ନୂଆଦିଲ୍ଲୀ: ଭାରତୀୟ ସେନା ଶନିବାର ତିନି ଆତଙ୍କବାଦୀଙ୍କୁ ନିପାତ କରିଛି। ଏମାନେ ଜାମ୍ମୁ-କାଶ୍ମୀର ବାରାମୂଳାରେ ଏଲଓସି ପାର୍ କରିବାକୁ ଚେଷ୍ଟା କରୁଥିଲେ। ତେବେ ବଡ଼ କଥା ହେଉଛି ସୀମା ପାର୍ କରାଇବାରେ ଏମାନଙ୍କୁ ପାକିସ୍ତାନୀ ସେନା କଭର୍ ଫାୟାର ଦେଉଥିଲେ। ବ୍ରିଗେଡିୟର ପିଏମଏସ ଢିଲନ କହିଛନ୍ତି, ଗୁଇନ୍ଦା ସୂଚନା ଆଧାରରେ ଭାରତୀୟ ସେନା ଏବଂ ଜମ୍ମୁ-କାଶ୍ମୀର ପୋଲିସ୍ର ଏକ ମିଳିତ ଅପରେସନ କରାଯାଇଥିଲା। ଆଉ ଏଥିରେ ତିନି ଆତଙ୍କବାଦୀ ନିପାତ କରାଯାଇଛି।
ବ୍ରିଗେଡିୟର ପିଏମଏସ ଢିଲନ କହିଛନ୍ତ, ‘ତିନି ଆତଙ୍କବାଦୀ ସୀମା ପାର୍ କରିବାକୁ ଚେଷ୍ଟା କରୁଥିଲେ। ଆଉ ଏହି ସମୟରେ ଗୁଳି ବିନିମୟ ହୋଇଥିଲା। ଏହି ଗୁଳିବିନିମୟରେ ଦୁଇ ଆତଙ୍କବାଦୀଙ୍କ ଶବ ଜବତ ହୋଇଛି। ହେଲେ ତୃତୀୟ ଆତଙ୍କବାଦୀର ଶବକୁ କାଢ଼ିବାବେଳେ ପାକିସ୍ତାନୀ ସେନା ଗୁଳିଚଳାଇଥିଲେ ଫଳରେ ବାଧା ସୃଷ୍ଟି ହୋଇଥିଲା।’
ଆହୁରି ପଢ଼ନ୍ତୁ: ଅନନ୍ତନାଗରେ ୭୦ ଘଣ୍ଟାର ସର୍ଚ୍ଚ ଅପରେସନ; ୨ ଆତଙ୍କବାଦୀ ନିହତ
ତେବେ ନିହତ ହୋଇଥିବା ଆତଙ୍କବାଦୀଙ୍କ ପରିଚୟ ମିଳିପାରିନାହିଁ। ସେମାନେ କେଉଁ ଆତଙ୍କବାଦୀ ସଂଗଠନ ସହ ରହିଥିଲେ ସେନେଇ ମଧ୍ୟ ଜଣାପଡ଼ିନାହିଁ। ସେମାନଙ୍କ ପାଖରୁ ଦୁଇଟି ଏକେ ରାଇଫଲ, ଗୋଟିଏ ପିସ୍ତଲ, ସାତଟି ଗ୍ରେନେଡ୍, ଗୋଟିଏ ଆଇଡି ଏବଂ ଅନ୍ୟ ଯୁଦ୍ଧ ସାମଗ୍ରୀ ମିଳିଛି, ଏମିତିକି ସେମାନଙ୍କ ପାଖରୁ ପାକିସ୍ତାନ ନୋଟ୍ ମଧ୍ୟ ମିଳିଛି।
ସୂଚନାଥାଉକି, ଏହି ଏନକାଉଣ୍ଟର ଏପରି ସମୟରେ ହୋଇଛି ଯେତେବେଳେ ସୁରକ୍ଷା ବାହିନୀ ଅନନ୍ତନାଗର ଘଞ୍ଚ ଅରଣ୍ୟ ମଧ୍ୟରେ ଲୁଚି ରହିଥିବା ଆତଙ୍କବାଦୀଙ୍କୁ ନିପାତ କରିବାକୁ ସର୍ଚ୍ଚ ଜାରି ରଖିଛନ୍ତି। ଶନିବାର ଚତୁର୍ଥ ଦିନରେ ପହଞ୍ଚିଛି ଜମ୍ମୁ-କାଶ୍ମୀର ଅନନ୍ତନାଗରେ ଆତଙ୍କବାଦୀଙ୍କ ସହ ସେନାର ଗୁଳିବିନିମୟ। ଏହି ଏନକାଉଣ୍ଟରରେ ଚାରି ଯବାନ ସହିଦ ହୋଇଛନ୍ତି ।
