ମସ୍କୋ,୧3|୮: ରୁଷ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍ ଏବେ ଦେଶର ବିଭିନ୍ନ ଜେଲ୍ରେ ବନ୍ଦୀ ଥିବା କଏଦୀଙ୍କୁ ଏକ ବିଶେଷ ଅଫର ଦେଇଛନ୍ତି । କହିଛନ୍ତି, ୟୁକ୍ରେନ୍ରେ ଜାରି ରହିଥିବା ଯୁଦ୍ଧରେ ସାମିଲ ହୁଅ । ଦେଶ ପାଇଁ ଲଢ଼ । ସେଠାରେ ୟୁକ୍ରେନୀୟ ସୈନ୍ୟ ବିରୋଧରେ ଲଢ଼ିଲେ ଜେଲରୁ ସବୁଦିନ ପାଇଁ ମୁକ୍ତି ମିଳିବ । ପୁଟିନ୍ଙ୍କ ଏଭଳି ଅଫରରେ ଆଜୀବନ ସଜା କାଟୁଥିବା କଏଦୀମାନେ ଆକୃଷ୍ଟ ହୋଇଛନ୍ତି । ୧୦ ବର୍ଷ ଓ ତଦୂଦ୍ଧ୍ୱର୍ ଜେଲ ଦଣ୍ଡାଦେଶ ପାଇଥିବା କଏଦୀମାନେ ମଧ୍ୟ ଏଥିପାଇଁ ମନ ବଳାଇଛନ୍ତି । ଏବେ କଏଦୀ ଓ ସେମାନଙ୍କ ପରିବାର ଲୋକଙ୍କ ମଧ୍ୟରେ ଫୋନ୍ରେ ବିଚାରବିମର୍ଶ ହେଉଛି ।
ରାଷ୍ଟ୍ରପତି ପୁଟିନ୍ଙ୍କ ଏହି ଅଫରକୁ ଗ୍ରହଣ କରିବେ କି ନାହିଁ ତାହା ଉପରେ ଆଲୋଚନା ହେଉଛି । କିଛି କଏଦୀ ଏହି ଅଫର୍କୁ ଗ୍ରହଣ ବି କରିନେଇଛନ୍ତି । ୟୁକ୍ରେନ୍ରେ ଚଳିତବର୍ଷ ଫେବ୍ରୁଆରୀ ୨୪ରୁ ରୁଷ ଯୁଦ୍ଧ ଜାରି ରଖିଛି । ଏହା ଥମିବାର ନାଁ ଧରୁନାହିଁ । ଛୋଟ ଦେଶ ହେଲେ ବି ୟୁକ୍ରେନ୍ ଜୋରଦାର ଜବାବ ଦେଉଛି । ଯୁଦ୍ଧ ଆରମ୍ଭରୁ ଏ ପର୍ଯ୍ୟନ୍ତ ରୁଷ ଏହାର ପ୍ରାୟ ୭୫,୦୦୦ ସୈନ୍ୟ ହରାଇଥିବା ପାଶ୍ଚାତ୍ୟ ରିପୋର୍ଟରୁ ଜଣାପଡ଼ିଛି । ଏଭଳି ସ୍ଥିତିରେ କଏଦୀଙ୍କୁ ବ୍ୟବହାର କରିବା ପାଇଁ ପୁଟିନ୍ ବାଧ୍ୟ ହୋଇଛନ୍ତି । ଶାରୀରିକ ଦୃଷ୍ଟିରୁ ଫିଟ୍ ଥିବା ଯୁବ ବର୍ଗର କଏଦୀମାନଙ୍କୁ ପ୍ରଥମ ପସନ୍ଦ ଭାବେ ଚୟନ କରାଯାଇ ଅଫର ଦିଆଯାଉଛି । ଏମିତି କି ଯୁଦ୍ଧ ପାଇଁ ପାରିଶ୍ରମିକ ଦେବା ଲାଗି ମଧ୍ୟ କୁହାଯାଉଛି ।
ଗଣମାଧ୍ୟମ ସଂସ୍ଥା ସିଏନ୍ଏନ୍ ମାସାଧିକ କାଳ ଅନୁସନ୍ଧାନ କରିବା ପରେ ଏହି ଖବର ପାଇଛି । ରୁଷ୍ର ସଦ୍ୟ ସେନା ନିଯୁକ୍ତି ସ୍କିମ୍ରେ କଏଦୀମାନଙ୍କୁ ସାମିଲ କରାଯାଇଛି । କଏଦୀଙ୍କ ବନ୍ଧୁ ଓ ସମ୍ପର୍କୀୟଙ୍କୁ ବି ନିଯୁକ୍ତି ଦିଆଯାଉଛି । ଡଜନେରୁ ଅଧିକ ଜେଲରେ ବନ୍ଦୀ ଥିବା ଶହ ଶହ କଏଦୀଙ୍କ ପାଖକୁ ସେନା ଯାଇ ଖୋଲାଖୋଲି ଭାବେ ଅଫର ଦେଉଛି । ଏହି କଏଦୀମାନଙ୍କ ମଧ୍ୟରେ ହତ୍ୟାକାରୀ, ନିଶାଦ୍ରବ୍ୟ ଚୋରା ଚାଲାଣକାରୀ ଭଳି ଅପରାଧୀ ରହିଛନ୍ତି । କିଛି କଏଦୀ ସେନାରେ ସାମିଲ ହୋଇସାରିଲେଣି । ୟୁକ୍ରେନ୍ ଯୁଦ୍ଧରେ ପ୍ରାଣ ହରାଇବା ଆଶଙ୍କା ଅଧିକ ଥିବା ସତ୍ତେ୍ୱ ଅଧିକାଂଶ କଏଦୀ ପୁଟିନ୍ଙ୍କ ଅଫରକୁ ଗ୍ରହଣ କରିବାକୁ ବାଧ୍ୟ ହେଉଛନ୍ତି ।
ତେବେ ରୁଷ ସେନା ୟୁକ୍ରେନ୍ରେ ଯୁଦ୍ଧ ପାଇଁ ହତ୍ୟାକାରୀଙ୍କୁ ଜେଲରୁ ନେବ ପଛେ, ବଳାତ୍କାରୀ, ଆତଙ୍କବାଦୀ ଓ ନକ୍ସଲଙ୍କୁ ନେବନାହିଁ । ସର୍ବକ୍ଷମା କିମ୍ବା ୬ ମାସ ମଧ୍ୟରେ ମୁକ୍ତି ପାଇଁ ଅଫର ଦିଆଯାଉଛି । ମାସକୁ ୧ ଲକ୍ଷ କିମ୍ବା ୨ ଲକ୍ଷ ରୁବଲ୍ ଦିଆଯିବ ବୋଲି କୁହାଯାଉଛି । ଜଣେ କଏଦୀ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ମୋ ସାମ୍ନାରେ ଏବେ ଦୁଇଟି ରାସ୍ତା ରହିଛି । ୧୦ ବର୍ଷ ଧରି ଜେଲରେ ରହିବି ନା ୬ ମାସ ମଧ୍ୟରେ ମୁକୁଳିବି? ଯୁଦ୍ଧରେ ଯଦି ଜୀବନ ରହିଗଲା, ତେବେ ୬ ମାସ ମଧ୍ୟରେ ମୁକୁଳିବା ସମ୍ଭାବନା ରହିଛି । ଅନ୍ୟଥା ଜେଲର କାଳ କୋଠରିରେ ଦିନ କାଟିବାକୁ ପଡ଼ିବ । ମୁଁ ମୋ ପିଲାମାନଙ୍କୁ ଶୀଘ୍ର ଦେଖିବାକୁ ଚାହୁଁଛି । ଯଦି ଆମକୁ ବିକଳ୍ପ ମିଳୁଛି, ତେବେ ଏହାକୁ ଗ୍ରହଣ କରିବୁ ନାହିଁ କାହିଁକି?
