ନୂଆଦିଲ୍ଲୀ, ୨୫/୦୬: କୋରନାରୁ ରକ୍ଷା ପାଇବା ପାଇଁ ସାରା ବିଶ୍ୱରେ ଟିକାକରଣକୁ ଗୁରୁତ୍ୱ ଦିଆଯାଉଛି । କିଛି ଲୋକ ଟିକା ନେବାକୁ ଯାଉଥିବା ବେଳେ ଆଉ କିଛି ଅମଙ୍ଗ ହେଉଛନ୍ତି । ଏହାରି ଭିତରେ ଫିଲିପାଇନ୍ସର ରାଷ୍ଟ୍ରପତି ରୋଡ୍ରିଗୋ ଡୁଟର୍ଟେ ଦେଶର ଯେଉଁ ବ୍ୟକ୍ତି ଟିକା ନେବେ ନାହିଁ ତାଙ୍କୁ ଗିରଫ କରାଯିବ ବୋଲି ଏକ ସମ୍ୱୋଧନ ସମୟରେ କହିଛନ୍ତି ।
ଭ୍ୟାକ୍ସିନ୍ ନେଉ ନଥିବା ଲୋକଙ୍କୁ ରୋଡ୍ରିଗୋ ଡୁଟର୍ଟେ କହିଛନ୍ତି ଯେ, ଆପଣ ଚାହିଁଲେ ଭାରତ କିମ୍ୱା ଆମେରିକା ଯାଇପାରନ୍ତି । ବର୍ତ୍ତମାନ ଫିଲିପାଇନ୍ସ କରୋନା ମହାମାରୀ ସହ ଲଢ଼େଇ କରୁଛି । ଦକ୍ଷୀଣ ପୂର୍ବ ଏସିଆରେ ସବୁଠାରୁ ଅଧିକ ପ୍ରଭାବିତ ଦେଶ ମାନଙ୍କ ମଧ୍ୟରେ ଏହି ଦେଶ ରହିଛି ।
ସେ ରାଷ୍ଟ୍ରକୁ ସମ୍ୱୋଧିତ କରି କହିଛନ୍ତି ଯେ, ମତେ ଖରାପ ଭାବନ୍ତୁ ନାହିଁ । ଦେଶ ସଙ୍କଟର ସାମ୍ନା କରୁଛି । ଏହା ରାଷ୍ଟ୍ରୀୟ ଜରୁରୀ କାଳୀନ ପରିସ୍ଥିତି । ଯଦି ଆପଣ ଟିକା ନେଉନାହାନ୍ତି ତେବେ ମୁଁ ଆପଣଙ୍କୁ ଗିରଫ କରିବି ଏବଂ ଭ୍ୟାକ୍ସିନ୍ ଦେଇଦେବି । ଏମିତିରେ ଦେଶର ବିପତ୍ତି ପଡ଼ିଛି ପୁଣି ଆପଣ ବୋଝ ବଢାଉଛନ୍ତି । ଯଦି ଟିକା ନ ନବେ ତେବେ ଫିଲିପାଇନ୍ସ ଛାଡ଼ି ଚାଲିଯାଆନ୍ତୁ । ଭାରତ ଯାଆନ୍ତୁ କି ଆମେରିକା । କିନ୍ତୁ ଯେଉଁ ପର୍ଯ୍ୟନ୍ତ ଏଠାରେ ଅଛନ୍ତି ଟିକା ଆପଣଙ୍କୁ ନେବାକୁ ହିଁ ପଡ଼ିବ ।
