ନୂଆଦିଲ୍ଲୀ: ଭାରତୀୟ ସେନାର ଦକ୍ଷିଣ କମାଣ୍ଡ ରାଷ୍ଟ୍ରୀୟ ରକ୍ଷା ଏକାଡେମୀ (ଏନଡିଏ)ର ପ୍ରଥମ ମହିଳା କ୍ୟାଡେଟ୍ସ ବ୍ୟାଚର ଫଟୋ ସେୟାର କରିଛି । ଏହି ବ୍ୟାଚରେ ସାରା ଦେଶରୁ ୧୯ ମହିଳା କ୍ୟାଡେଟକୁ ବଛାଯାଇଛି । ଏହି ମହିଳା କ୍ୟାଡେଟ୍ସ ତିନି ବର୍ଷ ଯାଏ ପୁରୁଷ କ୍ୟାଡେଟ୍ସଙ୍କ ପରି ଟ୍ରେନିଂ ନେବେ । ଏହାପରେ ସମସ୍ତଙ୍କୁ କମିଶନ କରାଯିବ। ଉଲ୍ଲେଖଯୋଗ୍ୟ ଯେ ୨୦୨୨ରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ପୁନେର ଖଡକବାସଲାରେ ଏକ ଜେଣ୍ଡର ନ୍ୟୁଟ୍ରଲ ଏକାଡେମୀ ନିର୍ମାଣ କରାଯାଇଛି ।
ଚଳିତ ସପ୍ତାହରେ ଭାରତୀୟ ସେନାର ଦକ୍ଷିଣ କମାଣ୍ଡ କମାଣ୍ଡର ଲେଫ୍ଟନାଣ୍ଟ ଜେନେରାଲ ଅଜୟ କୁମାର ସିଂ ଏହି କ୍ୟାଡେଟମାନଙ୍କୁ ଭେଟିଥିଲେ। ୨୦୨୨ ଜୁନରେ ୧୯ ମହିଳା କ୍ୟାଡେଟ୍ସ ପୁନେ ସ୍ଥିତ ଏକାଡେମୀରେ ପ୍ରବେଶ କରିଥିଲେ । ଏଥିରେ ୧୦ ସ୍ଥଳସେନା, ଛଅ ବାୟୁସେନା ଏବଂ ତିନି ନୌସେନା କ୍ୟାଡେଟ୍ସ ସାମିଲ ଅଛନ୍ତି । ମହିଳା କ୍ୟାଡେଟ୍ସଙ୍କ ପ୍ରଥମ ବ୍ୟାଚ୍ ୨୦୨୫ ମଇ ମାସରେ ବାହାରିବ।
ରିପୋର୍ଟ ଅନୁସାରେ, ୨୦୨୧ ନଭେମ୍ୱରରେ ୧.୭୭ ଲକ୍ଷ ମହିଳା ଲିଖିତ ପରୀକ୍ଷା ଦେଇଥିଲେ, ଏଥିରୁ ମାତ୍ର ୧୯ ଜଣଙ୍କୁ ଚୟନ କରାଯାଇଛି । ବର୍ଷରେ ଦୁଇ ଥର ଏପ୍ରିଲ ଏବଂ ସେପ୍ଟେମ୍ୱର ମାସରେ ଏନଡିଏ ପରୀକ୍ଷା ହୋଇଥାଏ।
