ଇସ୍ଲାମାବାଦ ୪।୬: ପାକିସ୍ତାନର ଏକ ଶୀର୍ଷ ନ୍ୟାୟାଳୟ ଜେଲରେ ବନ୍ଦୀ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପାର୍ଟି ପାକିସ୍ତାନ ତେହେରିକ-ଏ-ଇନସାଫ (ପିଟିଆଇ) କାର୍ଯ୍ୟାଳୟକୁ ପୁଣି ଖୋଲିବାକୁ ନିର୍ଦ୍ଦେଶ ଦେଇଛନ୍ତି। ପାଖାପାଖି ୨ସପ୍ତାହ ପୂର୍ବେ ଇସ୍ଲାମାବାଦରେ ପିଟିଆଇ କାର୍ଯ୍ୟାଳୟ ବନ୍ଦ ହୋଇଯାଇଥିଲା। ରାଜଧାନୀ ବିକାଶ ପ୍ରାଧିକରଣ (ସିଡିଏ) ମେ ୨୪ ତାରିଖ ଦିନ ଇସ୍ଲାମାବାଦ ପିଟିଆଇ କାର୍ଯ୍ୟାଳୟ ଉପରେ ଚଢଉ କରିଥିଲେ। ଏହି ଚଢଉ ପରେ କାର୍ଯ୍ୟାଳୟକୁ ସିଲ କରିଦିଆଯାଇଥିଲା।
ସିଡିଏ ଅଭିଯୋଗ କରିଥିଲେ ଯେ ଆଇନର ଉଲ୍ଲଂଘନ କରି ଏହି କାର୍ଯ୍ୟାଳୟର ନିର୍ମାଣ ହୋଇଥିଲା। ଏଣୁ କାର୍ଯ୍ୟାଳୟକୁ ସିଲ କରି ଦିଆଯାଇଥିଲା। ତେବେ ପାର୍ଟି ପକ୍ଷରୁ ସିଡିଏଙ୍କ କାର୍ଯ୍ୟକୁ ଇସ୍ଲାମାବାଦ ହାଇକୋର୍ଟରେ ଚ୍ୟାଲେଞ୍ଜ କରାଯାଇଥିଲା। ହାଇକୋର୍ଟରେ ସୋମବାର ଜଷ୍ଟିସ୍ ସମନ ରଜଭିଙ୍କ ଅଦାଲତ ମାମଲାର ଶୁଣାଣି ଶେଷ କରିଥିବା ବେଳେ ରାୟ ସଂରକ୍ଷିତ ରଖିଥିଲେ। ଏହା ଉପରେ କୋର୍ଟ ମଙ୍ଗଳବାର ତାଙ୍କର ନିଷ୍ପତ୍ତି ଶୁଣାଇଛନ୍ତି।
କୋର୍ଟ ସିଡିଏଙ୍କୁ ପିଟିଆଇ କାର୍ଯ୍ୟାଳୟ ପୁଣି ଥରେ ଖୋଲିବାକୁ ନିର୍ଦ୍ଦେଶ ଦେଇଛନ୍ତି। ପିଟିଆଇ ସଂସ୍ଥାପକ ଇମ୍ରାନଖାନଙ୍କୁ ୩ ହାଇପ୍ରୋଫାଇଲ ମାମଲାରେ ଜାମିନ ମିଳିବାର ଦିନକ ପରେ ଇସ୍ଲାମାବାଦ ହାଇକୋର୍ଟଙ୍କ ଏହି ରାୟ ଆସିଛି। କ୍ରିକେଟରରୁ ନେତା ହୋଇଥିବା ଇମ୍ରାନ ଖାନ ଗତବର୍ଷ ଅଗଷ୍ଟ ମାସରୁ ଜେଲରେ ଅଛନ୍ତି। ତାଙ୍କୁ ୨୦୦ରୁ ଅଧିକ ମାମଲାରେ ଦୋଷୀ କରାଯାଇଛି।