ଭୁବନେଶ୍ୱର ୧୧/୦୮: ବର୍ଷା ଗାଏବ, ଚିନ୍ତାରେ ଚାଷୀ । ଅଗଷ୍ଟ ମାସର ପ୍ରଥମ ସପ୍ତାହରେ ବର୍ଷା ବିତ୍ପାତ ଓ ବନ୍ୟା ଡ଼ର ପରେ ଏବେ ହଜି ଯାଇଛି ବର୍ଷା । ବଦଳରେ ଟାଏଁ ଟାଏଁ ଖରା । ଚାଷୀ ଚିନ୍ତା ବଢିଲାଣି । ଆଇ ଦୁଇ ଚାରି ଦିନ ଏମିତି ଖରା ହେଲେ ତଳି ଝାଉଁଳିଯିବ । ପାଣିପାଗ ପୂର୍ବାନୁମାନ କହୁଛି ଏବେ ସେମିତି ବିଶେଷ ବର୍ଷା ନାହିଁ ।

ମୌସୁମୀ ସକ୍ରିୟ କରାଉଥିବା ନିମ୍ନ ଚାପରେଖା ଉତ୍ତରକୁ ଘୁଞ୍ଚି ଯାଇଛି । ପୁଣି ତଳକୁ ଖସିଲେ ଓଡିଶାରେ ବର୍ଷା ହେବ । ଆସନ୍ତା ୧୭ କିମ୍ବା ୧୮ତାରିଖ ବେଳକୁ ପଶ୍ଚିମବଙ୍ଗ ଓ ବାଲେଶ୍ବର ଉପକୂଳ ବଙ୍ଗେପସାଗରରେ ଘୂର୍ଣ୍ଣିବଳୟ ସୃଷ୍ଟି ହୋଇପାରେ । ଏହାର ପ୍ରଭାବରେ ଓଡ଼ିଶାରେ ମଧ୍ୟମ ଧରଣର ବର୍ଷା ହୋଇପାରେ ।

ପୁଣି ୨୩ କିମ୍ବା ୨୪ ତାରିଖ ବେଳକୁ ଆଉ ଏକ ଘୂର୍ଣ୍ଣିବଳୟ ଦାନା ବାନ୍ଧିବା ଲକ୍ଷଣ ଦେଖାଯାଉଛି । ତାପୂର୍ବରୁ ଆସନ୍ତାକାଲିଠାରୁ ୨ଦିନ ଉତ୍ତର ଓଡିଶାର କିଛି ଅଞ୍ଚଳରେ ବର୍ଷା ହୋଇପାରେ । ଶନିବାର ବେଳକୁ ଉତ୍ତର ଓଡ଼ିଶାରେ କିଛି ବର୍ଷା ଅଛି ବୋଲି କୃଷି ପାଣିପାଗ ବିଶେଷଜ୍ଞ ଡକ୍ଟର ସୁରେନ୍ଦ୍ରନାଥ ପଶୁପାଳକ କହିଛନ୍ତି ।

ବାଲେଶ୍ୱର, ଭଦ୍ରକ, ମୟୂରଭଞ୍ଜ, କେନ୍ଦୁଝର ଓ ସୁନ୍ଦରଗଡ଼ରେ ଭଲ ବର୍ଷା ହୋଇପାରେ । ଉପକୂଳ ଓଡ଼ିଶାରେ ବି ସାମାନ୍ୟ ବର୍ଷା ହେବ ।ଡକ୍ଟର ପଶୁପାଳକ କହିଛନ୍ତି, ଅଧିକାଂଶ ଜିଲ୍ଲାଗୁଡ଼ିକରେ ଚାଷ ପାଇଁ ଚିନ୍ତାଜନକ ସ୍ଥିତି ସୃଷ୍ଟି ହୋଇଛି । ଟାଏଁ ଟାଏଁ ଖରା ଯୋଗୁ ବାଷ୍ପୀକରଣ (ଇଭାପୋରେସନ୍‌) ହାର ଏତେ ଯେ ଜମି ଶୁଖିଗଲାଣି । ଯେଉଁଠି ଧାନ ରୁଆ କାମ ସରିଛି, ୭ ଦିନ ଯାଏଁ ପାଣି ଦରକାର । ଗତ ତିନି ଚାରି ଦିନର ଖରା ସବୁ ଶୋଷି ନେଇଛି ।

ବିଶେଷକରି ଗଞ୍ଜାମ, ନବରଙ୍ଗପୁର, କେନ୍ଦ୍ରାପଡ଼ା ଓ ପୁରୀ ସ୍ଥିତି ଖରାପ । ୨୦ରୁ ଏସବୁ ଅଞ୍ଚଳରେ ୪୨ ପ୍ରତିଶତ ଯାଏ ସ୍ୱଳ୍ପ ବର୍ଷା ହୋଇଛି । ଆଗକୁ ବର୍ଷା ନ ହେଲେ ଚାଷ ବିଗିଡ଼ିଯିବ । ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପୂର୍ବାନୁମାନ ଦେଇଛି, ଶୁକ୍ରବାର ଉତ୍ତର, ପଶ୍ଚିମ ଓଡ଼ିଶାର କେତେକ ସ୍ଥାନରେ ଘଡ଼ଘଡ଼ି ସହ ବର୍ଷା ହୋଇପାରେ । ୧୩ ତାରିଖ ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଯାଜପୁର, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତି ଜିଲ୍ଲାରେ ଠାଏ ଠାଏ ଘଡ଼ଘଡ଼ି ସହ ବର୍ଷା ସମ୍ଭାବନା ରହିଛି ।

you can also read…