ଚିକିତ୍ସାଧୀନ ଅବସ୍ଥାରେ ବିଚାରଧୀନ କଏଦୀ ମୃତ
4/11/2019 at 10:04 AM

ରାଉରକେଲା୪।୧୧: ରାଉରକେଲା ସ୍ବତନ୍ତ୍ର ଜେଲର ବିଚାରଧୀନ କଏଦୀ ଯୋସେଫ ତିର୍କୀଙ୍କ ସନ୍ଦେହଜନକ ମୃତ୍ୟୁ ହୋଇଛି । ମୃତ ବିଚାରଧୀନ କଏଦୀ ଯୋସେଫ ତିର୍କିୀ ୨୦୧୭ ମସିହାରୁ ଏକ ହତ୍ୟା ମାମଲାରେ ଜେଲରେ ରହିଆସୁଥିଲେ ।

ସୂଚନାଯୋଗ୍ୟ ଯେ, ରାଉରକେଲା ସ୍ବତନ୍ତ୍ର ଜେଲର ଏକ ହତ୍ୟା ମାମଲାରେ ରହିଆସୁଥିବା ବିଚାରଧୀନ କଏଦୀ ଯୋସେଫଙ୍କ ସ୍ବାସ୍ଥ୍ୟ ଅନେକ ଦିନ ହେଲା ଖରାପ ଥିଲା । ଗତକାଲି ବାନ୍ତି ହେବାରୁ ତାଙ୍କୁ ଜେଲରେ ପ୍ରାଥମିକ ଚିକିତ୍ସା କରାଯାଇଥଲା । କିନ୍ତୁ ତାଙ୍କ ସ୍ବାସ୍ଥ୍ୟରେ କୌଣସି ଉନ୍ନତି ନହେବା ସହ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ରାଉରକେଲା ସରକାରୀ ଡାକ୍ତରଖାନାରେ ଭର୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଯୋସେଫ ତିର୍କିୀଙ୍କ ମୃତଦେହ ରାଉରକେଲା ସରକାରୀ ଡାକ୍ତରଖାନାର ଶବଗୃହରେ ରଖାଯାଇଛି ।

ବର୍ତ୍ତମାନ ପର୍ଯ୍ୟନ୍ତ ତାଙ୍କ ପରିବାରର କୌଣସି ସଦସ୍ୟ ଆସିନାହାନ୍ତି । ଏପଟେ କିନ୍ତୁ ପରିବାର ଲୋକେ ପହଚିଂଲେ ଶବ ବ୍ୟବଛେଦ କରାଯିବା ସହ ମୃତଦେହକୁ ହସ୍ତାନ୍ତର କରାଯିବ । କେଉଁ ପରିସ୍ଥିତିରେ ଯୋସେଫ ତିର୍କୀଙ୍କ ମୃତ୍ୟୁ ହେଲା ତାହା ସଂନ୍ଦେହ ଜନକ । ଯଦି ତାଙ୍କ ସ୍ବାସ୍ଥ୍ୟ ପୂର୍ବରୁ ଖରାପ ଥିଲା ତେବେ କାହିଁକି ଜେଲ କତୃପକ୍ଷ ଡାକ୍ତରଖାନାରେ ଚିକିତ୍ସା ନକରି ଜେଲରେ ଚିକିତ୍ସା କରୁଥିଲେ ।