ପି.ଚିଦାମ୍ବରମ୍‌ଙ୍କ ଅଡୁଆ ସହଜରେ ଛିଡିବା ଭଳି ଲାଗୁନି । ଓୟାରସେଲ – ମ୍ୟାକ୍ସିସ୍ ମାମଲରେ ଛାଡୁନି ସିବିଆଇ କିମ୍ବା ଇଡି । ଗତକାଲି ପ୍ରବର୍ତ୍ତନ ନିର୍ଦ୍ଦେଶାଳୟରେ ହାଜର ହୋଇ ଉତ୍ତର ରଖିଥିବା ପୂର୍ବତନ ଅର୍ଥମନ୍ତ୍ରୀଙ୍କୁ ପୁଣି ସମନ । ଆସନ୍ତା ୧୨ ତାରିଖରେ ହାଜର ଲାଗି ପ୍ରବର୍ତ୍ତନ ନିର୍ଦ୍ଦେଶାଳୟ ବରିଷ୍ଠ କଂଗ୍ରେସ ନେତାଙ୍କୁ ଏହି ସମନ ଦେଇଛି । ଏ ୟାରସେଲ୍- ମ୍ୟାକ୍ସିସ୍ ଅର୍ଥ ଠକେଇ ମାମଲାରେ ଚିଦାମ୍‌ବରମ୍‌ଙ୍କ ବୟାନ ରେକର୍ଡ କରାଯିବ ।ସେପଟେ ମଙ୍ଗଳବାର ଇଡି ଆଗରେ ହାଜର ହୋଇଥିବା ଚିଦାମ୍ବରମ୍ ବୁଧବାର ଦିନ ସିବିଆଇ ନିକଟରେ ହାଜର ହୋଇଥିଲେ । ଦିଲ୍ଲୀ ସ୍ଥିତ ସିବିଆଇ କାର୍ଯ୍ୟାଳୟକୁ ଆସି ଏୟାରସେଲ- ମ୍ୟାକ୍ସିସ ଚୁକ୍ତିରେ ନିଜ ଭୂମିକା ନେଇ ଜବାବ ରଖିଛନ୍ତି ଚିଦାମ୍ବରମ୍ । ୨୦୦୬ରେ ଏୟାରସେଲ୍‌ ରେ ପୁଞ୍ଜିନିବେଶ ଲାଗି ଗ୍ଲୋବାଲ କମ୍ୟୁନିକେଶନ ହୋଲଡିଂ ସର୍ଭିସେସ୍ ଲିମିଟେଡ୍ କୁ ବୈଦେଶିକ ପୁଞ୍ଚିନିବେଶ ପ୍ରୋତ୍ସାହନ ବୋର୍ଡ୍ ମଂଜୁରୀ ଦେଇଥିଲା । ସେଥିରେ ଅନିୟମିତତା ନେଇ ଅଭିଯୋଗ ଉଠିଥିଲା । ତେବେ ଚୁକ୍ତି ସମୟରେ ଦେଶରେ ଅର୍ଥମନ୍ତ୍ରୀ ଥିଲେ ଚିଦାମ୍ବରମ୍ ।