ନୂଆଦିଲ୍ଲୀ, ୧୬/୦୨: ପୁଣି କେମ୍ବ୍ରିଜ୍ ବିଶ୍ବବିଦ୍ୟାଳୟରେ ଭାଷଣ ଦେବେ କଂଗ୍ରେସ ନେତା ରାହୁଲ ଗାନ୍ଧୀ । କେମ୍ବ୍ରିଜ୍ ବିଶ୍ବବିଦ୍ୟାଳୟରେ ଭାଷଣ ଦେବା ପାଇଁ ଚଳିତ ମାସରେ ରାହୁଲଙ୍କୁ ନିମନ୍ତ୍ରଣ ଦିଆଯାଇଥିଲା । ରାହୁଲ କେମ୍ବ୍ରିଜ୍ ବିଶ୍ବବିଦ୍ୟାଳୟରେ ବିଜନେସ୍ ସ୍କୁଲରେ ଭୂ-ରାଜନୀତି, ଭାରତ-ଚୀନ ସମ୍ପର୍କ, ବିଗ୍ ଡାଟା ଏବଂ ଗଣତନ୍ତ୍ର ଭଳି ପ୍ରସଙ୍ଗ ଉପରେ ମତ ରଖିବେ । ଏନେଇ ରାହୁଲ ଗାନ୍ଧୀ ଟ୍ବିଟ୍ କରି ସୂଚନା ଦେବା ସହ ନିଜ ପୁରୁଣା ସଂସ୍ଥାନ କେମ୍ବ୍ରିଜ୍ ୟୁନିଭର୍ସିଟି ଯିବାକୁ ଖୁବ୍ ଉତ୍ସାହିତ ଅଛନ୍ତି ବୋଲି କହିଛନ୍ତି ।
ଏହା ପୂର୍ବରୁ କେମ୍ବ୍ରିଜ୍ ୟୁନିଭର୍ସିଟି ମଧ୍ୟ ଟ୍ବିଟ୍ କରି ରାହୁଲ୍ ଚଳିତ ମାସ ଶେଷ ସୁଦ୍ଧା ଆସିବେ ବୋଲି କହିଥିଲା । ରାହୁଲ, ଶ୍ରୁତି, କପିଳାଙ୍କ ସହ ବିଗ୍ ଡାଟା ଆଣ୍ଡ୍ ଡେମୋକ୍ରାସୀ ଏବଂ ଭାରତ ଓ ଚୀନ ସଂପର୍କକୁ ନେଇ କଥାବାର୍ତ୍ତା ହେବେ ବୋଲି କେମ୍ବ୍ରିଜ୍ ୟୁନିଭର୍ସିଟି କହିଛି । ଗତବର୍ଷ ମେ ମାସରେ ରାହୁଲ କେମ୍ବ୍ରିଜ୍ ବିଶ୍ବବିଦ୍ୟାଳୟରେ ଭାଷଣ ଦେବାକୁ ଯାଇଥିଲେ । ଏହି ସମୟରେ ତାଙ୍କର କିଛି ଭାଷଣକୁ ନେଇ ମଧ୍ୟ ବିବାଦ ହୋଇଥିଲା ।
ସେତେବେଳେ ରାହୁଲ କେମ୍ବ୍ରିଜ୍ ୟୁନିଭର୍ସିଟିରେ ‘ଆଇଡିଆ ଅଫ୍ ଇଣ୍ଡିଆ’ କନଫରେନ୍ସିଂରେ ସରକାରଙ୍କ ଉପରେ ବର୍ଷିଥିଲେ । ସେ କହିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଭାରତରେ ସଂସଦ ଏବଂ ନିର୍ବାଚନ ଆୟୋଗଙ୍କୁ ସେମାନଙ୍କ କାମ କରିବାକୁ ଦେଉନାହାଁନ୍ତି । ଆଉ ରାହୁଲଙ୍କ ଏହି ବୟାନକୁ ନେଇ ବିବାଦ ଦେଖାଦେଇଥିଲା । ବିଜେପି ରାହୁଲ ଏବଂ କଂଗ୍ରେସକୁ ଘେରିଥିଲା ।
ଏହି ସମୟରେ ରାହୁଲ ଭାରତରେ ବଢ଼ୁଥବା ବେକାରୀ, ଚୀନ ପ୍ରସଙ୍ଗକୁ ନେଇ କେନ୍ଦ୍ର ସରକାରଙ୍କ ଉପରେ ଟାର୍ଗେଟ କରିଥିଲା । ସେ ଭାରତର ତୁଳନା ୟୁରୋପ ସହ କରିଥିଲେ । ସେ କଂଗ୍ରେସର ମଧ୍ୟ ଖୁବ୍ ପ୍ରଶଂସା କରିଥିଲେ ଏବଂ କହିଥିଲେ ଭାରତ ରାଜନୀତିରେ ପରିବର୍ତ୍ତନ ଦେଖିବାକୁ ଚାହୁଛି । ଅଧିକରୁ ଅଧିକ ଯୁବକଙ୍କୁ ସୁଯୋଗ ଦେବାକୁ ଚାହୁଛି ବୋଲି ସେ କହିଥିଲେ ।
