ରାଜ୍ୟର ସମସ୍ତ ଘରୋଇ ମେଡିକାଲ୍ , କ୍ଲିନିକ୍ ପାଥୋ ଲାବ୍ ଏବଂ ଡାଏଗ୍ନୋଷ୍ଟିକ୍ ସେଣ୍ଟର୍ ୨୪ ଘଣ୍ଟା ପାଇଁ ବନ୍ଦ । ଆଜି ସକାଳ ୬ଟାରୁ ବନ୍ଦ ରହିଛି , ଆସନ୍ତାକାଲି ସକାଳ ୬ଟା ପର୍ଯ୍ୟନ୍ତ ଚାଲିବ ଏହି ବନ୍ଦ ପାଳନ । ଓଡ଼ିଶା କ୍ଲିନିକାଲ୍ ଏଷ୍ଟାବ୍ଲିସମେଣ୍ଟ ଆକ୍ଟରେ ସଂଶୋଧନ ଦାବି କରି ୨୪ ଘଣ୍ଟିଆ କାମ ବନ୍ଦ ଡାକରା ଦେଇଛି ଅଲ୍ ଓଡିଶା ପ୍ରାଇଭେଟ୍ ମେଡିକାଲ୍ ଏଷ୍ଟାବ୍ଲିସମେଣ୍ଟ ଫୋରମ୍ । ଆସନ୍ତାକାଲି ସକାଳ ୬ଟା ଯାଏଁ ଆଉଟଡୋର୍ ବନ୍ଦ ରହିବ । ତେବେ ମେଡିକାଲ୍ ରେ ଭର୍ତ୍ତି ହୋଇଥିବା ରୋଗୀଙ୍କ ଚିକିତ୍ସା ଜାରି ରହିବ । ରାଜ୍ୟରେ ସ୍ବାସ୍ଥ୍ୟସେବାର ୮୦ ପ୍ରତିଶତ ଭାର ଘରୋଇ ମେଡିକାଲ ଏବଂ କ୍ଲିନିକ୍ ଉପରେ ପଡ଼ିଥାଏ । ତେବେ ସ୍ବାସ୍ଥ୍ୟସେବାରେ ଯେପରି କୌଣସି ବାଧା ନଉପୁଜେ ସେଥିପାଇଁ ସଜାଗ ରହିବାକୁ ସ୍ବାସ୍ଥ୍ୟ ବିଭାଗ ସମସ୍ତ ସରକାରୀ ଡାକ୍ତରଖାନାକୁ ନିର୍ଦ୍ଦେଶ ଦେଇଛି । ଓଡ଼ିଶା କ୍ଲିନିକାଲ୍ ଏଷ୍ଟାବ୍ଲିସମେଣ୍ଟ ଆକ୍ଟ ଅନୁଯାୟୀ ଘରୋଇ ମେଡିକାଲର ପଞ୍ଜୀକରଣ , ନବୀକରଣ ଲାଗି ଭିତ୍ତିଭୂମି ଏବଂ ଫାୟାର ସେଫ୍ଟି ଗାଇଡଲାଇନ୍ ରହିଛି । ତେବେ ଏହି ଗାଇଡଲାଇନ୍ ଯୋଗୁଁ ପଞ୍ଜୀକରଣ ଏବଂ ନବୀକରଣ ସହଜ ହେଉନଥିବା ଅଭିଯୋଗ କରି ଏଥିରେ ସଂଶୋଧନ କରିବାକୁ ଘରୋଇ ମେଡିକାଲ୍ ସଂଘ ଦାବି କରିଛି ।