ନୂଆଦିଲ୍ଲୀ: ବୀର ସାବରକରଙ୍କ ଉପରେ ରାହୁଲ ଗାନ୍ଧୀ କରିଥିବା ଟିପ୍ପଣୀକୁ ନେଇ ମହାରାଷ୍ଟ୍ରରେ ବିରୋଧ ତେଜିବାରେ ଲାଗିଛି । ଗୋଟିଏ ପଟେ ମହାରାଷ୍ଟ୍ରରେ କଂଗ୍ରେସର ସହଯୋଗୀ ଥିବା ଉଦ୍ଧବ ଠାକରେ ହିଁ ରାହୁଲଙ୍କ ବୟାନ ଉପରେ ଅସନ୍ତୋଷ ଅଛନ୍ତି । ଅନ୍ୟପଟେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ମଧ୍ୟ ବଡ଼ ରାହୁଲକୁ ସମାଲୋଚନା କରିଛନ୍ତି । ଏକନାଥ ସିନ୍ଦେ 'ଆମ ସମସ୍ତେ ସାବରକର' ନାରା ଦେଇ ମହାରାଷ୍ଟ୍ରରେ ସାବରକର ଗୌରବ ଯାତ୍ରା ଆରମ୍ଭ କରିବାକୁ ଘୋଷଣା କରିଛନ୍ତି । ଉଲ୍ଲେଖଯୋଗ୍ୟ ଯେ ଶନିବାର ରାହୁଲ କହିଥିଲେ, ‘ମୁଁ ସାବରକର ନୁହେଁ ଯେ କ୍ଷମା ମାଗିବି । ମୁଁ ଗାନ୍ଧୀ ଏବଂ ଗାନ୍ଧୀ କ୍ଷମା ମାଗନ୍ତି ନାହିଁ’ ।
ରାହୁଲ ଗାନ୍ଧୀଙ୍କ ଏହି ବୟାନ ପରେ ସବୁଆଡୁ ତାଙ୍କୁ ସମାଲୋଚନା କରାଯାଉଛି । ସରକାରୀ ଦଳର ଟାର୍ଗେଟରେ ଥିବା ରାହୁଲ ଏବେ ନିଜ ସହଯୋଗୀ ଦଳର ଅସନ୍ତୋଷର ଶିକାର ହେଉଛନ୍ତି । ଏହାରି ଭିତରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକାନାଥ ସିନ୍ଦେ କହିଛନ୍ତି ଯେ ସେ ବୀର ସାବରକରଙ୍କୁ ନେଇ ରାହୁଲ ଗାନ୍ଧୀ ଦେଇଥିବା ବାୟନକୁ ନିନ୍ଦା କରୁଛି । ସିଏମ୍ ସିନ୍ଦେ କହିଛନ୍ତି, 'ସାବରକର ଦେଶର ସ୍ୱାଧୀନତାରେ ବଡ଼ ଯୋଦଗାନ ଦେଇଥିଲେ । ଏପରି ହିରୋଙ୍କ ଯୋଗଦାନରୁ ହିଁ ଦେଶକୁ ସ୍ୱାଧୀନତା ମିଳିଥିଲା । ସାବରକରଙ୍କ ବଳିଦାନ ବାବଦରେ ଜଣାଇବା ପାଇଁ ଆମେ ସାବରକର ଗୌରବ ଯାତ୍ରା ଆୟୋଜନ କରିବୁ । ଯଦି ପାରିବେ ରାହୁଲ ଗାନ୍ଧୀ ଦିନେ ଯାଇ ଆଣ୍ଡାମାନ ଜେଲରେ ରହି ଦେଖାନ୍ତୁ' ।
ଏହା ପୂର୍ବରୁ ରାହୁଲ ଗାନ୍ଧୀଙ୍କ ସଂସଦ ସଦସ୍ୟତା ରଦ୍ଦ ହେବା ପରେ ସୋମବାର ବିରୋଧୀ ଦଳ ନେତାଙ୍କୁ ନେଇ କଂଗ୍ରେସ ଏକ ବୈଠକ ଡାକିଥିଲା । ତେବେ ଏଥିରେ ଯୋଗ ଦେବାକୁ ଉଦ୍ଧବଙ୍କ ନେତୃତ୍ୱାଧୀନ ଶିବସେନା ମନା କରିଦେଇଛି ।
ସଞ୍ଜୟ ରାଉତ କହିଥିଲେ, ‘ମଲ୍ଲିକାର୍ଜୁନ ଖଡଗେଙ୍କ ଘରେ ହେବାକୁ ଥିବା ବୈଠକରେ ଆମେ ଯୋଗ ଦେବୁ ନାହିଁ । କାରଣ ରାହୁଲ ଗାନ୍ଧୀ କହିଛନ୍ତି ମୁଁ ସାଭରକର ନୁହେଁ, ମୁଁ ଗାନ୍ଧୀ । ଏହା ପୂର୍ବରୁ ସାଭରକରଙ୍କ ଉପରେ ଲଗାତାର ଟିପ୍ପଣୀ କରୁଥିବା ରାହୁଲ ଗାନ୍ଧୀଙ୍କୁ ସତର୍କ କରାଇଥିଲେ ଉଦ୍ଧର ଠାକରେ । ସେ କହିଥିଲେ ଯେ ଆମେ ହିନ୍ଦୁତ୍ୱ ବିଚାରଧାରା ବୀର ସାଭରକରଙ୍କ ଅପମାନ ଗ୍ରହଣ କରିବୁ ନାହିଁ ।
