ଢେଙ୍କାନାଳ,୧୪/୦୨: ଢେଙ୍କାନାଳ ଜିଲ୍ଲା ହିନ୍ଦୋଳ ଉପଖଣ୍ଡର ଝାଡବନ୍ଧଠାରେ ନିର୍ମାଣାଧୀନ ରୁଙ୍ଗଟା କାରଖାନା ରାସ୍ତା ନିର୍ମାଣକୁ ବିରୋଧ । ରାସ୍ତାକାମକୁ ସ୍ଥାନୀୟ ତରକାବେଡା ଗ୍ରାମବାସୀଙ୍କ ବିରୋଧ ଏବେ ଜଟିଳ ହେବାରେ ଲାଗିଛି । ଏହି କାରଖାନା ଯୋଗୁଁ କ୍ଷତିଗ୍ରସ୍ତ ହେଉଥିବା ସ୍ଥାନୀୟ ତରକାବେଡା ଗ୍ରାମକୁ ସଂଯୋଗ କରୁଥିବା ରାସ୍ତାକୁ ଦଖଲକୁ ନେଵା ପରେ ଗତ ଦୁଇଦିନ ଧରି ଲାଗି ରହିଥିବା ଉତ୍ତେଜନା ବୃଦ୍ଧି ପାଇଛି ।
ଅଭିଯୋଗ ହେଉଛି ଯେ, ଜନସାଧାରଣଙ୍କ ରାସ୍ତାକୁ ପୋଲିସ ଲଗାଇ ରୁଙ୍ଗଟା କର୍ତ୍ତୃପକ୍ଷ ଦଖଲ କରିବାରେ ସକ୍ଷମ ହୋଇଛନ୍ତି । ଏପରିକି ଗତ ଏକ ମାସ ଧରି ରାସ୍ତା ନିର୍ମାଣକୁ ବିରୋଧ କରି ଘଟଣାସ୍ଥଳରେ ଗଣଧାରଣା ଜରିରଖିଥିବା ତରକାବେଡା ଗ୍ରାମର ୮୭ଜଣ ଉଭୟ ପୁରୁଷ ଓ ମହିଳାଙ୍କୁ ଜବରଦସ୍ତ ପୋଲିସ ଉଠାଇ ନେଇଥିଲା । ଘଟଣାସ୍ଥଳରେ ପ୍ରଶାସନ ପକ୍ଷରୁ ୧୪୪ ଧାରା ଜାରି କରି ପୋଲିସ ସହାୟତାରେ ରୁଙ୍ଗଟା କର୍ତ୍ତୃପକ୍ଷ ରାସ୍ତା ନିର୍ମାଣ କରିବାରେ ସକ୍ଷମ ହୋଇଛନ୍ତି ।
ପୋଲିସ ଉଠାଇ ନେଇଥିବା ଲୋକମାନଙ୍କୁ ପରେ ଛାଡ଼ିଦେଇଥିବା ଜଣାପଡିଛି । ମାତ୍ର କାରଖାନା କର୍ତ୍ତୃପକ୍ଷଙ୍କ ଏପରି ମନମାନି ଓ ପ୍ରଶାସନର ଏପରି ଏକପାଖିଆ କାର୍ଯ୍ୟକଳାପକୁ ନେଇ ସ୍ଥାନୀୟ ଅଞ୍ଚଳରେ ଜଣ ଅସନ୍ତୋଷ ତେଜିବାରେ ଲାଗିଛି । ଏପରିକି ରବିବାର ଘଟଣାସ୍ଥଳରେ ପୁଣି ତରକାବେଡା ଗ୍ରାମବାସୀ ଏକାଠି ହୋଇଛନ୍ତି । କାରଖାନା ଯୋଗୁଁ କ୍ଷତିଗ୍ରସ୍ତ ଅନ୍ୟ ଗ୍ରାମ ଲୋକଙ୍କ ସହାୟତାରେ ଆନ୍ଦୋଳନକୁ ତୀବ୍ର କରିବାକୁ ପ୍ରସ୍ତୁତି ଚଳାଇଥିବା ସୂଚନା ମିଳିଛି । ଫଳରେ ଆଗାମୀ ସମୟରେ ପୁଣି ଏହି ରୁଙ୍ଗଟା ଓ ସ୍ଥାନୀୟ ଲୋକଙ୍କ ବିବାଦ ତୀବ୍ର ହେବାର ଯଥେଷ୍ଟ ଆଶଙ୍କା କରାଯାଇଛି ।