ପାକିସ୍ତାନରେ ଚରମସୀମାରେ ବେକାରୀ ସମସ୍ୟା, ମାତ୍ର ୧୬୬୭ ପଦବୀ ପାଇଁ ଷ୍ଟାଡିୟମରେ ଆଶାୟୀଙ୍କ ଭିଡ଼

Published By : Prameya-News7 Bureau | January 01, 2023 IST

ନୂଆଜିଲ୍ଲୀ: ପାକିସ୍ତାନରେ ଭୟଙ୍କର ଆର୍ଥିକ ସଂକଟ । ଲୋକଙ୍କ ପାଖରେ ରୋଜଗାର ନଥିବାରୁ ସୁବୁଠି ହାହାକାର । ଚାକିରି ପାଇଁ ଲୋକଙ୍କ ଲମ୍ବା ଲାଇନ୍ ଲାଗିଛି । ପାକିସ୍ତାନରେ ମାତ୍ର କେଇଟା ପଦବୀ ପାଇଁ ଲକ୍ଷାଧିକ ଚାକିରି ଆଶାୟୀ ଆଦେବନ କରିଛନ୍ତି । ଇସଲାମାବାଦ ପୋଲିସରେ ଭର୍ତ୍ତି ପାଇଁ ଆଶାୟୀଙ୍କ ଭିଡ଼ରେ ଷ୍ଟାଡ଼ିୟମ ଭର୍ତ୍ତି ହୋଇଛି ।

ରାଜନୈତିକ ଅସ୍ଥିରତା, ଆତଙ୍କବାଦ ସାଙ୍ଗକୁ ଆର୍ଥିକ ସଂକଟରେ ଜୁଝି ହେଉଛନ୍ତି ପାକିସ୍ତାନ । ଦେଶରେ ଚରମସୀମାରେ ପହଞ୍ଚିଛି ବେକାରୀ ସମସ୍ୟା । ସାଧାରଣ ଲୋକ ତ ଦୂରର କଥା ଶିକ୍ଷିତ ଯୁବକଙ୍କୁ ଚାକିରି ମିଳିବା କଷ୍ଟକର ହେଉଛି । ସମସ୍ୟା ଭିତରେ ପେଶି ହେଉଛନ୍ତି ପାକିସ୍ତାନବାସୀ । ସାମାନ୍ୟ କେଇଟା ପଦବୀ ପାଇଁ ଲକ୍ଷାଧିକ ଯୁବକ ଆବେଦନ କରିଛନ୍ତି । ଇସଲାମାବାଦ ପୋଲିସରେ ଭର୍ତ୍ତି ପାଇଁ ସରକାରଙ୍କ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ହେଲେ ମାତ୍ର ୧୬୬୭ ପଦବୀ ପାଇଁ ବହୁମାତ୍ରାରେ ଆଶାୟୀ ଆବେଦନ କରିଥିବା ଦେଖିବାକୁ ମିଳିଛି । କନଷ୍ଟେବଲ ଚାକିରି ପାଇଁ ଇସଲାମାବାଦ ଷ୍ଟାଡ଼ିୟମ ଭର୍ତ୍ତି ହୋଇଛି ।  

ପାକିସ୍ତାନର ସେନା ପ୍ରମୁଖ ଜେନେରାଲ ସୟଦ ଅସୀମ ମୁନିର୍ ଏହାକୁ ନେଇ ଚିନ୍ତା ପ୍ରକଟ କରିଛନ୍ତି । ଦେଶ ଘୋର୍ ଆର୍ଥିକ ବିପତ୍ତି ଦେଇ ଗତିକରୁଛି ବୋଲି ସେ କହିଛନ୍ତି । କେଉଁଠି ମାତ୍ର କେଇଟା ପଦବୀ ପାଇଁ ଲକ୍ଷାଧିକ ଆଶାୟୀ ରହିଥିବାବେଳେ କେଉଁଠି ଏଲପିଜିକୁ ଲୋକେ ପ୍ଲାଷ୍ଟିକ ବ୍ୟାଗରେ ଭରି ରୋଷେଇ କରୁଛନ୍ତି । ଅର୍ଥ ବ୍ୟବସ୍ଥା ଓ ଆତଙ୍କବାଦୀ ଭଳି ସଂକଟରୁ ଦେଶକୁ ବାହାର କରିବାକୁ ହେଲେ ଦେଶବାସୀ ସହଯୋଗ କରିବା ଆବଶ୍ୟକ ବୋଲି ଜେନେରାଲ ସୟଦ ଅସୀମ ମୁନିର୍ କହିଛନ୍ତି ।

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.