ନୀଳଗିରି,୩୧/୧ : ସବୁସୀମା ଟପିଗଲେ ପଂଚାୟତ ନିର୍ବାହୀ ଅଧିକାରୀ । ଜଣେ ଜୀବନ୍ତ ଲୋକଙ୍କୁ ସେ କାଗଜ କଲମରେ ମାରିଦେବାକୁ ପଛାଇ ନାହାନ୍ତି । କଥାଟା ଅଡ଼ୁଆ ଲାଗୁଛି ହେଲେ ଏହା ନିରାଟ ସତ୍ୟ । ଏଭଳି ଘଟଣା ବାଲେଶ୍ଵର ଜିଲ୍ଲା ନୀଳଗିରି ବ୍ଲକ ବରମପୁର ପଞ୍ଚାୟତରେ ଘଟିଛି। ଘଟଣାଟି ଥିଲା ଏମିତି ।
ସୂଚନାଯୋଗ୍ୟ ନୀଳଗିରି ବ୍ଲକ ବରମପୁର ପଞ୍ଚାୟତ ଅଧିନ ବରମପୁର ଗାଁର ନାରାୟଣ ପାଣିଙ୍କ ବୟସ ୮୩ ବର୍ଷ । ସରକାରୀ ଯୋଜନାରେ ସେ ବାର୍ଦ୍ଧକ୍ୟ ଭତ୍ତା ପାଉଥିଲେ। ତେବେ ତିନିମାସ ହେବ ଆଉ ଆକାଉଣ୍ଟକୁ ଟଙ୍କା ଆସିନଥିଲା । ଯାହା ୨୦୨୧ ମସିହା ଅକ୍ଟୋବର ମାସ ୩ ତାରିଖରେ ଏକାଉଣ୍ଟକୁ ଭତ୍ତା ଟଙ୍କା ଆସିଥିଲା । ତେବେ ଘଟଣାକୁ ନେଇ ବ୍ଲକ ଭତ୍ତା ପ୍ରଦାନ ବିଭାଗର କାଗଜପତ୍ର ଖୋଲତାଡ଼ ପରେ ଯାହା ଲେଖାଯାଇଥିଲା ତାହା ସହଜରେ ବିଶ୍ୱାସ କରିହେବନି ।
ତିନିମାସ ପୂର୍ବରୁ ସ୍ଥାନୀୟ ପଞ୍ଚାୟତ ନିର୍ବାହୀ ଅଧିକାରିଣୀ ଶାନ୍ତିଲତା ନାୟକ ତାଙ୍କୁ ମୃତ ବୋଲି ବ୍ଲକକୁ ରିପୋର୍ଟ ପ୍ରଦାନ କରିଥିବା ବେଳେ ତାଙ୍କର ଭତ୍ତା କଟି ଯାଇଥିବା ଜଣାପଡିଛି । ତେବେ ଘଟଣାକୁ ନେଇ ହିତାଧିକାରୀଙ୍କ ସମେତ ପରିବାର ଓ ଅଞ୍ଚଳବାସୀ ଘଟଣାକୁ ନିନ୍ଦା କରିବା ସହିତ ଅଧିକାରିଣୀ ଜଣକ ଜାଣିଶୁଣି ଏଭଳି କରିଥିବା ଅଭିଯୋଗ ଉଠିଛି ।
ପୂର୍ବରୁ ଶାନ୍ତିଲତା ମାଟିଆଳି ପଂଚାୟତରେ ପଞ୍ଚାୟତ ଅଧିକାରୀ ଥିବାବେଳେ ଲକ୍ଷଲକ୍ଷ ଟଙ୍କାର ଦୁର୍ନୀତି ହୋଇଥିବା ନଜରକୁ ଆସିଥିଲା । ପୁଣି ବଞ୍ଚିବା ଲୋକଙ୍କୁ କିଛି ରାଜନୈତିକ ବ୍ୟକ୍ତିଙ୍କ ଚାପରେ ଏଭଳି କରିଥିବା ବେଳେ ଘଟଣାର ତଦନ୍ତ ପୂର୍ବକ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ଏଭଳି ଘଟଣାର ତଦନ୍ତ ହୋଇ କାର୍ଯ୍ୟନୁଷ୍ଠାନ କରିଛନ୍ତି ବୁଦ୍ଧିଜୀବି। ତେବେ ଅଧିକାରିଣୀ ଜଣକ ଏହା ଭୁଲରେ ହୋଇଥିବା କହିଛନ୍ତି । ସେପଟେ ସାମାଜିକ ସୁରକ୍ଷା ଅଧିକାରୀ ଘଟଣା ବିଷୟରେ ବିଡ଼ିଓଙ୍କୁ ଅବଗତ କରାଯାଇଥିବା କହିଥିବା ବେଳେ ଘଟଣାର ତଦନ୍ତ ପୂର୍ବକ କାର୍ଯ୍ୟନୁଷ୍ଠାନ ନିଆଯିବ ବୋଲି ସୂଚନା ଦେଇଛନ୍ତି ।
