ନୂଆଦିଲ୍ଲୀ: କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ଭାରତ ଯୋଡୋ ଯାତ୍ରା ସଂପ୍ରତି ଅନ୍ତିମ ପର୍ଯ୍ୟାୟରେ ପହଞ୍ଚିଛି। ଯାତ୍ରା ବର୍ତ୍ତମାନ ଜାମ୍ମୁ-କାଶ୍ମୀରରେ ଶ୍ରୀନଗରରେ ସଂପନ୍ନ ହେବାକୁ ଯାଉଛି। ରାହୁଲ ଏବଂ କଂଗ୍ରେସ ଦଳ ଆଶା ରଖିଛି ଯେ, ଭାରତ ଯୋଡୋ ଯାତ୍ରା ଜରିଆରେ ଯେତେ ସମ୍ଭବ ବିରୋଧୀ ଦଳକୁ ଏକଜୁଟ୍ କରାଯାଇ ପାରିବ। ସେଥିପାଇଁ ଶ୍ରୀନଗରରେ ଭାରତ ଯୋଡୋ ଯାତ୍ରାରେ ସାମିଲ୍ ହେବାକୁ କଂଗ୍ରେସ ଅନେକ ପାର୍ଟିକୁ ପତ୍ର ଲେଖିଥିଲା। ତେବେ ଶେଷରେ ଦଳକୁ ନିରାଶ ମିଳିଛି।

ଅନ୍ତିମ ପର୍ଯ୍ୟାୟରେ ଥିବା ଭାରତ ଯୋଡୋ ଯାତ୍ରାରେ ଯୋଗ ଦେବାକୁ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ୨୩ ରାଜନୈତିକ ପାର୍ଟିକୁ ଚିଠି  ଲେଖିଥିଲେ। ଆଉ ଦଳ ଆଶା ରଖିଥିଲା ଯେ, ସମସ୍ତ ଦଳ ଶ୍ରୀନଗରର ସେର ଇ କାଶ୍ମୀର କ୍ରିକେଟ୍ ଷ୍ଟାଡିୟମରେ ସୋମବାର ଆୟୋଜିତ ଶେଷ ପର୍ଯ୍ୟାୟ କାର୍ଯ୍ୟକ୍ରମରେ ସାମି୍ଲ ହେବେ। ତେବେ ଏଥିରୁ କେବଳ ମାତ୍ର ୮ଟି ଦଳ ଯୋଗ ଦେଇଛନ୍ତି।

ବିହାରର ଜେଡିୟୁ ଏବଂ ଆରଜେଡି ଦୁହିଁଙ୍କ ଅନୁପସ୍ଥିତି କଂଗ୍ରେସକୁ ସବୁଠୁ ଅଧିକ ଚକିତ କରିଛି। ଶ୍ରୀନଗରରେ ଦୁଇ ଦଳର  ନେତା ଯୋଗ ଦେଇ ନାହାନ୍ତି। ତେବେ କଂଗ୍ରେସ ପାଇଁ ଆଶ୍ଵସ୍ତିକର ବିଷୟ ଭାରତ ଯୋଡୋ ଯାତ୍ରାର ଅନେକ ପର୍ଯ୍ୟାୟରେ ଏନସିପି,  ଶିବସେନା, ଜେଏମଏମ ଏବଂ ଡିଏମକେ ପରି ଅନ୍ୟ ସହଯୋଗୀ ଦଳ ସାମିଲ୍ ହୋଇଥିଲେ। ଯାତ୍ରା ମହାରାଷ୍ଟ୍ରରେ ପ୍ରବେଶ କରିବା ସମୟରେ ଶିବସେନା ନେତା ଆଦିତ୍ୟ ଠାକରେ ଏବଂ ଏନସିପି ନେତା ସୁପ୍ରିୟା ସୁଲେ ରାହୁଲଙ୍କ ସହ ପଦଯାତ୍ରା କରିଥିଲେ। ସଞ୍ଜୟ ରାଉତ ଜାମ୍ମୁରେ ରାହୁଲଙ୍କ ସହ ଥିଲେ। ଏଥିସହ ଡିଏମକେ ଏବଂ ଜେଏମଏମ ନେତା ମଧ୍ୟ ଶ୍ରୀନଗରରେ କଂଗ୍ରେସ କାର୍ଯ୍ୟକ୍ରମରେ ଯୋଗ ଦେଇଛନ୍ତି।

ଖରାପ ପାଗ ସତ୍ତ୍ଵେ ଆଠଟି ଦଳର ନେତା ଶ୍ରୀନଗର କାର୍ଯ୍ୟକ୍ରମରେ ଯୋଗ ଦେଇଛନ୍ତି। ସୋମବାର ସକାଳେ ଶ୍ରୀନଗରରେ ପ୍ରବଳ ତୁଷାରପାତ ଆରମ୍ଭ ହୋଇ ଯାଇଛି। ଏଥିରେ ଡିଏମକେ ନେତା ତିରୁଚି ଶିବା, ସିପିଆଇର ସାଧାରଣ ସଂପାଦକ ଡି ରାଜା, ନ୍ୟାସନାଲ କନଫରେନ୍ସର ନେତା ଉମର ଅବଦୁଲ୍ଲା, ପିଡିପିର ମେହବୁବା ମୁଫତି, ଆରଏସପିର ଏନକେ ପ୍ରେମଚନ୍ଦନ ଏବଂ ଆଇୟୁଏମଏଲର ନବସ କାନି ଯୋଗ ଦେଇଥିଲେ। ଜେଏମଏମ ଏବଂ ଭିସିକେର ପ୍ରତିନିଧି ମଧ୍ୟ ଶ୍ରୀନଗର କାର୍ଯ୍ୟକ୍ରମରେ ଉପସ୍ଥିତ ଥିଲେ।

ଯାତ୍ରା ଦିଲ୍ଲୀ ଅତିକ୍ରମ କରିବା ସମୟରେ ରାହୁଲଙ୍କ ସହିତ ବିଏସପି ସାଂସଦ ଶ୍ୟାମ ସିଂ ଯାଦବ ମଧ୍ୟ ଯୋଗ ଦେଇଥିଲେ। ତେବେ ବିଏସପି ଏହି ରାହୁଲଙ୍କ ଯାତ୍ରାରେ ସାମିଲ୍ ହୋଇ ନାହିଁ।

ଏହି ଅବସରରେ ସିପିଆଇ ନେତା ଡି ରାଜା କହିଛନ୍ତି ଆମେ ସମସ୍ତେ ଦେଶର ସ୍ଵାଧୀନତ ପାଇଁ ଲଢେଇ କରିଛନ୍ତି। ଦେଶକୁ ବ୍ରିଟିଶ କବଳରୁ ମୁକ୍ତ କରିଛନ୍ତି। ତେଣୁ ବର୍ତ୍ତମାନ ଦେଶକୁ ବିଜେପି ଶାସନରୁ ମୁକ୍ତ କରିବା ପାଇଁ ସମସ୍ତ ଧର୍ମନିରପେକ୍ଷ ଦଳଗୁଡିକୁ ଏକାଠି ଆସିବା ଉଚିତ୍। ଉମର ଅବଦୁଲ୍ଲା କହିଛନ୍ତି, ଦେଶର ପଶ୍ଚିମରୁ ପୂର୍ବ ପର୍ଯ୍ୟନ୍ତ ଆଉ ଏକ ଯାତ୍ରା ଆରମ୍ଭ କରାଯାଉ ଏବଂ ଏଥିରେ ମୁଁ ରାହୁଲଙ୍କ ସହ ଯାତ୍ରା କରିବାକୁ ପ୍ରସ୍ତୁତ। ସେପଟେ ମୁଫତି କହିଛନ୍ତି, ଦେଶକୁ ରାହୁଲଙ୍କଠୁ ଆଶାର ନୂତନ କିରଣ ଦେଖିବାକୁ ମିଳିଛି।