ନୂଆଦିଲ୍ଲୀ: ଆମେରିକା ଗସ୍ତ କରିପାରନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ରାଷ୍ଟ୍ରପତି ଜୋ ବାଇଡେନଙ୍କ କାର୍ଯ୍ୟକ୍ରମରେ ଅତିଥି ହେବ ମୋଦି । ହ୍ବାଇଟ୍ ହାଉସରେ ରାତ୍ରୀ ଭୋଜନ କରିବେ । ବାଇଡେନଙ୍କ ଅତିଥି ପାଇଁ ଓ୍ବାଂଶିଟନ ପକ୍ଷରୁ କାର୍ଯ୍ୟକ୍ରମ ଅନ୍ତିମ ପର୍ଯ୍ୟାୟରେ ପହଞ୍ଚିଛି । ଆସନ୍ତା ଜୁନ୍ ମାସରେ ମୋଦି ଆମେରିକା ଗସ୍ତ କରିପାରନ୍ତି । ଦୁଇ ଦେଶର ସମ୍ପର୍କକୁ ସୁଦୃଢ କରିବାକୁ ଏଭଳି କାର୍ଯ୍ୟକ୍ରମ ଆୟୋଜନ କରାଯାଇଥିବା କୁହାଯାଉଛି ।
ବ୍ଲୁମବର୍ଗ ରିପୋର୍ଟ ଅନୁଯାୟୀ, ବିଶେଷଜ୍ଞଙ୍କ କହିବା କଥା, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଆମେରିକା ରାଷ୍ଟ୍ରପତିଙ୍କ ଏହି ଔପଚାରିକ ରାଜକୀୟ ଆମନ୍ତ୍ରଣ ଦୁଇ ଦେଶ ମଧ୍ୟରେ ରାଜନୈତିକ ଓ କୁଟନୈତିକ ସମ୍ପର୍କକୁ ବୃଦ୍ଧି କରିବାକୁ ଏହା ଏକ ସଙ୍କେତ । ଆମେରିକା ପ୍ରାଶାସନିକ ଅଧିକାରୀ କହିବା ମୁତାବକ, ଚୀନ୍ ଆମେରିକା ପାଇଁ ଏକ ବଡ଼ ବିପଦ ଭାବେ ଉଭା ହୋଇଛି । ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଚୀନ ସହିତ ମୁକାବିଲା କରିବା ଆବଶ୍ୟକତା ରହିଛି । ଅନ୍ୟପଟେ ଆମେରିକାର ରାଷ୍ଟ୍ରୀୟ ସୁରକ୍ଷା ପରିଷଦର ମୁଖପାତ୍ର ଏବାବଦରେ କିଛି ଟିପ୍ପଣୀ ଦେବାକୁ ମନା କରିଦେଇଛନ୍ତି ।
ସୂଚନା ଅନୁଯାୟୀ, ଆସନ୍ତା ଜୁନ୍ ମାସରେ ଆମେରିକା, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ରାଜକୀୟ ରାତ୍ରୀ ଭୋଜନ ପାଇଁ ଆମନ୍ତ୍ରଣ ଯୋଜନା କରୁଛନ୍ତି । ଅନ୍ୟପଟେ ଆସନ୍ତା ସେପ୍ଟମ୍ବର ମାସରେ ଦିଲ୍ଲୀରେ ଜି-୨୦ ଶିଖର ସମ୍ମିଳନୀ ହେବ । ଏଥିରେ ୟୁକ୍ରେନ-ଋଷ୍ ଯୁଦ୍ଧକୁ ନେଇ ଆଲୋଚନା ହୋଇପାରେ । ହେଲେ ଏହା ସ୍ପଷ୍ଟ ହୋଇନାହିଁ, ଏହି ସମ୍ମିଳନୀରେ ଋଷ୍ ରାଷ୍ଟ୍ରପତି ପୁଟିନ୍ ଯୋଗ ଦେବାକୁ ଭାରତ ଆସିବେ କି ନାହିଁ । ସେପଟେ ଏହା ପୂର୍ବରୁ ମୋଦି ଓ ବାଇଡେନଙ୍କ ସାକ୍ଷାତକୁ ନେଇ ବିଶେଷଜ୍ଞମାନେ ବିଭିନ୍ନ ଆଲୋଚନା ଆରମ୍ଭ କରିଦେଲେଣି ।
