ନୂଆଦିଲ୍ଲୀ: ମଧ୍ୟ ପ୍ରଦେଶର ଶାଜାପୁରରେ ନିର୍ବାଚନୀ ରାଲିକୁ ସମ୍ୱୋଧିତ କରିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇନ୍ଦୋରେ ବଡ଼ ରୋଡ୍ ଶୋ’ କରିଛନ୍ତି । ରୋଡ୍ ଶୋ’ ଆରମ୍ଭ ପୂର୍ବରୁ ପ୍ରଧାନମନ୍ତ୍ରୀ ମୋଦୀ ପ୍ରଥମେ ଇନ୍ଦୋରର ବଡ଼ ଗଣେଶ ମନ୍ଦିର ପହଞ୍ଚିଥିଲେ । ଏଠାରେ ସେ ପୂଜାର୍ଚ୍ଚନା କରିବା ପରେ ଖୋଲା ଜିପ୍‌ରେ ଆଗକୁ ବଢିଥିଲେ । ପିଏମ୍ ମୋଦୀଙ୍କ ଏହି ରାଲି ପ୍ରାୟ ଆଢେଇ କିଲୋମିଟର ଲମ୍ୱା ଥିଲା । ପ୍ରଧାନମନ୍ତ୍ରୀ ଖୋଲା ଜିପ୍‌ରେ ଯାତ୍ରା କରି ରାସ୍ତା ପାର୍ଶ୍ୱରେ ଛିଡ଼ା ହୋଇଥିବା ସମର୍ଥକ ଓ କାର୍ଯ୍ୟକର୍ତ୍ତାଙ୍କୁ ଅଭିବାଦନ ଜଣାଇଥିଲେ ।

ପିଏମ୍ ମୋଦୀଙ୍କ ରୋଡ୍ ଶୋ’କୁ ଦୃଷ୍ଟିରେ ରଖି ସ୍ଥାନୀୟ ବିଜେପି ନେତାଙ୍କୁ ଭିନ୍ନ ଭିନ୍ନ କ୍ଷେତ୍ରରେ କାର୍ଯ୍ୟରେ ନିୟୋଜିତ କରାଯାଇଥିଲା । କିଛି ନେତାଙ୍କୁ ପିଏମ୍‌ଙ୍କ ସ୍ୱାଗତ ଦାୟିତ୍ୱ ଦିଆଯାଇଥିଲା । ଅନ୍ୟ କିଛିଙ୍କୁ ବଡ଼ ଗଣେଶ ଓ ରାଜୱାଡେରେ ସ୍ୱାଗତ ଦାୟିତ୍ୱ ଦିଆଯାଇଥିଲା । ବଡ଼ ଗଣେଶ ମନ୍ଦିରରେ କୈଳାଶ ବିଜୟବର୍ଗୀୟ, ସାଂସଦ ଶଙ୍କର ଲାଲବାଣୀ, ପୂର୍ବତନ ସାଂସଦ ସୁମିତ୍ରା ମହାଜନଙ୍କ ସହ ଅନ୍ୟ ନେତା ଉପସ୍ଥିତ ଥିଲେ ।

ରୋଡ୍ ଶୋ’ ସମୟରେ ପ୍ରଧାନମନ୍ତ୍ରୀ ମୋଦୀ ହାତ ହଲାଇ ଉପସ୍ଥିତ ଜନତାଙ୍କୁ ଅଭିବାଦନ ଜଣାଇଥିଲେ । ଅନ୍ୟପଟେ ରାସ୍ତା ପାର୍ଶ୍ୱରେ ଛିଡ଼ା ହୋଇଥିବା ଲୋକ ପିଏମ୍ ମୋଦୀଙ୍କୁ ଫୁଲ ପକାଇ ସ୍ୱାଗତ କରିଥିଲେ । ପ୍ରାୟ ଏକ ଘଣ୍ଟା ଯାଏ ରୋଡ୍ ଶୋ’ ଚାଲିଥିଲା ।

ଇନ୍ଦୋରରେ ରୋଡ୍ ଶୋ’ ପୂର୍ବରୁ ଶାଜାପୁରରେ ରାଲିକୁ ସମ୍ୱୋଧିତ କରି ପ୍ରଧାନମନ୍ତ୍ରୀ ମୋଦୀ କଂଗ୍ରେସ୍ ଉପରେ ବର୍ଷିଥିଲେ । ପିଏମ୍ କହିଥିଲେ ଯେ କଂଗ୍ରେସ କେବଳ ନିଜ ପୁଅ ଓ ପରିବାରର ଚିନ୍ତା କରୁଛି । ରାଜ୍ୟର ଜନତାଙ୍କ ସୁଖ ଦୁଃଖରେ ଏମାନଙ୍କ କିଛି ଯାଏ ଆସେ ନାହିଁ । ଦେଉଥିବା ପ୍ରତିଶ୍ରୁତିକୁ ମଧ୍ୟ କେବେ ପୂରଣ କରନ୍ତି ନାହିଁ । ପ୍ରଧାନମନ୍ତ୍ରୀ କହିଥିଲେ, ଆପଣଙ୍କ ସ୍ୱପ୍ନ ହିଁ ମୋଦୀ ସରକାରଙ୍କ ସଂକଳ୍ପ ଅଟେ । ସମସ୍ତଙ୍କ ସ୍ୱପ୍ନ ସେତେବେଳ ବାସ୍ତବ ହେଲେ ଯେତେବେଳେ ଭାରତ ବିକଶିତ ହେବ । ଏଥିପାଇଁ ମଧ୍ୟ ପ୍ରଦେଶ ବିକଶିତ ହେବା ଦରକାର । କଂଗ୍ରେସ କେବେ ବି ମଧ୍ୟ ପ୍ରଦେଶରେ ଦ୍ରୁତ ବିକାଶର ଗ୍ୟାରେଣ୍ଟି ଦେଇ ପାରିବ ନାହିଁ ।  

Also Read: କେଜ୍ରିୱାଲ, ପ୍ରିୟଙ୍କା ଗାନ୍ଧୀଙ୍କୁ ନିର୍ବାଚନ ଆୟୋଗଙ୍କ ନୋଟିସ୍‌: ପ୍ରଧାନମନ୍ତ୍ରୀ ମୋଦୀଙ୍କ ଅପମାନଜନ ଚିତ୍ରଣ କରାଯାଇଥିବା ଅଭିଯୋଗ