କଟକ ୧୬।୩: ଆନ୍ଦୋଳନକାରୀ ଚାଳକମାନଙ୍କ ହିଂସାତ୍ମକ କାର୍ଯ୍ୟକଳାପ ବିରୋଧରେ ରାଜ୍ୟ ଘରୋଇ ଵସ୍ ମାଲିକ ସଂଘର ପ୍ରତି ଜବାବ । ଗୁରୁବାର ସଂଧ୍ୟା ସୁଦ୍ଧା ରାଜପଥରୁ ଆନ୍ଦୋଳନକାରୀମାନଙ୍କୁ ନହଟାଇଲେ ରାଜ୍ୟବ୍ୟାପୀ ବସ୍ ଧର୍ମଘଟ ଚେତାବନୀ ଦେଲା ବସ୍ ମାଲିକ ସଂଘ । କଟକରେ ଅନୁଷ୍ଠିତ ଏକ ବୈଠକରେ ଘରୋଇ ବସ୍ ମାଲିକ ସଂଘ ଏଭଳି ନିଷ୍ପତ୍ତି ନେଇଛି । ଆନ୍ଦୋଳନକାରୀ ରାଜପଥରୁ ହଟିଲେ ଶୁକ୍ରବାରଠୁ ଘରୋଇ ବସ୍ ସ୍ବାଭାବିକ ଭାବେ ଚାଲିବ । ନଚେତ ଶୁକ୍ରବାର ପୂର୍ବାହ୍ନ ୧୧ଟାଠାରୁ ବସ୍ ଗୁଡିକ ରାଜପଥରେ ରଖି ପ୍ରତିବାଦ କରିବ ଘରୋଇ ବସ୍ ମାଲିକ ସଂଘ ।

ସେପଟେ ଚାଳକମାନଙ୍କର ଷ୍ଟିୟରିଂ ଛାଡ ଆନ୍ଦୋଳନ ଯୋଗୁଁ କଟକରୁ ଯାତ୍ରୀ ପରିବହନ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି । ଖାଁ ଖାଁ ବାଦାମବାଡି ବସଷ୍ଟାଣ୍ଡ । ବାଦାମବାଡିରୁ ଗୁରୁବାର ମାତ୍ର ଖଣ୍ଡେ ଦୁଇ ଖଣ୍ଡ ବସ୍ ଚଳାଚଳ କରିଛି । ଫଳରେ ଦୁରଦୁରାନ୍ତର ଯାତ୍ରୀମାନେ ବସଷ୍ଟାଣ୍ଡରେ ଅଟକି ରହିଛନ୍ତି ।

ସେପଟେ ବାଦାମବାଡିରୁ ସରକାରୀ ବସ୍ ଗୁଡିକ ଚଳାଚଳ କରୁଛି । କିନ୍ତୁ ରାସ୍ତାରେ ଆନ୍ଦୋଳନରତ ଡ୍ରାଇଭରମାନେ ପିକେଟିଂ କରିବା ଯୋଗୁଁ ସରକାରୀ ଡ୍ରାଇଭରମାନେ ବସ୍ ନେଇ ଯିବାକୁ ଅରାଜି ହେଉଛନ୍ତି ।

ଅନ୍ୟପଟେ କଟକରେ ଯେଉଁ ଅଟୋ ଚାଳକମାନେ ବୁଧବାର ଅଟୋ ଚଳାଉଥିଲେ ଆନ୍ଦୋଳନରତ ଡ୍ରାଇଭରମାନେ ସେମାନଙ୍କୁ ଦୁର୍ବ୍ୟବହାର ପ୍ରଦର୍ଶନ କରିବା ଓ ଯାତ୍ରୀ ପରିବହନରେ ବାଧା ସୃଷ୍ଟି ପ୍ରତିବାଦରେ କଟକ ମହାନଗର ଅଟୋ ସଙ୍ଘ ପକ୍ଷରୁ ବାଦାମବାଡି ଥାନାରେ ଏତଲା ଦିଆଯାଇଛି ।