ନୂଆଦିଲ୍ଲୀ: ପାକିସ୍ତାନରେ ଅର୍ଥନୈତିକ ମାନ୍ଦାବସ୍ଥା। ନଗଦ ସଂକଟରେ ଗତି କରୁଛି ପଡ଼ୋଶୀ ଦେଶ । ବିଦେଶୀ ମୁଦ୍ରା ଭଣ୍ଡାର ଲଗାତାର କମିବାରେ ଲାଗିଛି । ମହଙ୍ଗା ମାଡ଼ରେ ଭାଜି ହେଉଛନ୍ତି ପାକିସ୍ତାନର ସାଧାରଣ ଲୋକ । ଆର୍ଥିକ ମାନ୍ଦାବସ୍ଥାରେ ସୁଧାର ଆଣିବାକୁ ମଙ୍ଗଳବାର ବିଭିନ୍ନ ଉପାୟ ବାହାର କରିଛନ୍ତି ସରକାର । କ୍ୟାବିନେଟରେ ଶକ୍ତି ସଂରକ୍ଷଣ ପାଇଁ ବିଭିନ୍ନ ଯୋଜନାରେ ମୋହର ଲାଗିଛି ।
ଶକ୍ତି ସଂରକ୍ଷଣ ଯୋଜନାରେ ବଜାର, ମଲ୍, ରେସ୍ତାରାଁ ଓ କଲ୍ୟାଣମଣ୍ଡପ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି । ଏହା ସହିତ କର୍ମଚାରୀମାନଙ୍କୁ ଓ୍ବାର୍କ ଫ୍ରମ୍ ହୋମ୍ କାମ କରିବାକୁ କୁହାଯାଇଛି । ଶହବାଜ ସରିଫଙ୍କ କ୍ୟାବିନେଟ୍ ଦେଶରେ ଶକ୍ତି ଖର୍ଚ୍ଚ କମ୍ କରିବାକୁ ରାଷ୍ଟ୍ରୀୟ ଶକ୍ତି ସଂରକ୍ଷଣ ଯୋଜନାକୁ ମଞ୍ଜୁରୀ ଦେଇଛନ୍ତି ।
ସୂଚନା ଅନୁଯାୟୀ, ପ୍ରତିରକ୍ଷା ମନ୍ତ୍ରୀ ଖଓ୍ବଜା ଆସିଫ୍ କ୍ୟାବିନେଟ୍ ବୈଠକରେ ଏନେଇ ଘୋଷଣା କରିଛନ୍ତି । ରାତି ୮.୩୦ ମିନିଟରୁ ସମସ୍ତ ବଜାର, ମଲ୍, ରେସ୍ତୋରାଁ ଆଦି ବନ୍ଦ ରହିବ । ସେହିପରି ରାତି ୧୦ଟାରୁ କଲ୍ୟାଣମଣ୍ଡପରେ ମାଙ୍ଗଳିକ କର୍ଯ୍ୟକ୍ରମ ବନ୍ଦ ରହିବ । ଏହା ଦ୍ବାରା ଦେଶରେ ୬୦ ଆରବ ଟଙ୍କା ବଞ୍ଚିବା ସହିତ ଶକ୍ତି ଖର୍ଚ୍ଚ ମଧ୍ୟ ହ୍ରାସ ପାଇବ ଏବଂ ଶକ୍ତି ସଂରକ୍ଷଣ ହୋଇପାରିବ । ବିଦେଶୀ ଅର୍ଥ ଭଣ୍ଡାର ବଢ଼ିଲେ ଦେଶର ଆର୍ଥିକ ସଂକଟରେ ଧୀରେ ଧୀରେ ସୁଧାର ଆସିବ ବୋଲି ଖଓ୍ବଜା ଆସିଫ୍ କହିଛନ୍ତି ।
