ନୂଆଦିଲ୍ଲୀ ୯।୧୨: ରାଜ୍ୟସଭାରେ ଶୁକ୍ରବାର ଭାରତରେ ସମାନ ନାଗରିକ ସଂହିତା ସମ୍ପର୍କିତ ପ୍ରାଇଭେଟ ମେମ୍ବର ବିଲ ଉପସ୍ଥାପିତ କରାଯାଇଛି। ବିଜେପି ସାଂସଦ କିରୋଡିଲାଲ ମିଣା ଏହି ବିଧେୟକକୁ ଗୃହରେ ଉପସ୍ଥାପନ କରିଥିଲେ। ବିଧେୟକ ଉପସ୍ଥାପନା ସପକ୍ଷରେ ୬୩ଟି ଭୋଟ ପଡିଥିଲା, ଏହାର ବିପକ୍ଷରେ ମାତ୍ର ୨୩ ଭୋଟ ପଡିଥିବାରୁ ବିଧେୟକ ଉପସ୍ଥାପିତ ହୋଇଛି।

ଦେଶରେ ୟୁନିଫର୍ମ ସିଭିଲ କୋଡ ଲାଗୁ କରିବା ପାଇଁ ବିଧେୟକରେ ନ୍ୟାସନାଲ ଇନସ୍ପେକ୍ସନ ଏଣ୍ଡ ଇନଭେଷ୍ଟିଗେସନ କମିଶନ ଗଠନ ଲାଗି ଦାବି କରାଯାଇଛି। କଂଗ୍ରେସ, ସମାଜବାଦୀ ପାର୍ଟି, ରାଷ୍ଟ୍ରିୟ ଜନତା ଦଳ, ଡିଏମକେ, ଏନସିପି ଓ ଟିଏମସି ସମେତ ସମସ୍ତ ବିରୋଧୀ ଦଳ ବିଲ ଉପସ୍ଥାପନକୁ ଗୃହରେ ତୀବ୍ର ବିରୋଧ କରିଛନ୍ତି। ବିଧେୟକର ଉପସ୍ଥାପନର ବିରୋଧ କରି ସପା ସାଂସଦ ରାମ ଗୋପାଲ ଯାଦବ କହିଥିଲେ ଯେ ମୁସଲମାନ ମାନେ  ନିଜ କକା ଝିଅ ଭଉଣୀ ସହିତ ବିବାହକୁ ଉପଯୁକ୍ତ ମନେ କରନ୍ତି। ତେବେ ହିନ୍ଦୁ ଏହା କରିପାରିବେ କି ବୋଲି ସେ ପ୍ରଶ୍ନ କରିଥିଲେ। ଏଣୁ ସବୁ ଧର୍ମର ଅଲଗା ଅଲଗା ପରମ୍ପରା ରହିଥିବାରୁ ଦେଶରେ ୟୁନିଫର୍ମ ସିଭିଲ କୋଡ ଲାଗୁ ହୋଇପାରିବନି ବୋଲି କହିଥିଲେ। ଏହି ଆଲୋଚନାରେ ବିଜେଡି କକ୍ଷତ୍ୟାଗ କରିଛି।

{"id":719225,"width":841,"height":552,"sizeSlug":"full","linkDestination":"none"}

ତେବେ ସରକାରଙ୍କ ପକ୍ଷରୁ କେନ୍ଦ୍ରମନ୍ତ୍ରୀ ତଥା ରାଜ୍ୟସଭାରେ ସଦନର ନେତା ପିୟୁଷ ଗୋୟଲ କହିଛନ୍ତି ଯେ କୌଣସି ସଦସ୍ୟଙ୍କୁ ସଂସଦରେ ବିଧେୟକ ପେସ କରିବାକୁ ଓ ନିଜ କ୍ଷେତ୍ରର ପ୍ରସଙ୍ଗ ଉଠାଇବାକୁ ପୂର୍ଣ୍ଣ ଅଧିକାର ରହିଛି। ବିଧେୟକକୁ ବିରୋଧ କରୁଥିବା ସମସ୍ତ ଦଳଙ୍କୁ ବିଲ ଉପସ୍ଥାପନ ହେଲେ ଏହାର ଚର୍ଚ୍ଚା ହେବ ଓ ସବୁ ପାର୍ଟି ସେମାନଙ୍କର ପକ୍ଷ ରଖି ପାରିବେ ବୋଲି ଗୋୟଲ କହିଛନ୍ତି। ତେବେ ଏଥିପାଇଁ ରାଜ୍ୟସଭାରେ ତର୍କ ହେବା ଦରକାର ବୋଲି ସେ କହିଛନ୍ତି। ଏଥିରେ ସିପିଆଇ(ଏମ) ସାଂସଦ ଜନ ବ୍ରିଟାଶ ବିଧି ଆୟୋଗଙ୍କ ରିପୋର୍ଟର ଉଦାହରଣ ଦେଇ ସମାନ ନାଗରିକ ସଂହିତାର ଦେଶରେ ଆବଶ୍ୟକତା ନଥିବା କହିଛନ୍ତି।

ଉଲ୍ଲେଖଯୋଗ୍ଯ ଯେ ଗତ କିଛି ମାସ ହେଲା ଦେଶରେ ସମାନ ନାଗରିକ ସଂହିତା ବା ୟୁନିଫର୍ମ ସିଭିଲ କୋଡ ଲାଗୁ ନିମନ୍ତେ ଦାବି ହେଉଛି। ବିଜେପି ଶାସିତ ଉତ୍ତରାଖଣ୍ଡ, ମଧ୍ୟପ୍ରଦେଶ, ଗୁଜରାଟ ଓ କର୍ଣ୍ଣାଟକ ଭଳି ରାଜ୍ୟମାନେ ୟୁନିଫର୍ମ ସିଭିଲ କୋଡ ଲାଗୁ କରିବା ପାଇଁ ପ୍ରକ୍ରିୟା ଆରମ୍ଭ କରିସାରିଲେଣି। ଏଥିରେ ଶୁକ୍ରବାର ଉପସ୍ଥାପିତ ହୋଇଥିବା ବିଧେୟକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସଂସଦରେ ପ୍ରାଇଭେଟ ମେମ୍ବର ବିଲ ଗୃହିତ କରିବା ଏତେ ସହଜ ନୁହେଁ। ସଂସଦ ଇତିହାସରେ ଏପର୍ଯ୍ୟନ୍ତ ମାତ୍ର ୩ଟି ପ୍ରାଇଭେଟ ମେମ୍ବର ବିଲ ଗୃହିତ ହୋଇଛି। ୧୯୭୧ ମସିହାରେ ଶେଷ ଥର ଏପରି କୌଣସି ଏକ ବିଧେୟକ ଗୃହୀତ ହୋଇଥିଲା।