ନୂଆଦିଲ୍ଲୀ ୨୫।୦୨: ୨୦୨୩ରେ ବେଶ୍ ଦ୍ରୁତ ଗତିରେ ହ୍ରାସ ପାଇଛି ଅନେକ ଭାରତୀୟ ଅରବପତିଙ୍କ ସମ୍ପତ୍ତି । ଏଥିରେ ଏସିଆର ଧନୀ ଗୌତମ ଆଦାନୀ ଓ ମୁକେଶ ଅମ୍ବାନୀଙ୍କ ନିଟ୍ ମୂଲ୍ୟରେ ହ୍ରାସ ଘଟିଛି । ହିଡେନବର୍ଗ ପକ୍ଷରୁ ରିପୋର୍ଟ ପ୍ରକାଶ ପାଇବା ପରେ ଗୌତମ ଆଦାନୀ ବିଶ୍ୱର ସବୁଠାରୁ ଧନୀ ବ୍ୟକ୍ତିଙ୍କ ତାଲିକାର ତୃତୀୟ ସ୍ଥାନରୁ ୨୯ ତମ ସ୍ଥାନକୁ ଖସି ଆସିଛନ୍ତି । ଏହି ରିପୋର୍ଟ ଆସିବାର ମାତ୍ର ଏକ ମାସ ମଧ୍ୟରେ ତାଙ୍କର ନିଟ୍ ମୂଲ୍ୟ ୭୯ ବିଲିୟନ ଡ଼ଲାରକୁ ଖସି ଆସିଛି । ଏହା ସହିତ ରିଲାଏନ୍ସ ଇଣ୍ଡଷ୍ଟ୍ରିଜ୍ ଅଧ୍ୟକ୍ଷ ମୁକେଶ ଅମ୍ବାନୀ ମଧ୍ୟ ଚଳିତ ବର୍ଷ ୫.୯୩ ବିଲିୟନ ଡ଼ଲାରର ସମ୍ପତ୍ତି ହରାଇଛନ୍ତି ।
କିନ୍ତୁ ଆପଣ ଜାଣନ୍ତି କି ଏହି ଦୁଇଜଣଙ୍କ ବ୍ୟତୀତ ଅନ୍ୟ ଜଣେ ଭାରତୀୟ ଅରବପତି ଚଳିତ ବର୍ଷ ନିଜର ସମ୍ପତ୍ତି ହରାଇବାରେ ରେକର୍ଡ ସୃଷ୍ଟି କରିଛନ୍ତି । ସେ ହେଉଛନ୍ତି ଦିଗ୍ଗଜ ନିବେଶକ ରାଧାକିଶନ୍ ଦମାନୀ । ଆଦାନୀ-ଅମ୍ବାନୀଙ୍କ ପରେ ସେ ହେଉଛନ୍ତି ତୃତୀୟ ଭାରତୀୟ ଯିଏ କି ୨୦୨୩ରେ ସର୍ବାଧିକ ନେଟ ମୂଲ୍ୟ ହରାଇଛନ୍ତି ।ବ୍ଲୁମବର୍ଗ ବିଲିୟନେୟାର ଇଣ୍ଡେକ୍ସ ଅନୁଯାୟୀ, ରାଧାକିଶନ୍ ଦମାନୀ ନେଟ ମୂଲ୍ୟ ୧୬.୭ ବିଲିୟନ ଡ଼ଲାରକୁ ହ୍ରାସ ପାଇଛି । ଚଳିତବର୍ଷ ୨.୬୧ ବିଲିୟନ ଡ଼ଲାର ଅର୍ଥାତ୍ ୧୩ ପ୍ରତିଶତ ହ୍ରାସ ପାଇଛି । ରିପୋର୍ଟ ଅନୁଯାୟୀ, ଦମାନୀ ବିଶ୍ବ ଧନୀ ତାଲିକାର ୯୮ ତମ ସ୍ଥାନରେ ରହିଛନ୍ତି ।
ରାଧାକିଶନ୍ ଦମାନୀଙ୍କ କଥା କହିବାକୁ ଗଲେ ଖୁଚୁରା ବଜାରରେ ତାଙ୍କର ବେଶ୍ ନାଁ ରହିଛି । ଏଥିସହିତ ତାଙ୍କର ଡି-ମାର୍ଟ ସାରା ଦେଶରେ ୨୦୦ରୁ ଅଧିକ ଷ୍ଟୋର ଅଛି । ଅନ୍ୟପଟେ ରାଧାକିଶନ୍ ଦମାନୀ ଷ୍ଟକ୍ ମାର୍କେଟର ସବୁଠାରୁ ବଡ ନିବେଶକ ଅଟନ୍ତି । ୧୯୮୦ରେ ପ୍ରଥମ ଥର ପାଇଁ ଷ୍ଟକ୍ ମାର୍କେଟରେ ପ୍ରବେଶ କରିଥିଲେ ରାଧାକିଶନ୍ ଦମାନୀ । ପ୍ରଥମରୁ ଅନେକ ବିଫଳତା ମିଳିବା ପରେ ଏବେ ସେ ମାର୍କେଟର ଅଗ୍ରଣୀ ନିବେଶକମାନଙ୍କ ମଧ୍ୟରୁ ଜଣେ । ଏହାପରେ ୨୦୦୨ରେ ସେ FMCG ସେକ୍ଟରରେ ପ୍ରବେଶ ପାଇଁ ଚେଷ୍ଟା କରିଥିଲେ ଏବଂ ମୁମ୍ବାଇରେ ତାଙ୍କର ପ୍ରଥମ ଡି-ମାର୍ଟ ଷ୍ଟୋର୍ ଆରମ୍ଭ କରିଥିଲେ । ବର୍ତ୍ତମାନ ଏହି ଷ୍ଟୋରଗୁଡିକର ସଂଖ୍ୟା ୨୦୦ରେ ପହଞ୍ଚିଛି ।
