ନୂଆଦିଲ୍ଲୀ: ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ ଏବଂ ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜଙ୍ଗ ଉନଙ୍କ ବନ୍ଧୁତାକୁ ନେଇ ସାରା ବିଶ୍ୱରେ ଚର୍ଚ୍ଚା। ଉଭୟେ ପରସ୍ପରକୁ ପଠାଉଛନ୍ତି ସ୍ପେଶାଲ ଗିଫ୍ଟ। କିନ୍ତୁ ଏଥର ପୁଟିନ କିମ ଜଙ୍ଗ ଉନଙ୍କୁ ଦେଇଥିବା ଉପହାର ବିଷୟରେ ଅନେକ ଆଲୋଚନା ହେଉଛି। ଏବେ ଅର୍ଲୋଭ ଟ୍ରୋଟର୍ ଘୋଡା କିମ ଜୋଙ୍ଗ ଉନଙ୍କ ପାଇଁ ପଠାଇଛନ୍ତି ପୁଟିନ। ୟୁକ୍ରେନ ଯୁଦ୍ଧ ସହିତ ତାଙ୍କର ମଧ୍ୟ ସମ୍ପର୍କ ରହିଛି।

ଟାଇମ୍ସ ରିପୋର୍ଟ ଅନୁଯାୟୀ କିମ ଅର୍ଲୋଭ ଟ୍ରୋଟର୍ ପ୍ରଜାତିର ଘୋଡାକୁ ବହୁତ ଭଲ ପାଆନ୍ତି। ସେ ଏହା ପୂର୍ବରୁ ମଧ୍ୟ ଚଢୁଥିବାର ନଜର ଆସିଛନ୍ତି। କିନ୍ତୁ ଏହି ସମୟରେ ଏଭଳି ଉପହାର ଅନେକ ଗୁରୁତ୍ୱ ବହନ କରେ। ବାସ୍ତବରେ କିମ ଜୋଙ୍ଗ ଉନ ୟୁକ୍ରେନ ଯୁଦ୍ଧ ପାଇଁ ନିଜର ଅସ୍ତ୍ରଶସ୍ତ୍ର ଭଣ୍ଡାର ଖୋଲିଦେଇଛନ୍ତି। ଋଷକୁ ବିପୁଳ ପରିମାଣର ଗୋଳାବାରୁଦ ପଠାଯାଇଛି, ଯାହା ଦ୍ୱାରା ଏହା ୟୁକ୍ରେନ ସହିତ ଯୁଦ୍ଧ କରିପାରିବ। ପୁଟିନ ତାଙ୍କ ବନ୍ଧୁଙ୍କ ଏହି ଅନୁଗ୍ରହକୁ ତାଙ୍କୁ ଉପହାର ଦେଇ ପରିଶୋଧ କରିଛନ୍ତି। ସେ କୋରିଆର ସୁପ୍ରିମ ଲିଡର୍‌ କିମ ଜୋଙ୍ଗ-ଉନଙ୍କୁ ୨୪ ବିରଳ ପ୍ରଜାତିର ଘୋଡା ପଠାଇଛନ୍ତି। ଏଥିମଧ୍ୟରେ ୧୯ଟି ଘୋଡା ଏବଂ ୫ଟି ମାଈ ଘୋଡା ମଧ୍ୟ ରହିଛି।

କିଛି ଦିନ ପୂର୍ବେ କିମଙ୍କୁ ଭେଟିବା ପାଇଁ ଉତ୍ତର କୋରିଆ ଯାଇଥିଲେ ପୁଟିନ। କିମ ଜୋଙ୍ଗ ଉନ ତାଙ୍କୁ ଏକ ପୁଙ୍ଗସାନ କୁକୁର ଉପହାର ଦେଇଥିଲେ। ଏହା ଏକ ଶିକାରୀ କୁକୁର, ଯାହା ବାଘମାନଙ୍କୁ ମଧ୍ୟ ଶିକାର କରିପାରିବ। ସେତେବେଳେ ପୁଟିନ କିମଙ୍କୁ ଉପହାର ଦେବା ପାଇଁ ତାଙ୍କ ସହିତ ଛେଳି ନେଇଥିଲେ। ତେବେ ଦୁଇ ବର୍ଷ ପୂର୍ବେ 30 ଅର୍ଲୋଭ ଟ୍ରୋଟର୍ସ ଗ୍ରହଣ କରିଥିଲେ କିମ। ଏକ ପ୍ରଚାର ଭିଡିଓରେ ଧଳା ଘୋଡା ଚଢୁଥିବାର ନଜର ଆସିଥିଲେ। ଯେଉଁ ଘୋଡା ଉତ୍ତର କୋରିଆର ଐତିହ୍ୟର ପ୍ରତୀକ। ଏହାର ନାମ ଚୋଲିମା ରଖାଯାଇଛି।