ଶ୍ରୀନଗର ୨୯।୧: କଂଗ୍ରେସର ଭାରତ ଯୋଡୋ ଯାତ୍ରା ରବିବାର ତାର ଚୂଡାନ୍ତ ପର୍ଯ୍ୟାୟରେ ଶ୍ରୀନଗର ପହଞ୍ଚିଛି। ଯାତ୍ରାର ସଂଯୋଜକ ରାହୁଲ ଗାନ୍ଧି ଜମ୍ମୁ-କାଶ୍ମୀର ରାଜଧାନୀ ଶ୍ରୀନଗରର ଲାଲ ଚୌକରେ ଜାତୀୟ ପତାକା ଉତ୍ତୋଳନ କରିଛନ୍ତି। ଏହା ପରେ ଏକ ସାମ୍ବାଦିକ ସମ୍ମିଳନୀ କରିଥିବା ବେଳେ ସିଧା ବିଜେପିକୁ ଟାର୍ଗେଟ କରିଛନ୍ତି। ରାହୁଲ ଗାନ୍ଧି ଗୃହମନ୍ତ୍ରୀ ଅମିତ ଶାହଙ୍କୁ ଚାଲେଞ୍ଜ କରିଥିବାବେଳେ ଜମ୍ମୁ-କାଶ୍ମୀରରେ କିଛି ବି ସ୍ୱଭାବିକ ହୋଇ ନଥିବା କହିଛନ୍ତି।

ରାହୁଲ ଗାନ୍ଧି କହିଛନ୍ତି ଯେ ଜମ୍ମୁ-କାଶ୍ମୀରରେ ଟାର୍ଗେଟ କିଲିଂ ଓ ବ୍ଲାଷ୍ଟ ନିୟମିତ ଘଟଣାରେ ପରିଣତ ହୋଇଛି। ଯଦି ରାଜ୍ୟର ସୁରକ୍ଷା ବ୍ୟବସ୍ଥା ଏତେ ମଜଭୁତ ତେବେ ବିଜେପି ଲାଲ ଚୌକରୁ ଜମ୍ମୁ ପର୍ଯ୍ୟନ୍ତ ପଦଯାତ୍ରା କରୁନି କାହିଁକି, ଗୃହମନ୍ତ୍ରୀ ଅମିତ ଶାହ ଜମ୍ମୁରୁ କାଶ୍ମୀର ପର୍ଯ୍ୟନ୍ତ କାହିଁକି ଯାତ୍ରା କରୁନାହାନ୍ତି ବୋଲି ରାହୁଲ ପ୍ରଶ୍ନ କରିଛନ୍ତି। ଏଣୁ ଜମ୍ମୁ-କାଶ୍ମୀରରେ ସବୁ କିଛି ଠିକଠାକ୍ ନାହିଁ ବୋଲି ରାହୁଲ ଗାନ୍ଧି କହିଛନ୍ତି। ସେ କହିଛନ୍ତି ଯେ ତାଙ୍କର ଏହି ଯାତ୍ରା କାଳରେ ସେ ଅବସରପ୍ରାପ୍ତ ଜବାନ ଓ ଲଦ୍ଦାଖର ଲୋକଙ୍କୁ ଭେଟିଛନ୍ତି। ସେମାନେ ଚୀନ୍‌ ଆମର ୨୦୦୦ବର୍ଗ କିଲୋମିଟର ଜମି ନେଇଯାଇଥିବା କହିଛନ୍ତି।

LIVE: Press briefing by Shri @RahulGandhi in Srinagar, Jammu & Kashmir. #BharatJodoYatra https://t.co/D5JmAbxpYD

— Congress (@INCIndia) January 29, 2023

ଭାରତର ଅନେକ ପାଟ୍ରୋଲିଂ କେନ୍ଦ୍ର ଏବେ ଚୀନ୍‌ ହାତରେ ରହିଛି। ଏ ସବୁ କଥାକୁ ସରକାର ଅସ୍ୱୀକାର କରିବା ବାସ୍ତବିକ ବିପଦଜନକ ଓ ଏହା ଚୀନ୍‌ର ଆତ୍ମ ବଳକୁ ବଢାଉଥିବା ରାହୁଲ କହିଛନ୍ତି। ସାମ୍ବାଦିକ ସମ୍ମିଳନୀରେ ରାହୁଲ ବିପକ୍ଷ ଏକତା ଉପରେ ମଧ୍ୟ ବୟାନ ରଖିଛନ୍ତି। ରାହୁଲ କହିଛନ୍ତି ଯେ ବିରୋଧୀ ରାଜନୈତିକ ପାର୍ଟିଙ୍କ ମଧ୍ୟରେ ଯେଉଁ ଏକତା ଆସେ ତାହା ଆଲୋଚନା ମାଧ୍ୟମରେ ହୋଇଥାଏ। ତେବେ ଏହା ମାନେ ନୁହେଁ ଯେ ବିରୋଧୀ ବାଣ୍ଟି ହୋଇ ରହିଛନ୍ତି ବୋଲି ଭାବିବା ଠିକ୍ ନୁହେଁ ବୋଲି କହିଛନ୍ତି। ବିରୋଧୀଙ୍କ ମଧ୍ୟରେ ମତପାର୍ଥକ୍ୟ ନିଶ୍ଚିତ ରହିଛି, ହେଲେ ସେମାନେ ଏକଜୁଟ ହୋଇ ନିର୍ବାଚନ ଲଢିବେ ବୋଲି ରାହୁଲ ଆଶାବ୍ୟକ୍ତ କରିଛନ୍ତି।

ଯାତ୍ରା ଉଦଯାପନର ପୂର୍ବ ସଂଧ୍ୟାରେ ରାହୁଲ ଏହି ଯାତ୍ରାରୁ ତାଙ୍କୁ ବହୁତ କିଛି ଶିଖିବାକୁ ମିଳିଥିବା କହିଛନ୍ତି। ଦେଶରେ ଲୋକଙ୍କୁ ଯୋଡିବା ଓ ସେମାନଙ୍କ ମଧ୍ୟରେ ଥିବା ଘୃଣା ଭାବକୁ ସମାପ୍ତ କରିବା ଏହି ଯାତ୍ରାର ଉଦ୍ଦେଶ୍ୟ ଥିଲା।  ଯାତ୍ରା ପ୍ରତି ଲୋକଙ୍କର ବହୁତ ଭଲ ପ୍ରତିକ୍ରିୟା ମିଳିଥିବା ରାହୁଲ କହିଛନ୍ତି। ଏହି ଯାତ୍ରାକୁ ସେ ତାଙ୍କ ଜୀବନର ସବୁଠୁ ଗଭୀର ଓ ଭଲ ଅଭିଜ୍ଞତା ବୋଲି କହିଛନ୍ତି। ତେବେ ତାଙ୍କ ଯାତ୍ରା ଏହିଠାରେ ସମାପ୍ତ ହେଉ ନଥିବା ଓ ଏହା ଆରମ୍ଭ ମାତ୍ର ବୋଲି ସେ କହିଛନ୍ତି।