ପୁଲୱାମା ୧୬/୨ : ପୁଲୱାମା ବିସ୍ଫୋରଣ ପରେ ଦେଶ ସାରା ଆକ୍ରୋଶର ମାହୋଲ ଦେଖିବାକୁ ମିଳିଛି | ବିସ୍ଫୋରଣରେ ୪୨ ସିଆରପିଏଫ ଯବାନ ସହିଦ ଘଟଣାରେ ସମଗ୍ର ଅଂଚଳରେ ଉତ୍ତେଜନା ଦେଖା ଦେଇଥିଲା | ଦିଲ୍ଲୀ, କାଶ୍ମୀର, ରାଜସ୍ଥାନ, ଉତ୍ତରାଖଣ୍ଡ, ଓଡିଶା, ପଞ୍ଜାବ, ବିହାର ସବୁଠି ଲୋକେ ପାକିସ୍ତାନ ବିରୋଧରେ ନାରା ଲଗାଉଛନ୍ତି | ସହିଦ ଯବାନଙ୍କ ମୃତ୍ୟୁର ବଦଲା ନେବା ପାଇଁ ଲୋକେ ଦାବି କରିଛନ୍ତି | ଜାମ୍ମୁ କାଶ୍ମୀର କାଠୁଆ ଅଂଚଳରେ ଲୋକେ ତ୍ରିରଙ୍ଗା ଧରି ପାକିସ୍ତାନ ବିରୋଧରେ ନାରା ଲଗାଉଛନ୍ତି | ବିରୋଧ ପ୍ରଦର୍ଶନରେ ଅଧିକାଂଶ ମହିଳା ଏବଂ ଯୁବ ପିଢ଼ି ରହିଛନ୍ତି | ଫଳରେ ଜାମ୍ମୁ କାଶ୍ମୀରରେ ଶୁକ୍ରବାର ଠାରୁ କର୍ଫ୍ୟୁ ଜାରି କରାଯାଇଥିଲା |
{"id":85701}କାଶ୍ମୀରରେ ଇଣ୍ଟରନେଟ ସେବା ଗତକାଲି ଠାରୁ ବନ୍ଦ କରିଦିଆଯାଇଛି | ଆଜି ମଧ୍ୟ କାଶ୍ମୀରରେ କର୍ଫ୍ୟୁ ଜାରି ରହିଛି | ଅନେକ ଜାଗାରେ ସେନା କଣ୍ଟା ଯୁକ୍ତ ତାର ଲଗାଇ ରାସ୍ତା ଅବରୋଧ କରିଛି | ପୁରୁଣା ଜାମ୍ମୁ ଅଂଚଳରେ କର୍ଫ୍ୟୁର ପ୍ରଭାବ ଅଧିକ ଦେଖିବାକୁ ମିଳିଛି | ଶୁକ୍ରବାର ଦିନ କର୍ଫ୍ୟୁ ବେଳେ ଦୁଇ ସମ୍ପ୍ରଦାୟ ମଧ୍ୟରେ ପଥର ମାଡ ହୋଇଥିଲା | ବ୍ୟବସାୟ ମହାସଂଘ ଏହି ବନ୍ଦକୁ ସମ୍ପୂର୍ଣ ମାତ୍ରାରେ ସମର୍ଥନ ଜଣାଇଛି |
{"id":85702}
କର୍ଫ୍ୟୁ ଯୋଗୁଁ ଲୋକେ ଘରୁ ବାହାରି ପାରୁନାହାନ୍ତି | ଫଳରେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି | ସହରର ସମସ୍ତ ପେଟ୍ରୋଲ ପମ୍ପ ମଧ୍ୟ ବନ୍ଦ ରହିଛି | ଜାମ୍ମୁର ସମସ୍ତ ଦୋକାନ, ବଜାର, ସ୍କୁଲ କଲେଜ ବନ୍ଦ ରଖିବା ପାଇଁ ପ୍ରଶାସନ ତରଫରୁ ଘୋଷଣା କରାଯାଇଛି | ଏପର୍ଯ୍ୟନ୍ତ କୌଣସି ଅପ୍ରୀତିକର ଘଟଣା ଘଟିଥିବା ସୂଚନା ମିଳିନାହିଁ | ପୋଲିସ ଏବଂ ଭାରତୀୟ ସେନା ପୁରା ଅଂଚଳକୁ ନିୟନ୍ତ୍ରଣରେ ରଖିଛନ୍ତି | ସ୍ଥିତିରେ ସୁଧାର ଆସିଲେ ଆଜି ସନ୍ଧ୍ୟା ସୁଦ୍ଧା କର୍ଫ୍ୟୁ ହଟେଇ ଦିଆଯିବ |