ଭୁବନେଶ୍ୱର ୧୬।୦୯ : ୧୮ ତାରିଖରେ ରାଜ୍ୟରେ ଘୂର୍ଣ୍ଣିବଳୟ ସୃଷ୍ଟି ହୋଇପାରେ । ଏହା ପ୍ରଭାବରେ ରାଜ୍ୟରେ ପୁଣି ଭଲ ବର୍ଷା ହେବ । ଅଧିକାଂଶ ସ୍ଥାନରେ ମଧ୍ୟମ ଧରଣର ବର୍ଷା ହୋଇପାରେ । ୧୯ ଓ ୨୦ ତାରିଖରେ କିଛି ସ୍ଥାନରେ ଭାରୀ ବର୍ଷା ସମ୍ଭାବନା ଅଛି । ସୋଆ ଜଳବାୟୁ ଓ ପାଣିପାଗ କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ ଏହି ପୂର୍ବାନୁମାନ କରିଛନ୍ତି ।

ବଙ୍ଗୋପସାଗରରେ ଥିବା ଲଘୁଚାପ ଏବେ ପୂର୍ବ ମଧ୍ୟପ୍ରଦେଶ ଓ ନିକଟବର୍ତ୍ତୀ ଅଞ୍ଚଳ ଉପରେ ରହିଛି । ତେବେ ଓଡ଼ିଶାରେ ଏବେ ମୌସୁମୀ ସକ୍ରିୟ ରହିଛି । ଏହା ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ବର୍ଷା ହୋଇଛି । ଗତ ୨୪ ଘଣ୍ଟାରେ ବଲାଙ୍ଗୀରର ଦେଓଗାଁରେ ସର୍ବାଧିକ ୧୯୦ ମିମି ବର୍ଷା ହୋଇଛି । ଗୁଲଭେଲାରେ ୧୩୦, ବଲାଙ୍ଗୀରରେ ୧୧୦, କଳାହାଣ୍ଡିର କର୍ଲାମୁଣ୍ଡା ଓ ନର୍ଲାରେ ୧୧୦, ବରଗଡ଼ ଗାଇସିଲଟରେ ୧୧୦, କନ୍ଧମାଳ ବାଲିଗୁଡ଼ାରେ ୧୧୦, ନୂଆପଡ଼ାରେ ୧୦୦, ବିଜେପୁରରେ ୧୦୦, ସଇଁତଳାରେ ୧୦୦, ଖଇରମାଳରେ ୯୦, ବୌଦ୍ଧରେ ୯୦, ବେଲଗାଁରେ ୯୦, କୋମନାରେ ୯୦ମିମି ବର୍ଷା ହୋଇଛି ।

ଆସନ୍ତା ୧୮ରେ ଉପକୂଳ ଓଡ଼ିଶା ଓ ଉତ୍ତର ଆଭ୍ୟନ୍ତରୀଣ ଓଡ଼ିଶାରେ ମଧ୍ୟମ ଧରଣର ବର୍ଷା ହୋଇପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ସେହିଭଳି ୧୯ରେ ଉତ୍ତର ଓଡ଼ିଶାର ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ, ମାଲକାନଗିରି, କନ୍ଧମାଳ, ନବରଙ୍ଗପୁର ଓ କଳାହାଣ୍ଡି ଜିଲ୍ଲାର ବିଭିନ୍ନ ସ୍ଥାନରେ ଭାରୀ ବର୍ଷା ହୋଇପାରେ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପୂର୍ବାନୁମାନ କରିଛି।

ସେହିପରି ହୀରାକୁଦ ଉପମୁଣ୍ଡରେ ଗତ ୨୪ଘଣ୍ଟାରେ ପ୍ରବଳ ବର୍ଷା ହୋଇଛି । ଜଳଭଣ୍ଡାର ଜଳ ପରିଚାଳନା ପାଇଁ ମୋଟ୍ ୨୨ଗେଟ୍ ଖୋଲା ରହିଛି । ଆଜି ଜଳଭଣ୍ଡାର ଭିତରକୁ ୫ ଲକ୍ଷ କ୍ୟୁସେକ୍ ଜଳ ପ୍ରବେଶ କରୁଛି ।