ନୂଆଦିଲ୍ଲୀ୧୪/୧୨ : କେନ୍ଦ୍ର ସରକାର ମଙ୍ଗଳବାର କରୋନାର ବୁଷ୍ଟର ଡୋଜ ଉପରେ ଚାଲିଥିବା ଗବେଷଣା ସମ୍ପର୍କିତ ତଥ୍ୟ ଦିଲ୍ଲୀହାଇକୋର୍ଟରେ ପ୍ରଦାନ କରିଛନ୍ତି। ଅଦାଲତରେ ସରକାର କହିଛନ୍ତି ଏନଟିଜିଏଆଇ(NTAGI)ର ବୈଜ୍ଞାନିକମାନଙ୍କ ସହିତ କରୋନା ଟୀକା ଓ କରୋନା ବୁଷ୍ଟର ଡୋଜ ଟୀକାର ଆବଶ୍ୟକତା ଓ ଏହାର ବୈଜ୍ଞାନିକ ପ୍ରଭାବଶୀଳତା ଉପରେ ବିଚାର ବିମର୍ଶ କରାଯାଉଛି। ବହୁତ ଶୀଘ୍ର ଏହାର ଫଳାଫଳ ଆସିବାକୁ ଯାଉଛି।
ଅଦାଲତରେ କେନ୍ଦ୍ର ସରକାର ଆହୁରି କହିଛନ୍ତି ନ୍ୟାସନାଲ ଟେକ୍ନିକାଲ ଆଡଭାଇଜରି ଗ୍ରୁପ ଅନ ଇମ୍ୟୁନାଇଜେସନ(NTAGI) ଓ ନ୍ୟାସନାଲ ଏକ୍ସପର୍ଟ ଗ୍ରୁପ ଅନ ଭାକ୍ସିନ ଆଡମିନିଷ୍ଟ୍ରେସନ ଭାରତରେ କରୋନା ଭାକ୍ସିନ ଦ୍ୱାରା ସଫଳ ହୋଇଥିବା କରୋନା ମୁକାବିଲାର ପରିସଂଖ୍ୟାନକୁ ବିଶ୍ଳେଷଣ କରି ବର୍ତ୍ତମାନ ଉପଲବ୍ଧ ଥିବା ଟିକାର ପ୍ରଭାବଶୀଳତା ଉପରେ ବିଚାର କରୁଛନ୍ତି। କୋଭିଡ-୧୯ ଟିକାର ବୁଷ୍ଟର ଡୋଜ ବା ଅତିରିକ୍ତ ଡୋଜ ଉପରେ ବହୁତ ଶୀଘ୍ର ନିଷ୍ପତ୍ତି ନିଆ ଯିବାର ସମ୍ଭାବନା ରହିଛି।
ଏନଟିଜିଏଆଇ ଓ ଏନଇଜିବିଏସି ନାମକ ଦୁଇଟି ବିଶେଷଜ୍ଞ ସଂସ୍ଥା ରହିଛି। ଯାହା ମିଳିତ ଭାବେ ଦେଶରେ ଟିକାକରଣରେ କେନ୍ଦ୍ର ସରକାରଙ୍କୁ ପରାମର୍ଶ ଦେବାର କାମ କରନ୍ତି। ଏନଟିଜିଏଆଇ ବିଭିନ୍ନ ପ୍ରକାର କୋଭିଡ ଟିକାର ଉପଯୋଗ ବୈଷୟିକ ଜ୍ଞାନ, ଟିକାର ଡୋଜ, ଓ ଟିକା ନେବାର ସମୟ ସୀମା ବିଷୟରେ ଅନୁଧ୍ୟାନ କରିଥାଏ। ସେହିଭଳି ଏନଇଜିବିଏସି ସ୍ୱାସ୍ଥ୍ୟ ମନ୍ତ୍ରଣାଳୟକୁ ଟିକାକରଣର ସମସ୍ତ ଦିଗ ଉପରେ ଉପଦେଶ ଦେବାସହ ସୁପାରିଶ କରିଥାଏ। ଏହା ବାଦ୍ ଟିକାକରଣ କିପରି ସୁଦୂର ପ୍ରଭାବି ହୋଇପାରିବ ସେ ନେଇ ପ୍ରସ୍ତାବ ଦେଇଥାଏ।