ମୁମ୍ବାଇ ୨୨/୮ : ଅଭିନେତ୍ରୀ ପ୍ରିୟଙ୍କା ଚୋପ୍ରା ଏବଂ ତାଙ୍କ ବୟଫ୍ରେଣ୍ଡ ନିକ୍ ଜୋନ୍ସଙ୍କର ନିକଟରେ ନିର୍ବନ୍ଧ ସରିଛି । ବିବାହର ତାରିଖ ଏପର୍ଯ୍ୟନ୍ତ ସମ୍ନାକୁ ଆସିନାହିଁ । ହେଲେ ପ୍ରିୟଙ୍କାଙ୍କ ଘରଲୋକ ଏବେଠାରୁ ବିବାହ ପାଇଁ ପ୍ରସ୍ତୁତି ଆରମ୍ଭ କରିସାରିଲେଣି । ଏପରିକି ପ୍ରିୟଙ୍କାଙ୍କ ସାନ ଭଉଣୀ ପରିଣିତି ଚୋପ୍ରା ପ୍ରିୟଙ୍କାଙ୍କ ବିବାହକୁ ନେଇ ବହୁତ ଉତ୍ସାହିତ ଅଛନ୍ତି । ସେ ପ୍ରିୟଙ୍କାଙ୍କ ବିବାହରେ ନିକ୍ ଜୋନ୍ସଙ୍କ ଜୋତା ଚୋରି କରିବାକୁ ଯୋଜନା ଆରମ୍ଭ କରିସାରିଲେଣି । ଏପରିକି ତାଙ୍କ ସହ ପଇସାକୁ ନେଇ ମଧ୍ୟ ଏବେଠାରୁ ସେଟିଂ କରିବା ଆରମ୍ଭ କରିସାରିଲେଣି । ନିର୍ବନ୍ଧ ଉତ୍ସବ ପରେ ନିକ୍ ନିଜ ବାପା ମାଆଙ୍କ ସହ ୟୁଏସ ପଳାଇଛନ୍ତି । ପ୍ରିୟଙ୍କା ବର୍ତ୍ତମାନ ମୁମ୍ବାଇରେ ହିଁ ଅଛନ୍ତି । ସେ ନିଜର ଫିଲ୍ମ ‘ଦ ସ୍କାଏ ଇଜ୍ ପିଙ୍କ୍’ର ଶୁଟିଂରେ ବ୍ୟସ୍ତ ରହୁଛନ୍ତି । ପ୍ରିୟଙ୍କା ଓ ନିକ୍‌ଙ୍କ ନିର୍ବନ୍ଧ ପରେ ପରିଣିତି ସୋସିଆଲ ମିଡିଆରେ ଏକ ଭାବବିହ୍ବଳ ପୋଷ୍ଟ ସେୟାର କରିଥିଲେ । ପ୍ରିୟଙ୍କାଙ୍କ ସହ ବିତେଇଥିବା ପିଲାଦିନର କିଛି ମୂହୁର୍ତ୍ତକୁ ପରିଣିତି ସେୟାର ମଧ୍ୟ କରିଛନ୍ତି । ସେ କହିଛନ୍ତି ଯେ ପ୍ରିୟଙ୍କାଙ୍କ ପାଇଁ ନିକ୍‌ଙ୍କଠାରୁ ଭଲ ମଣିଷ ମିଳିପାରିବେ ବୋଲି ସେ ଭାବିପାରୁନାହାଁନ୍ତି। ସେ ଜାଣିଛନ୍ତି ଯେ ନିକ୍ ତାଙ୍କ ପାଇଁ ପରଫେକ୍ଟ ଅଟନ୍ତି ।