ଜୟପୁର, ୦୯/୧୦: ରାଜସ୍ଥାନର ରାଜଧାନୀ ଜୟପୁରରେ ଜଣେ ଯୌନ ପିପାସୁ ଶିକ୍ଷକଙ୍କ କଳା କାର୍ନାମା ଏବେ ସାମ୍ନାକୁ ଆସିଛି । ସେଣ୍ଟ ଜାଭିୟର୍ ସ୍କୁଲ୍ର ଏନ୍ସିସି ଶିକ୍ଷକ ନିଖିଲ୍ ଜୋସ ଇନ୍ଷ୍ଟାଗ୍ରାମ୍ ମାଧ୍ୟମରେ ସ୍କୁଲ ପାସ୍ଆଉଟ୍ ଛାତ୍ରୀଙ୍କୁ ଅଶ୍ଲୀଳ ମେସେଜ୍ ପଠାଉଥିଲେ । ଉକ୍ତ ଛାତ୍ରୀଙ୍କୁ ମଦ-ପାର୍ଟି ଏବଂ ସ୍କୁଲ୍ ବାହରକୁ ଦେଖା କରିବା ପାଇଁ ଡାକୁଥିଲେ ।
କୁହାଯାଉଛି ଯେ, ଅଭିଯୁକ୍ତ ଶିକ୍ଷକ ୧୦ ରୁ ଅଧିକ ଛାତ୍ରଛାତ୍ରୀଙ୍କୁ ଅଶ୍ଳୀଳ ବାର୍ତ୍ତା ପଠାଇଥିଲେ । ଏହାକୁ ନେଇ ବିଦ୍ୟାଳୟର ଛାତ୍ରୀମାନେ ଅତ୍ୟଧିକ ବିବ୍ରତ ହୋଇଥିଲେ । ଛାତ୍ରୀମାନେ ଏକତ୍ରିତ ହୋଇ ଅଭିଯୁକ୍ତ ଶିକ୍ଷକଙ୍କୁ ଶିକ୍ଷା ଦେଇଥିଲେ ଏବଂ ସୋସିଆଲ ମିଡିଆରେ ତାଙ୍କ ବିରୋଧରେ ଅଭିଯାନ ଆରମ୍ଭ କରିଥିଲେ। ଅଭିଯୁକ୍ତ ଶିକ୍ଷକଙ୍କ ଅଶ୍ଳୀଳ ବାର୍ତ୍ତା ମଧ୍ୟ ସୋସିଆଲ ମିଡିଆରେ ଭାଇରାଲ ହେଉଛି।
ଅଶୋକ ନଗର ପୋଲିସ ଅଧିକାରୀ ସୁରେନ୍ଦ୍ର କୁମାର କହିଛନ୍ତି ଯେ, ସୁଆଜ ଫାର୍ମ ରାମ ନାଗର ଏକ୍ସଟେନ୍ସନ୍ ନିବାସୀ ସେଣ୍ଟ ଜାଭିୟର ସ୍କୁଲ ଶିକ୍ଷକ ନିଖିଲ ଜୋସ ଛାତ୍ରୀଙ୍କ ଇନଷ୍ଟାଗ୍ରାମ ଆଇଡିରେ ଅଶ୍ଳୀଳ ବାର୍ତ୍ତା ପଠାଇଥିବାରୁ ତାଙ୍କୁ ଗିରଫ କରାଯାଇଛି। ଏଥିସହ ଅଭିଯୁକ୍ତ ଶିକ୍ଷକଙ୍କ ମୋବାଇଲରୁ ପୋଲିସ ସ୍କ୍ରିନସଟ ମଧ୍ୟ ପାଇଛି। ଗିରଫ ପରେ ଶିକ୍ଷକଙ୍କୁ ପଚରାଉଚରା ବେଳେ ଏହା ଜଣାପଡିଥିଲା ଯେ ସେ ଗୋଟିଏ ଦିନ ପୂର୍ବରୁ ତାଙ୍କ ଆଇଡିରୁ ବାର୍ତ୍ତା ପଠାଇଥିଲେ ।
ପ୍ରାଥମିକ ଅନୁସନ୍ଧାନରେ ଅଭିଯୁକ୍ତ ନିଖିଲ ଜୋସେ ସି-ସ୍କିମ୍ ଏବଂ ଭାନକ୍ରୋଟାସ୍ଥିତ ଏନସିସି ଶିକ୍ଷକ ବୋଲି ଜଣାପଡ଼ିଛି । ବିଦ୍ୟାଳୟରେ ଅନଲାଇନ୍ କ୍ଲାସ୍ ପାଇଁ ହ୍ୱାଟ୍ସ୍ ଆପ୍ ଗ୍ରୁପ୍ ଗଠନ କରାଯାଇଥିଲା । ଶିକ୍ଷକ ନିଜେ ଛାତ୍ରଙ୍କ ସହିତ ବ୍ୟକ୍ତିଗତ ଚାଟିଂ କରିବା ଆରମ୍ଭ କଲେ । ପ୍ରାରମ୍ଭରେ ଛାତ୍ରୀ କୌଣସି ପ୍ରତିକ୍ରିୟା ଦେଇନଥିଲେ, କିନ୍ତୁ ଶିକ୍ଷକ ମେସେଜ୍ ଜାରି ରଖିଥିଲେ। ହୋଟେଲରେ ସାକ୍ଷାତ କରିବାକୁ ପ୍ରସ୍ତାବ ଦେଇଥିଲେ। ବିଦ୍ୟାଳୟର ଅନେକ ଝିଅଙ୍କୁ ସେ ରାତି ପ୍ରାୟ ୧୦ ଟା ସମୟରେ ଅଶ୍ଳୀଳ ମେସେଜ୍ ପଠାଉଥିଲେ । ହୋମୱାର୍କ ବାହାନା କରି ତାଙ୍କୁ ଭେଟିବା ପାଇଁ ତାଙ୍କୁ ସ୍କୁଲରୁ ଡାକୁଥିବା ଅଭିଯୋଗ ହୋଇଛି ।