ଲାହୋର ୧୪।୦୨: ଆର୍ଥିକ ସଙ୍କଟ ମଧ୍ୟରେ ଘେରି ରହିଛି ପାକିସ୍ତାନ । ଖାଦ୍ୟ-ପାନୀୟ ଠାରୁ ଆରମ୍ବ କରି ପେଟ୍ରୋଲ ଡିଜେଲ ଯାଏଁ ସବୁ ଦର ଆକାଶଛୁଆଁ । ମହଙ୍ଗାରେ ଅସ୍ତବ୍ୟସ୍ତ ଅନେକ ଲୋକ ରାଜରାସ୍ତାକୁ ଆସିଛନ୍ତି । ଦିନକୁ ଦିନ ଖରାପ ହେବାରେ ଲାଗିଛି ଦେଶର ଆର୍ଥିକ ଅବସ୍ଥା ।

ଗତ କିଛିଦିନ ତଳେ ଶାହାବାଜ ସରିଫ ସରକାର ବିଦ୍ୟୁତ ଦର ବୃଦ୍ଧି କରି ଜନତାଙ୍କୁ ଚକିତ କରିଦେଇଥିଲେ । ଦରବୃଦ୍ଧି ଏପରି ହୋଇଛି ଯେ ପାକିସ୍ତାନରେ ଚିକେନ୍‌ କିଲୋ ପିଛା ୭୦୦ରୁ ୮୦୦ ଟଙ୍କାରେ ପହଞ୍ଚିଛି । ସେହିପରି ଟମାଟୋ କିଲୋ ୧୬୦ରୁ ୨୦୦ଟଙ୍କାରେ ବିକ୍ରି ହେଉଥିବା ବେଳେ କ୍ଷୀର ଲିଟର ପିଛା ୧୯୦ ଟଙ୍କାରୁ ୨୧୦କୁ ବୃଦ୍ଧି କରାଯାଇଛି ।

ଆର୍ଥିକ ସଙ୍କଟର ସମ୍ମୁଖୀନ ହେଉଥିବା ପାକିସ୍ତାନର ବୈଦେଶିକ ମୁଦ୍ରା ଭଣ୍ଡାର ୩ ବିଲିୟନ ଡଲାରରୁ କମ୍ ରହିଛି । ଗଣମାଧ୍ୟମ ରିପୋର୍ଟ ଅନୁଯାୟୀ କିଛି ଦୋକାନୀ ଦୁଗ୍ଧର ମୂଲ୍ୟ ଲିଟରକୁ ୨୭ ଟଙ୍କାକୁ ବୃଦ୍ଧି କରିଛନ୍ତି । ଆଗାମୀ ସମୟରେ କ୍ଷୀରର ମୂଲ୍ୟରେ ଆହୁରି ବୃଦ୍ଧି ହୋଇପାରେ ।  ସେହିପରି କୁକୁଡ଼ାମାନଙ୍କୁ ଦିଆଯାଉଥିବା ଶସ୍ୟ ମୂଲ୍ୟରେ ମଧ୍ୟ ଉଲ୍ଲେଖନୀୟ ବୃଦ୍ଧି ଘଟିଛି । ୫୦ କିଲୋ ଶସ୍ୟର ମୂଲ୍ୟ ୭୨୦୦ ଟଙ୍କାକୁ ବୃଦ୍ଧି ପାଇଛି ।

ତେବେ ଆଗାମୀ ଦିନରେ ପାକିସ୍ତାନବାସୀଙ୍କ ସମସ୍ୟା ଆହୁରି ବଢିବାକୁ ଯାଉଛି । ଆଇଏମଏଫ ଋଣ ଦେବା ସର୍ତ୍ତରେ ସବସିଡି ଶେଷ କରିବାକୁ କହିଛି । ଆଇଏମ୍ଏଫ୍ କହିଛି ଯେ ପାକିସ୍ତାନ ଜନସାଧାରଣଙ୍କୁ ଦିଆଯାଉଥିବା ସବସିଡି ହ୍ରାସ କରିବା ସହ ରାଜସ୍ୱ ବୃଦ୍ଧି କରିବା ଉଚିତ । ଏଥିରେ ପେଟ୍ରୋଲିୟମ ଉତ୍ପାଦ ଉପରେ ଜିଏସ୍ଟି ଲାଗୁ କରିବା ଭଳି ଜିଏସ୍ଟି ୧୭ରୁ ୧୮ ପ୍ରତିଶତ ବୃଦ୍ଧି ଭଳି ପଦକ୍ଷେପ ଅନ୍ତର୍ଭୁକ୍ତ ରହିଛି । ଅନ୍ୟପଟେ ପ୍ରତିରକ୍ଷା ବଜେଟକୁ ୧୦-୧୫ ପ୍ରତିଶତ ହ୍ରାସ କରିବାକୁ ପାକିସ୍ତାନ ସରକାର ପ୍ରତିରକ୍ଷା ମନ୍ତ୍ରଣାଳୟ ସହ ଆଲୋଚନା କରିଥିବା ଚର୍ଚ୍ଚା ହେଉଛି ।