ବାଙ୍କୀ ୦୧/୦୯: ଆଜିକୁ ତିନି ଦିନ ହେବ ଘରକୁ ଫେରିଲେନି ଫେରିବାଲା । ଘଟଣା ହେଉଛି ସନ ମୁଣ୍ଡଳୀ ଗ୍ରାମ ଥୁରିଆ ସାହିର । ନିଖୋଜ ନନ୍ଦ କିଶୋର ବେହେରା ଦୀର୍ଘ ବର୍ଷ ଧରି ଜଙ୍ଗଲ ଆଖ ପାଖ ଅଂଚଳରେ ଲୁଗା ବ୍ୟବସାୟ କରନ୍ତି । ତାଙ୍କୁ ଏବେ ୭୦ ବର୍ଷରୁ ଅଧିକ । ଘରେ ସ୍ୱାମୀ ସ୍ତ୍ରୀଙ୍କ ସଂସାର । ପିଲାପିଲି ନାହାଁନ୍ତି ତାଙ୍କର । ସାହି ପଡିଶା କରନ୍ତି ଉଭୟଙ୍କ ଦେଖା ଚାହାଁ ।
ସେପଟେ ଏନେଇ ବାଙ୍କୀ ଥାନାରେ ନିଖୋଜ ଘଟଣାରେ ହୋଇଛି ଏତଲା । ହେଲେ ଖବର ନାହିଁ ପ୍ରଶାସନ ପାଖରେ ଫେରିବାଲା ବୃଦ୍ଧ ନନ୍ଦ କିଶୋର ବେହେରା ଗଲେ କୁଆଡେ । କିଏ କହୁଛି ସାପ ଗିଳିଛି ତ କିଏ କହୁଛି ଗାଡ଼ି ଦୁର୍ଘଟଣା ହୋଇଛି । ଫେରିବାଲା ଗଲେ କୁଆଡେ । ପୋଲିସର ତଦନ୍ତରେ ଶିଥିଳତା ଦେଖାଦେଇଥିବା ପରିବାର ଲୋକେ ଅଭିଯୋଗ କରିଛନ୍ତି ।
ତେବେ ବନବିଭାଗ ଓଲଟି ଫେରିବାଲ।ଙ୍କ ନାମରେ ଏତଲା ଦେଇଛି । ବନବିଭାବଗ କହିଛି ଜଙ୍ଗଲ ଭିତରକୁ ବିନା ଅନୁମତିରେ ପ୍ରବେଶ କଲେ କେମିତି? ସେପଟେ ନିଖୋଜ ନନ୍ଦ ବେହେରା ଏ ପର୍ଯ୍ୟନ୍ତ ଘରକୁ ଫେରିନଥିବା ନେଇ ଗାଁ ଓ ପରିବାରରେ ଶୋକର ଛାୟା ଖେଳିଯାଇଛି ।
ନନ୍ଦ ବେହେରାଙ୍କ ସ୍ତ୍ରୀ ସରସ୍ୱତୀ ବେହେରା ସ୍ୱାମୀଙ୍କୁ ଝୁରି ଝୁରି ଫଟୋକୁ ଧରି ଆଖିରୁ ଲୁହ ଝରାଇ ଚାଲିଛନ୍ତି । ଘରେ ଚୁଲି ଜଳିନି । କେବଳ କାନ୍ଦି କାନ୍ଦି ସ୍ୱାମୀଙ୍କ ଫେରିବା ବାଟକୁ ଚାହିଁ ବସିଛନ୍ତି । ଉଭୟେ ପୋଲିସ ଓ ବନବିଭାଗକୁ ପରିବାର ଓ ସମ୍ପର୍କୀୟ ଦୋଷ ଦେଉଛନ୍ତି ।
