ଆଜିକାଲି ଅନଲାଇନ ଶପିଙ୍ଗର ଟ୍ରେଣ୍ଡ ଚାଲିଛି । ବ୍ୟସ୍ତବହୁଳ ଜୀବନରେ ଦୋକାନକୁ ଯାଇ ଶପିଙ୍ଗ କରିବା ପାଇଁ କାହା ପାଖରେ ସମୟ ନାହିଁ । ସେଥିପାଇଁ ଲୋକେ ଅନଲାଇନ ଶପିଙ୍ଗ ଫର୍ମୁଲା ଆପଣେଇ ନେଇଛନ୍ତି । ଘରେ ବସି ଆରାମରେ ଅନଲାଇନ ଶପିଙ୍ଗ କରୁଛନ୍ତି । ତେବେ ଏମିତି ଏକ ଦେଶ ଅଛି ଯେଉଁଠାରେ ଜେଲରେ ଥିବା କଏଦୀଙ୍କୁ ମଧ୍ୟ ଅନଲାଇନ ଶପିଙ୍ଗ କରିବାକୁ ଅନୁମତି ଦିଆଯାଇଛି ।

ଚୀନର ଗୁଆଁଗଣ୍ଡୋଜ ପ୍ରାନ୍ତର ଏକ ଜେଲରେ କଏଦୀଙ୍କ ପାଇଁ ଅନଲାଇନ ଶପିଙ୍ଗ ପ୍ଲାଟଫର୍ମ ଆରମ୍ଭ କରାଯାଇଛି । ଏବେ କଏଦୀ ମଧ୍ୟ ଜେଲରେ ଥାଇ ନିଜ ପସନ୍ଦର ଜିନିଷ କିଣିପାରିବେ । ଏହି ଶପିଙ୍ଗ ପୋର୍ଟାଲ ଜରିଆରେ କଏଦୀମାନେ ମାସେ ଭିତରେ ୩ ହଜାର ଟଙ୍କା ପର୍ଯ୍ୟନ୍ତ ଶପିଙ୍ଗ କରିପାରିବେ । ଏଥିପାଇଁ ତାଙ୍କୁ କମ୍ପୁଟରରେ ଫିଙ୍ଗର ପ୍ରିଣ୍ଟ କିମ୍ବା ପାସୱାର୍ଡ ଜରିଆରେ ଲଗିନ କରିବାକୁ ହେବ । ଏହି ବ୍ୟବସ୍ଥାକୁ ପରଖିବା ପାଇଁ କୋଙ୍ଗହୁଆ ଜେଲ ପ୍ରଶାସନ ଜାନୁଆରୀରୁ ଏପ୍ରିଲ ମାସ ପର୍ଯ୍ୟନ୍ତ ପାଇଲଟ ପ୍ରୋଜେକ୍ଟ ଆରମ୍ଭ କରିଥିଲେ । ଏହି ପ୍ରୋଜେକ୍ଟ ସଫଳ ହେବାପରେ କଏଦୀଙ୍କ ପାଇଁ ଅନଲାଇନ ସପିଙ୍ଗ ବ୍ୟବସ୍ଥା ଗ୍ରହଣ କରିବା ପାଇଁ ନିଷ୍ପତ୍ତି ନେଇଛନ୍ତି ଜେଲ ପ୍ରଶାସନ ।

ଏହି ପାଇଲଟ ପ୍ରୋଜେକ୍ଟ ଜରିଆରେ କଏଦୀମାନେ ୧୩ ହଜାର ଅର୍ଡ଼ର କରିଥିଲେ । କଏଦୀଙ୍କ ୧୩ ହଜାର ଅର୍ଡର ସଫଳାତାପୂର୍ବକ ପୁରା କରାଯାଇଥିଲା ।