ନୂଆଦିଲ୍ଲୀ ୦୨/୦୭: ଇଂଲଣ୍ଡ ବିପକ୍ଷ ଏଜବେଷ୍ଟନ୍ ଟେଷ୍ଟର ପ୍ରଥମ ଦିନରେ ବ୍ୟାଟର୍ ଋଷଭ ପନ୍ତ ଦମଦାର୍ ବ୍ୟାଟିଂ କରିଥିଲେ । ସେ ଇଂଲଣ୍ଡ ବୋଲରଙ୍କୁ ଖୁବ୍ ପ୍ରହାର କରି ୧୪୬ ରନ୍ କରିଥିଲେ । ଏହା ତାଙ୍କ ଟେଷ୍ଟ୍ କ୍ୟାରିଅରର ପଞ୍ଚମ ଶତକ ଅଟେ । ସେ ୧୧୧ଟି ବଲ୍ ଖେଳିଥିବା ବେଳେ ୨୦ ଚଉକା ଓ୪ ଛକା ଲଗାଇଥିଲେ ।
ପନ୍ତ ନିଜ ଦମଦାର୍ ପାଳି ସହ ରବୀନ୍ଦ୍ର ଜାଡେଜାଙ୍କ ସହ ୨୨୨ ରନର ପାର୍ଟନରସିପ୍ କରିଥିଲେ । ଫଳରେ ଭାରତ ପ୍ରଥମ ଦିନରେ ୩୩୮ ରନ୍ କରିପାରିଛି । ଜାଡେଜା ୮୩ ରନ୍ ଓ ମହମ୍ମଦ ସାମି ବିନା କୌଣସି ରନରେ କ୍ରିଜରେ ଅଛନ୍ତି । ତେବେ ୨୪ ବର୍ଷୀୟ ପନ୍ତ ଶତକ ଲଗାଇ ଏକାଧିକ ରେକର୍ଡ ପ୍ରତିଷ୍ଠା କରିଛନ୍ତି ।
ଟେଷ୍ଟ୍ କ୍ରିକେଟରେ ଷଷ୍ଠ ଓ୍ୱିକେଟରେ ସର୍ବାଧିକ ପାର୍ଟନରସିପ୍
୨୨୨ ରନ୍ ପନ୍ତ ଏବଂ ଜାଡେଜା
୨୨୨ ରନ୍ ସଚିନ ତେନ୍ଦୁଲକର ଓ ମହମ୍ମଦ ଆଜାରୁଦ୍ଦୀନ
୨୧୩ ରନ୍ ଆର ଅଶ୍ୱିନ୍ ଓ ରିଦ୍ଧିମାନ ଶାହ
୨୧୦ ରନ୍ ମହେନ୍ଦ୍ର ସିଂ ଧୋନୀ ଓ ଇରଫାନ୍ ପଠାନ୍
୨୦୪ ରନ୍ ପନ୍ତ ଓ କେଏଲ ରାହୁଲ
ଧୋନୀଙ୍କ ରେକର୍ଡ ବି ଭାଙ୍ଗିଲେ
ପନ୍ତ ୮୯ ବଲରୁ ଶତକ ଲଗାଇ ସବୁଠୁ ଦ୍ରୁତ ସେଞ୍ଚୁରୀ ଲଗାଇଥିବା ଓ୍ୱିକେଟକିପର୍ ବ୍ୟାଟସମ୍ୟାନ୍ ହୋଇପାରିଛନ୍ତି । ଏହା ପୂର୍ବରୁ ରେକର୍ଡ ମହେନ୍ଦ୍ର ସିଂ ଧୋନୀଙ୍କ ନାଁରେ ଥିଲା । ଧୋନୀ ୨୦୦୫ରେ ପାକିସ୍ତାନ ବିପକ୍ଷରେ ୯୩ ବଲରୁ ଶତକ ଲଗାଇଥିଲେ ।
ସଚିନ-କୋହଲିଙ୍କ ସହ ବରାବର
ଏଜବେଷ୍ଟନରେ ୧୯୦୨ ମସିହାରୁ ଟେଷ୍ଟ୍ ମ୍ୟାଚ୍ ଖେଳାଯାଉଛି । କିନ୍ତୁ ପୂର୍ବରୁ କୌଣସି ବ୍ୟାଟର ଏଠାରେ ଶହେରୁ କମ୍ ବଲରେ ଶତକ ଲଗାଇନଥିଲେ । ପନ୍ତ ଏଠାରେ ଶତକ ଲଗାଇଥିବା ତୃତୀୟ ଭାରତୀୟ ବ୍ୟାଟର୍ । ଏହାପୁର୍ବରୁ ସଚିନ ତେନ୍ଦୁଲକର ଓ ବିରାଟ କୋହଲି ଏଠାରେ ଶତକ ଲଗାଇଥିଲେ । ଏହି ଶତକ ସହ ସେ ୨୦୦୦ ରନ୍ ମଧ୍ୟ ପୂରଣ କରିଥିଲେ ।
ଇଂଲଣ୍ଡ ବିପକ୍ଷରେ ସବୁଠୁ ଦ୍ରୁତ ଶତକ ଲଗାଇଥିଲେ ଭାରତୀୟ ବ୍ୟାଟର୍
୮୮ ବଲ୍-ମହମ୍ମଦ ଆଜାରୁଦ୍ଦୀନ
89ବଲ- ଋଷଭ ପନ୍ତ
୧୧୭ ବଲ୍- ଋଷଭ ପନ୍ତ
୧୧୮ ବଲ-କେଏଲ ରାହୁଲ
୧୩୦ ବଲ୍- କପିଲ ଦେବ