ଭୁବନେଶ୍ୱର ୧୩/୦୫: ରାତି ହେଲେ ଝିଲିମିଲି ଡ୍ରେସ୍ ପିନ୍ଧି ଗୋରା ତକତକ ଚେହେରା ଦେଖାଇ ଛିଡା ହେଉଛନ୍ତି । ନିଶବ୍ଦ ରାତିରେ ମିଞ୍ଜି ମିଞ୍ଜି ଆଲୁଅରେ ରାସ୍ତା କଡ଼ରେ ଛିଡ଼ା ହୋଇ ପଡ଼ୁଛନ୍ତି । ଯାତ୍ରୀଙ୍କୁ ଏକୁଟିଆ ଦେଖିଲେ ଇଙ୍ଗିତ କରି ପାଖକୁ ଡ଼ାକୁଛନ୍ତି । ଆଉ ଯାତ୍ରୀ ପହଞ୍ଚିବା ପରେ ଗଳିକନ୍ଦି ରାସ୍ତାକୁ ନେଇ ଆରମ୍ଭ କରି ଦେଉଛନ୍ତି ଲୁଟ୍ପାଟ ।
ଏମିତିକି ପ୍ରତିବାଦ କଲେ ନିସ୍ତୁକ ମାଡ଼ମାରି ଅସଦାଚରଣର ଭୟ ଦେଖାଇ ସର୍ବସ୍ୱ ଲୁଟି ନେଉଛନ୍ତି । ଫଳରେ ବାଧ୍ୟ ହୋଇ ବିଚରା ଯାତ୍ରୀ ଇଜ୍ଜତ ଭୟରେ କାନମୁଣ୍ଡା ଆଉଁସି ଫେରୁଛନ୍ତି । ସେକ୍ସ ଆଳରେ ଯାତ୍ରୀଙ୍କୁ ଲୁଟ୍ପାଟ କରୁଥିବା ଏଭଳି ୨ ଲେଡି ଲୁଟେରାଙ୍କୁ ଉଠାଇ ଆଣିଛି ଖାରବେଳନଗର ଥାନା ପୋଲିସ । ଉଭୟଙ୍କୁ ଥାନାରେ ଅଟକ ରଖି ପଚରାଉଚରା କରୁଛି ପୋଲିସ ।
ଘଟଣାରୁ ଯାହା ଜଣାପଡିଛି, ଚନ୍ଦ୍ରଶେଖରପୁର ଶୈଳଶ୍ରୀବିହାର ଅଞ୍ଚଳରେ ରହୁଥିବା ଜଣେ ଯୁବକ ବେଙ୍ଗାଲୁର୍ରୁ ଆସି ଭୋର ୩ଟାରେ ଭୁବନେଶ୍ୱର ଷ୍ଟେସନରେ ଓହ୍ଲାଇଥିଲେ । ସେଠାରୁ ସେ ଚାଲି ଚାଲି ରୂପାଲି ଛକ ଅଭିମୁଖେ ଯାଉଥିଲେ । ରାମ ମନ୍ଦିର ଛକ ପୂର୍ବରୁ ଏକ ଗଳିରୁ ଜଣେ ଯୁବତୀ ବାହାରି ଆସି ଇଶାରା କରି ତାଙ୍କୁ ଡ଼ାକିଥିଲେ । ଯୁବକ ଜଣଙ୍କ ଯୁବତୀଙ୍କ ପାଖକୁ ଯାଇଥିଲେ । ହଠାତ୍ ଯୁବତୀ ଜଣଙ୍କ ଯୁବକଙ୍କୁ ଜାବୁଡ଼ି ଧରିଥିଲେ । କିଛି ବୁଝିବା ପୂର୍ବରୁ ଅନ୍ୟଜଣେ ଯୁବତୀ ପହଞ୍ଚି ଯାଇଥିଲେ ।
ଉଭୟ ମିଶି ରାହୁଲଙ୍କ ଠାରୁ ମୋବାଇଲ ଓ ମନିପର୍ସ ଲୁଟି ନେଇଥିଲେ । ଯୁବକ ଜଣଙ୍କ ପ୍ରତିବାଦ କରିବାରୁ ଉଭୟ ମିଶି ତାଙ୍କୁ ନିସ୍ତୁକ ମାଡ଼ ମାରିଥିଲେ । ଭୟରେ ଯୁବକ ଜଣଙ୍କ ଦୌଡ଼ିଥିଲେ । କିଛି ଦୂରରେ ଛିଡ଼ା ହୋଇଥିବା ପିସିଆର ପୋଲିସକୁ ଘଟଣା ସଂପର୍କରେ ଜଣାଇଥିଲେ । ପିସିଆର ପୁଲିସ ସଙ୍ଗେ ସଙ୍ଗେ ଯୁବକଙ୍କୁ ଧରି ଘଟଣାସ୍ଥଳରେ ପହଞ୍ଚିଥିଲେ । ହେଲେ ସେଠାରେ କେହି ନଥିଲେ ।
ସଙ୍ଗେ ସଙ୍ଗେ ପୋଲିସ ଚାରିଆଡ଼େ ଖୋଜାଖୋଜି କରି ଶେଷରେ ୟୁନିଟ୍-୩ ଅଞ୍ଚଳରୁ ୨ ଯୁବତୀଙ୍କୁ ଠାବ କରିଥିଲେ । ଯୁବକ ଜଣଙ୍କ ସେମାନଙ୍କୁ ଚିହ୍ନଟ କରିଥିଲେ । ପୁଲିସ ୨ ଯୁବତୀଙ୍କୁ ପଚାରିବାରୁ ସେମାନେ ଓଲଟି ପୋଲିସକୁ ଗାଳିଗୁଲଜ କରିଥିଲେ । ପିସିଆର ପୁଲିସ ଠାରୁ ଖବରପାଇ ଖାରବେଳନଗର ଥାନା ପୋଲିସ ସେଠାରେ ପହଞ୍ଚି ଯାଇଥିଲା । ୨ ଯୁବତୀଙ୍କୁ ଉଠାଇ ଆଣି ଥାନାରେ ଅଟକ ରଖିଛି ।
ଉଭୟଙ୍କ ଠାରୁ ପୋଲିସ ଯୁବକଙ୍କ ଲୁଟ୍ ମୋବାଇଲ ଓ ମନିପର୍ସ ଜବତ କରିଛି । ପୁଲିସ ତଦନ୍ତରୁ ଜଣାପଡ଼ିଛି, ଏହିପରି କିଛି ଲେଡି ଲୁଟେରା ବିଳମ୍ବିତ ରାତିରେ ମାଷ୍ଟରକ୍ୟାଣ୍ଟିନରୁ ରାଜମହଲ ଓ ମାଷ୍ଟରକ୍ୟାଣ୍ଟିନରୁ ବାଣୀବିହାର ରାସ୍ତାରେ ସେକ୍ସ ଆଳରେ ଯାତ୍ରୀଙ୍କୁ ଲୁଟ୍ପାଟ କରୁଛନ୍ତି । ତେଣୁ ଧରାପଡ଼ିଥିବା ଲେଡି ଲୁଟେରା ଏପରି କେତେଜଣଙ୍କୁ ଲୁଟ୍ପାଟ କରିଛନ୍ତି ସେ ନେଇ ପୁଲିସ ୨ ଜଣଙ୍କୁ ପଚରାଉଚରା କରୁଛି । ତଦନ୍ତ ଜାରି ରହିଥିବାରୁ ପୁଲିସ ୨ ଲେଡି ଲୁଟେରାଙ୍କ ବିଷୟରେ କୌଣସି ସୂଚନା ଦେଉନାହିଁ ।