୬ ଲୋକେ ପ୍ରଭାବିତ ହୋଇଛନ୍ତି ।

ବର୍ଷା ମାଡ଼ରେ ୧୫୨ଟି ଘର ନଷ୍ଟ ହୋଇଛି । ପ୍ରବଳ ବର୍ଷା ଯୋଗୁ ବଂଶଧାରା ଫୁଲି ବିପଦ ସଙ୍କେତ ଟପିଛି । ମହାନଦୀ ଉପର ମୁଣ୍ଡରେ ବି ପ୍ରବଳ ବର୍ଷା ଲାଗି ରହିଛି । ହେଲେ ଜଳ ସମ୍ପଦ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି- ରାଜ୍ୟରେ ବନ୍ୟା ଆସିଲା ଭଳି ସ୍ଥିତି ନାହିଁ । ଉପରମୁଣ୍ଡରେ ବର୍ଷା ବଢ଼ିଥିଲେ ବି ତଳମୁଣ୍ଡ ଶୁଖିଲା ପଡ଼ିଛି । ଯେତିକି ପାଣି ଆସୁଛି, ସେଥିରେ ବି ବନ୍ୟା ସମ୍ଭାବନା କମ୍‌ ।

ଆଉ ଏକ ଆଶ୍ୱସ୍ତି ଭରା ଖବର ହେଲା- ଶୁକ୍ରବାରଠାରୁ ବର୍ଷା ପରିମାଣ କମିବ । ଶନିବାର, ରବିବାର (୧୬ ଓ ୧୭ ତାରିଖ) ବର୍ଷା ବିଶେଷ ନାହିଁ । ତେବେ ୧୮/୧୯ରୁ ରାଜ୍ୟରେ ପୁଣି ବର୍ଷା ବଢ଼ିପାରେ । ଏକ ଘୂର୍ଣ୍ଣିବଳୟ ସମ୍ଭାବନା ଥିବାରୁ ବର୍ଷା ବଢ଼ିବ ବୋଲି ଅନୁମାନ କରାଯାଉଛି । ଗତ ୨୪ ଘଣ୍ଟାରେ ରାଜ୍ୟରେ ପ୍ରବଳ ବର୍ଷା ହୋଇଛି । ୨୩ଟି ବ୍ଲକରେ ୧୦୦ ମିଲିମିଟରରୁ ଅଧିକ ବର୍ଷା ରେକର୍ଡ ହୋଇଛି ଆଜି ସକାଳ ସାଢ଼େ ୮ଟା ସୁଦ୍ଧା ।

ବଲାଙ୍ଗିର ବ୍ଲକରେ ୨୪ ଘଣ୍ଟା ଭିତରେ (ସକାଳ ୮ଟା ୩୦ ସୁଦ୍ଧା) ୨୧୫ ମିଲିମିଟର ବର୍ଷା ହୋଇଛି । ଗୁରୁବାର ଦିନ ତମାମ ବି ବର୍ଷା ଛାଡ଼ିନି ବଲାଙ୍ଗିରରେ । ସକାଳୁ ସନ୍ଧ୍ୟା ଭିତରେ ଆହୁରି ୧୦୮ ମିମି ବର୍ଷା ଢାଳିଛି । ବଲାଙ୍ଗିର ସହରରେ ସ୍ଥିତି ସାଂଘାତିକ ହୋଇଥିବାବେଳେ ଦକ୍ଷିଣ ଓଡ଼ିଶାରେ ବି କଲବଲ କରିଛି ଲଗାଣ ବର୍ଷା । ଲଗାଣ ବର୍ଷା ଯୋଗୁ କାନ୍ଥ ପଡ଼ିବାରୁ ୩ଜଣ ପ୍ରାଣ ହରାଇଛନ୍ତି ।

କଳାହାଣ୍ଡି ଜିଲ୍ଲା ବିଶ୍ୱନାଥପୁରରେ କାନ୍ଥ ପଡ଼ିବାରୁ ଜଣେ ପ୍ରାଣ ହରାଇଛନ୍ତି । କଳାହାଣ୍ଡି ଜିଲ୍ଲାରେ ଆଉ ଏକ ସ୍ଥାନରେ ବି କାନ୍ଥ ପଡ଼ିବାରୁ ଜଣକର ମୃତ୍ୟୁ ହୋଇଥିବା ଜଣାପଡ଼ିଛି । ସେହିପରି ଢେଙ୍କାନାଳ ଜିଲ୍ଲା ଭୁବନର ଗରୁଡ଼ିବନ୍ଧରେ କାନ୍ଥ ପଡ଼ିବାରୁ ୫ ବର୍ଷର ଶିଶୁଙ୍କ ଜୀବନ ଯାଇଛି । ନଦୀକୁ ମାଛ ଧରିବାକୁ ଯାଇ ବଲାଙ୍ଗିର ଆଗଲପୁର ବ୍ଲକର ପିପିଲିପାଲି ଗାଁର ୩ଜଣ ଭାସି ଯାଇଥିଲେ । ସେଥିରୁ ଜଣଙ୍କର ମୃତଦେହ ମିଳିଛି । ଅନ୍ୟ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି । ଆଉ ଜଣେ ସନ୍ଧ୍ୟା ପର୍ଯ୍ୟନ୍ତ ନିଖୋଜ ଥିଲେ ।

କଳାହାଣ୍ଡି ଜିଲ୍ଲା ମଦନପୁର ରାମପୁର ଥାନା ଅର୍ନ୍ତଗତ କାଜିବାହାଲି ରାସ୍ତାରେ ତେନ୍ତୁଳି ଗଛ ପଡ଼ିବାରୁ ଜଣେ ବାଇକ ଆରୋହୀ ଗୁରୁତର ଆହତ ହୋଇଛନ୍ତି । ଢେଙ୍କାନାଳ ଜିଲ୍ଲା କାମାକ୍ଷାନଗରର ରାମିଆଳରେ ନଦୀର ପ୍ରଖର ସୁଅରେ ଭାସି ଯାଇଥିବା ଜଣେ ଯୁବକଙ୍କୁ ଉଦ୍ଧାର କରାଯାଇଛି । ସେହିପରି ତେଲ ନଦୀରେ ଭାସି ଯାଉଥିବା ମନମୁଣ୍ଡା ପଞ୍ଚାୟତ ସରସ୍ୱତୀପୁର ଗାଁର ଜଣେ ମହିଳାଙ୍କୁ ଉଦ୍ଧାର କରାଯାଇଛି ।

you can also read...

wp:embed {"url":"https://www.prameyanews7.com/next-2-day-heavy-rain-fall-in-odisha-2/","type":"wp-embed","providerNameSlug":"prameya-news-7"}
https://www.prameyanews7.com/next-2-day-heavy-rain-fall-in-odisha-2/
/wp:embed

News7 Is Now On WhatsApp Join And Get Latest News Updates Delivered To You Via WhatsApp

Rath Yatra

Copyright © 2024 - Summa Real Media Private Limited. All Rights Reserved.