ନୂଆଦିଲ୍ଲୀ: ନିଟ୍ ପରୀକ୍ଷାରେ ଅନିୟମିତତା ନେଇ କେନ୍ଦ୍ର ସରକାରଙ୍କୁ ଘେରିଛନ୍ତି କଂଗ୍ରେସ ନେତା ତଥା ରାଇବରେଲି ସାଂସଦ ରାହୁଲ ଗାନ୍ଧୀ। ନିଟ୍ ପରିକ୍ଷାରେ ତ୍ରୁଟି ଯୋଗୁ ୨୪ ଲକ୍ଷ ଛାତ୍ରଛାତ୍ରୀ ନାନା ହଇରାଣ ହୋଇଛନ୍ତି। ସଂସଦରେ ସେମାନଙ୍କ ପାଇଁ ସ୍ୱର ଉତ୍ତୋଳନ ହେବ ବୋଲି ରବିବାର ରାହୁଲ ଗାନ୍ଧୀ କହିଛନ୍ତି। ସଂସଦରେ ସେ ହିଁ ଛାତ୍ରଛାତ୍ରୀଙ୍କର ସ୍ୱର ହୋଇ ବିରୋଧ କରିବେ ବୋଲି ରାହୁଲ ଗାନ୍ଧୀ କହିଛନ୍ତି। ରାହୁଲ କହିଛନ୍ତି “ଆମେ ଆମର ନିର୍ବାଚନ ଇସ୍ତାହାରରେ ପ୍ରତିଶ୍ରୁତି ଦେଇଥିଲୁ ଯେ ପ୍ରଶ୍ନ ପତ୍ର ଲିକ୍ରୁ ଛାତ୍ରଛାତ୍ରୀଙ୍କୁ ମୁକ୍ତି ଦେବା ପାଇଁ ଆଇନ ଆଣିବୁ। ଆଜି ମୁଁ ଦେଶର ସମସ୍ତ ଛାତ୍ରଛାତ୍ରୀଙ୍କୁ ପ୍ରତିଶ୍ରୁତି ଦେଉଛି ଯେ ମୁଁ ସଂସଦରେ ଆପଣଙ୍କର ସ୍ୱର ହେବି। ଆପଣଙ୍କର ଭବିଷ୍ୟତ ପାଇଁ ଦୃଢ଼ତାର ସହ ସ୍ୱର ଉତ୍ତୋଳନ କରିବି।”
ନିଟ୍-ୟୁଜି ପରୀକ୍ଷାରେ ୬୭ ଜଣ ଛାତ୍ର ପ୍ରଥମ ରାଙ୍କ ଆସିଥିଲା। ସେଥିମଧ୍ୟରୁ ହରିଆଣାର ଗୋଟିଏ ସେଣ୍ଟରରେ ହିଁ ୮ ଜଣଙ୍କର ପ୍ରଥମ ରାଙ୍କ ଆସିବାର ଡାଟା ଶେୟାର ହେବା ପରେ ପେପର୍ ଲିକ୍ ଅଭିଯୋଗ କରି ବିବାଦ ଆରମ୍ଭ ହୋଇଯାଇଥିଲା। ଏହାକୁ ନେଇ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ମୋଦୀଙ୍କ ଟାର୍ଗେଟ୍ କରିଥିଲେ। ସେ ଏକ୍ସରେ ଲେଖିଥିଲେ “ପ୍ରଧାନମନ୍ତ୍ରୀ ବର୍ତ୍ତମାନ ପର୍ଯ୍ୟନ୍ତ ଶପଥ ନେଇ ନାହାନ୍ତି। କିନ୍ତୁ ନିଟ ପରୀକ୍ଷାରେ ହୋଇଥିବା ଅନିୟମିତତା ୨୪ ଲକ୍ଷ ଛାତ୍ରଛାତ୍ରୀଙ୍କୁ ସମସ୍ୟାରେ ପକାଇଛି।”
ରାହୁଲ ଗାନ୍ଧୀଙ୍କ କହିବା କଥା ହେଲା ଗୋଟିଏ ପରୀକ୍ଷା କେନ୍ଦ୍ରରୁ ୬ ଜଣ ସର୍ବାଧିକ ମାର୍କ ରଖି ଟପ୍ କରିବା ସମ୍ଭବ ନୁହେଁ। ସେ ଅଭିଯୋଗ କରିଛନ୍ତି ଶିକ୍ଷା ମାଫିଆ ସରକାରଙ୍କ ମିଳିତ ଉଦ୍ୟମର ପେପର ଲିକ୍ ସଂସ୍ଥା ଚାଲିଛି। ତେଣୁ ଏହି ସମସ୍ୟା ସହିତ ଲଢ଼ିବାକୁ କଂଗ୍ରେସ ପାଖରେ ଜବରଦସ୍ତ ପ୍ଲାନ ଅଛି। ନିଟ-ୟୁଜି ପରୀକ୍ଷା ଉପରେ ଅଭିଯୋଗ ଆସିବା ପରେ ପରୀକ୍ଷା ଆୟୋଜନ କରୁଥିବା ନ୍ୟାସ୍ନାଲ ଟେଷ୍ଟିଂ ଏଜେନ୍ସି(ଏନ୍ଟିଏ) ପେପର ଲିକ୍ ଘଟଣାକୁ ପ୍ରତ୍ୟାକ୍ଷାନ କରିଛି। ଏବଂ ଅଭିଯୋଗର ତଦନ୍ତ ପାଇଁ ଉଚ୍ଚସ୍ତରୀୟ କମିଟି ଗଠନ କରାଯାଇଛି।
