ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର (ଅଗଷ୍ଟ ୧୦) ୱାୟନାଡ ଭୂସ୍ଖଳନ ପ୍ରଭାବିତ ଅଞ୍ଚଳ ଗସ୍ତ କରିବେ । ଏହି ଅବସରରେ ସେ ଉଦ୍ଧାର ଏବଂ ଥଇଥାନ କାର୍ଯ୍ୟର ସମୀକ୍ଷା କରିବେ । କେରଳର ପର୍ବତୀୟ ଜିଲ୍ଲା ୱାୟନାଡରେ ଗତ ଜୁଲାଇ ୩୦ରେ ହୋଇଥିବା ପ୍ରଳୟଙ୍କାରୀ ଭୂସ୍ଖଳନ ଘଟଣାରେ ସରକାରୀ ଭାବେ ମୃତକଙ୍କ ସଂଖ୍ୟା ୨୨୬ ହୋଇଛି । ଭୂସ୍ଖଳନ ପ୍ରଭାବିତ ଅଞ୍ଚଳରେ ଏବେ ବି ଉଦ୍ଧାର ଅଭିଯାନ ଜାରି ରହିଛି । ସନ୍ଧାନୀ କୁକୁର ସାହାଯ୍ୟରେ ପ୍ରଭାବିତ ଅଞ୍ଚଳରେ ମାଟି ତଳେ ଦବି ଥିବା ମୃତ ଦେହର ଅବଶେଷକୁ ଉଦ୍ଧାର କରାଯାଉଛି ।
ପିଏମଓ ଅନୁସାରେ ପ୍ରଧାନମନ୍ତ୍ରୀ ଅଗଷ୍ଟ ୧୦ ସକାଳ ପ୍ରାୟ ୧୧ଟାରେ କନ୍ନୁର ପହଞ୍ଚିବେ । ସେଠାରୁ ସେ ୱାୟନାଡରେ ଭୂସ୍ଖଳନ ପ୍ରଭାବିତ କ୍ଷେତ୍ରକୁ ଆକାଶମାର୍ଗରୁ ବୁଲି ଦେଖିବେ । ପିଏମ୍ ପ୍ରାୟ ୧୨.୧୫ ଯାଏ ପ୍ରଭାବିତ ଅଞ୍ଚଳରେ ରହିବେ, ଏହାପରେ ଉଦ୍ଧାରକାରୀ ଟିମ୍ ଦ୍ୱାରା ଗ୍ରହଣ କରାଯାଇଥିବା ସମସ୍ତ ବ୍ୟବସ୍ଥା ବାବଦରେ ବିସ୍ତୃତରେ କୁହାଯିବ ।
ଏହାପରେ ପ୍ରଧାନମନ୍ତ୍ରୀ ମୋଦୀ ଆଶ୍ରୟ ଶିବିର ଏବଂ ହସ୍ପିଟାଲ ଗସ୍ତ କରି ପୀଡିତଙ୍କ ସହ ଆଲୋଚନା କରିବେ । ପ୍ରଧାନମନ୍ତ୍ରୀ ଏକ ସମୀକ୍ଷା ବୈଠକର ମଧ୍ୟ ଅଧ୍ୟକ୍ଷତା କରିବେ, ଯେଉଁଠି ତାଙ୍କୁ ଘଟଣା ଏବଂ ଚାଲିଥିବା ଉଦ୍ଧାରକାର୍ଯ୍ୟ ବିଷୟରେ ବିସ୍ତାରରେ ସୂଚନା ଦିଆଯିବ । ଏହା ପୂର୍ବରୁ ମୁଖ୍ୟମନ୍ତ୍ରୀ ପିନରାଇ ବିଜୟନ ଗୁରୁବାର କହିଥିଲେ ଯେ ପିଏମ୍ଙ୍କ ଗସ୍ତରୁ ପୀଡିତଙ୍କ ଥଇଥାନ ପାଇଁ କେନ୍ଦ୍ରୀୟ ସହାୟତା ବାବଦରେ ସକାରାତ୍ମକ ଅଭିମୁଖ୍ୟ ଆଶା କରାଯାଉଛି ।
